"ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022" އަށް މި މުބާރާތުގެ އެންމެ ފަހުގެ ޗެމްޕިއަން ތިމަރަފުށި ރެކޯޑް ސްޕޮންސަޝިޕް އެއްބަސްވުމަކާ އެކު ތައްޔާރުވެއްޖެ އެވެ.
ގޯލްޑަން ފުޓްސަލް ޗެލެންޖް މުބާރާތުގެ ޗެމްޕިއަންކަން ދެ ފަހަރު ހޯދުމުގެ ޝަރަފް އޮތް ހަމައެކަނި ޓީމަކީ ތިމަރަފުއްޓެވެ. ތިމަރަފުށިން ގޯލްޑަން ފުޓްސަލް ޗެލެންޖްގައި ބައިވެރިވަނީ ތިމަރަފުށީ ފްރެންޑްލީ ޕްލޭޔާސްގެ ނަމުގަ އެވެ.
އެންމެ ފަހުން 2019 ވަނަ އަހަރު ބޭއްވި ގޯލްޑަން ފުޓްސަލް މުބާރާތް ތިމަރަފުށިން މުބާރާތް ކާމިޔާބުކުރިއިރު، އެންމެ ފުރަތަމަ ތަށި އުފުލާލީ 2016 ވަނަ އަހަރު އެވެ. މި ފަހަރުގެ މުބާރާތުގެ ފުރަތަމަ މެޗުގައި މިރޭ ތިމަރަފުށިން ނުކުންނާނީ ވޭމަންޑޫއާ ދެކޮޅަށެވެ.
ގޯލްޑަން ފުޓްސަލް ޗެލެންޖަށް ތިމަރަފުށިން ތައްޔާރުކޮށްފައިވާ ކިޓްތައް ރަސްމީކޮށް ލޯންޗްކުރަނީ.-- ފޮޓޯ: މުހައްމަދު ޝާބިން/ އަދަދު
ތިމަރަފުށީ ޓީމުގެ މެއިން ސްޕޮންސަރަކަށް ހަމަޖައްސާފައިވަނީ ބީހައިވް ހޮޓެލްސް ޕްރައިވެޓް ލިމިޓެޑް އެވެ. މާފަންނު ފުޑްކޯޓުގެ ކެފޭޒޯލާ ރެސްޓޯރެންޓްގައި ރޭ ބޭއްވި އިވެންޓެއްގައި ތިމަރަފުށީ ޓީމުގެ ފަރާތުން ސޮއިކުރީ ޓީމުގެ މެނޭޖަރު ހުސެއިން ނިހާދު އެވެ. އަދި ބީހައިވްގެ ފަރާތުން ސޮއިކުރީ ޖެނެރަލް މެނޭޖަރު މުހައްމަދު ޝަރީފް އެވެ.
ތިމަރަފުށީ ޓީމުގެ ފަރާތުން ބުނީ މިއީ ގޯލްޑަން ފުޓްސަލް ޗެލެންޖްގައި މިހާތަނަށް ޓީމަކަށް ލިބޭ އެންމެ ބޮޑު ސްޕޮންސާ ކަމަށާއި އެކަން ފަހިކޮށްދެވީތީ ބީހައިވް އަށް ހާއްސަ ޝުކުުރެއް އަދާކުރާ ކަމަށެވެ.
"މިއީ މި މުބާރާތަށް މިހާތަނަށް ޓީމަކަށް ލިބޭނެ އެންމެ ބޮޑު ސްޕޮންސަރުކަން ޔަގީން. އެހެންވީމަ އެ ފަރާތްތަކަށް ޝުކުުރުއަދާކުރަން ބޭނުން،" ޓީމުގެ އޮފިޝަލް ބުންޏެވެ.
