ރާމަﷲ، ފަލަސްތީން (މާޗް 1) - ހުޅަނގު އައްސޭރީގައި އިޒްރޭލުގެ ސިފައިން ހިންގި އޮޕަރޭޝަނެއްގައި ފަލަސްތީނުގެ ދެ މީހުން މަރާލައިފި އެވެ.
އިޒްރޭލު ބޯޑަރު ފުލުހުން ބުނީ ސިފައިންނާއި އަންޑާކަވާ ފުލުހުން ޖެނިން ރެފިއުޖީ ކޭމްޕަށް ވަނީ "ޓެރަރިސްޓް" ހަރަކާތްތަކުގެ ތުހުމަތު ކުރެވޭ މީހަކު ހައްޔަރު ކުރަން ކަމަށެވެ.
"ތުހުމަތުވާ މީހާ ހައްޔަރުކޮށްގެން ދާން ފެށުމުން، އެކި ދިމަދިމާލުން ބަޑި ޖަހަން ފެށި. އެހެންވެ، ރައްދުގައި އަންޑާކަވާ ފުލުހުން ވެސް ބަޑި ޖެހި،" ފުލުހުން ބުންޏެވެ.
ފަލަސްތީނުގެ ހެލްތު މިނިސްޓްރީން ބުނީ މަރުވީ އުމުރުން 22 އަހަރުގެ އަބްދުﷲ އަލް ހޮސާރީ އާއި އުމުރުން 18 އަހަރުގެ ޝާދީ ހާލިދް ނަޖްމް ކަމަށެވެ.
އިޒްރޭލް ފުލުހުން ގޮސް ޖެނިން ރެފިއުޖީ ކޭމްޕުގެ ގެޔަކުން ހައްޔަރު ކުރީ، އިޒްރޭލުގެ ޖަލަކުން މިނިވަންކޮށްފައި ހުރި އިމާދް ޖަމާލް އަބޫ އަލް ހެއިޖާ އެވެ.
ބޭރުގެ ނޫސްތަކުން ބުނާ ގޮތުގައި ފަލަސްތީނުގެ ދެ ޒުވާނުން މަރާލުމުން، ގިނަ ބަޔަކު ތިބީ ރުޅިގަދަވެފަ އެވެ. އަދި ޖެނިންގައި ބޮޑު ހިނގާލުމެއް ވެސް ބާއްވާފައިވެ އެވެ.
ފަހަކަށް އައިސް އެކި އޮޕަރޭޝަންތައް ހިންގުމުގެ ނަމުގައި އިޒްރޭލް ސިފައިންނާއި ފުލުހުން ހުޅަނގު އައްސޭރިއަށް ވަނުން ވަނީ އިތުރުވެފަ އެވެ.
އެގޮތުން ހުޅަނގު އައްސޭރީގެ ނަބްލޫސް ސިޓީގައި މިދިޔަ މަހު ދުވާލު ގަޑީގައި ތިން މީހެއްގެ ގަޔަށް ބަޑި ޖަހައި މަރާލުމަށް ފަހު ވެސް ބުނީ އެއީ ޝައްކު ކުރެވޭ ބަޔެއް ކަމަށެވެ.
އޭގެ ކުރިން އިޒްރޭލުން ވަނީ ކުޑަ ފިރިހެން ކުއްޖެއްގެ ގަޔަށް ބަޑި ޖަހައި މަރާލާފަ އެވެ. އެ ފަހަރު އިޒްރޭލުން ބުނީ ބަޑި ޖެހީ ފުލުހުންނަށް ހަމަލާދޭތީ ކަމަށެވެ.
ފަލަސްތީނުގެ ހުޅަނގު އައްސޭރި އިޒްރޭލުން ވެރިވެގަތީ 1967 ވަނަ އަހަރު އެވެ. އޭގެ ފަހުން އިޒްރޭލުން ދަނީ ގާނޫނާ ހިލާފަށް އެ ތަނުގައި ޔަހޫދީން ވަޒަންވެރި ކުރަމުންނެވެ. މިހާރު ހުޅަނގު އައްސޭރީގައި 475،000 ޔަހޫދީން ދިރިއުޅެ އެވެ.