ގޯލްޑަން ފުޓްސަލް ޗެލެންޖްގައި ތިމަރަފުށީ ޓީމު ބައިވެރިވުމުގައި ރަށު ކައުންސިލުން ދޭ އެއްބާރުލުން ޓީމުން ވަރަށް ބޮޑަށް ފާހަގަކުރެ އެވެ. މީގެ އިތުރުން އެހެނިހެން ޕާޓްނަރުންގެ ގޮތުގައި ހަރަކާތްތެރިވާ ޖާޒިއާ، އެމްޖީއެޗް، ބޯލްޑް، ކެފޭޒޯލާ، ކައިމިސް އަދި މާކުއީއެމްވީ އަށް ވެސް ޓީމުގެ ފަރާތުން ވަނީ ހާއްސަ ޝުކުރެއް އަދާކޮށްފަ އެވެ.
ރާއްޖޭގެ ފުޓްބޯޅައިގައި ނަން މަޝްހޫރު ރަށެއް ކަމަށްވާ ތ. ތިމަރަފުށްޓަކީ ފަހަކަށް އައިސް ފުޓްސަލްގެ އެކި މުބާރާތްތަކުގައި ވެސް އެންމެ ނަން ހިނގާ އެއް ރަށެވެ. އަދި ފުޓްބޯޅައިގެ ރޮނގުން ބެލިޔަސް މިދިޔަ އަހަރުތަކުގައި ކާމިޔާބު ހޯދާފައިވާ ރަށެކެވެ.
ތިމަރަފުށީގެ ޓީމުގެ ކެޕްޓަން ސިނާހު (ވ) އަށް ޓީމުގެ ކެޕްޓަން ބޭންޑް ރަސްމީކޮށް ހަވާލުކުރަނީ.-- ފޮޓޯ: މުހައްމަދު ޝާބިން/ އަދަދު
އެފްއޭއެމުން އަތޮޅުތަކަށް ހުޅުވާލައިގެން މިދިޔަ ހަތް ވަރަކަށް އަހަރު ތެރޭ އަލުން ފުޓްބޯޅަ މުބާރާތްތައް ފަށައި، ބޭއްވި މިނިވަން ޗެމްޕިއަންޝިޕްގެ ފައިނަލުގައި ދެ ފަހަރު ކުޅުނު ހަމައެކަނި ޓީމަކީ ތިމަރަފުށްޓެވެ. އެ ގޮތުން 2016 ވަަނަ އަހަރުގެ ފައިނަލުގައި އޭދަފުށި އަތުން ބަލިވި ނަމަވެސް 2018 ވަނަ އަހަރުގެ ފައިނަލުގައި ށ. ފޯކައިދޫ ބަލިކޮށް، އެ އަހަރުގެ ދިވެހި ޕްރިމިއާ ލީގުގައި ވެސް ތިމަރަފުށިން ވަނީ ވާދަކޮށްފަ އެވެ.
ރާއްޖޭގެ ކުންފުނިތަކަށް ހުޅުވާލައިގެން ބޭއްވޭ އެންމެ ފޯރިގަދަ، އެންމެ ޝަރަފްވެރި ފުޓްސަލް މުބާރާތް ކަމަށްވާ ކްލަބް މޯލްޑިވްސް ކަޕްގެ އެންމެ ފަހުގެ މުބާރާތުގައި އެއް ރަށަކަށް ނިސްބަތްވާ އެންމެ ގިނަ ކުޅުންތެރިން ފެނިފައިވަނީ ތިމަރަފުށިންނެވެ. އެ މުބާރާތުގެ ޗެމްޕިއަންކަން ހޯދި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ ރޯޑް ރެކްރިއޭޝަން ކްލަބްގައި ވެސް އިސްކޮށް ތިބީ ތިމަރަފުށްޓައް ނިސްބަތްވާ ކުޅުންތެރިންނެވެ.
ގޯލްޑަން ފުޓްސަލް ޗެލެންޖްގައި ތިމަރަފުށިން ވޭމަންޑޫއާ ބައްދަލުކުރާ މެޗު ފަށާނީ މިރޭ 22:15 ގަ އެވެ.
