ވޮޝިންޓަން، އެމެރިކާ (މާޗް 1) - ރަޝިއާގެ އެހީއާ ނުލައި ބައިނަލްއަގްވާމީ ޖައްވީ ސްޓޭޝަން (އައިއެސްއެސް) ހިންގޭނެ ގޮތެއް ބަލަމުންދާ ކަމަށް ނާސާއިން ބުނެފި އެވެ.
ނާސާގެ އޮފިޝަލް ކޭތީ ލުޑާޒް ނޫސްވެރިންނަށް ވިދާޅުވީ އައިއެސްއެސްގެ އޮޕަރޭޝަންތައް ކުރިއަށްދާ ކަމަށާއި ރަޝިއާއިން ވެސް މަސައްކަތް ކުރަނީ އެހެން ގައުމުތަކާ ގުޅިގެން ކަމަށެވެ.
"އެކަމަކު ވެސް އަޅުގަނޑުމެން އަބަދުވެސް ބަލަމުން މި ދަނީ އޮޕަރޭޝަންތައް މިހާރަށް ވުރެ ފަސޭހަކޮށް އަދި ތަފާތު ގޮތް ގޮތަށް ކުރިއަށް ގެންދެވޭނީ ކިހިނެއްތޯ ބަލަމުން."
އެމެރިކާއިން ސަޕްލައި ކުރަނީ އައިއެސްއެސްއަށް ބޭނުންވާ ހަކަތަ އެވެ. އަދި ރަޝިއާއިން ޒިންމާ ވަނީ އައިއެސްއެސް އޯބިޓްގައި ހުއްޓުމެއް ނެތި އެނބުރުމާއި ފްލޯޓްވުމަށެވެ.
ރަޝިއާއިން އެކަން ކުރަނީ އައިއެސްއެސްގައި ޖައްސާފައިވާ "ޕްރޮގްރެސް" ޖައްވީ އުޅަނދުގެ އެހީގައި އެ ސްޓޭޝަން 250 މޭލު އުސް ހިސާބެއްގައި ދަމަހައްޓައިގެންނެވެ.
ނަމަވެސް މިދިޔަ ހަފްތާގައި ރަޝިއާގެ ޖައްވީ ކަންކަމާ ބެހޭ ވެރިޔާ ޑިމިޓްރީ ރޮގޮޒިން ވިދާޅުވީ އެމެރިކާއިން އަޅާފައިވާ ފިޔަވަޅުތަކަށް ރައްދެއްގެ ގޮތުން އައިއެސްއެސްގެ ޕާޓްނާޝިޕް ނިންމަން ވިސްނަމުންދާ ކަމަށެވެ.
އެހެން ވެއްޖެ ނަމަ، 400 ޓަނުގެ ޖައްވީ ސްޓޭޝަން ދުނިޔެއަށް ވެއްޓޭނެ އެވެ. އައިއެސްއެސް އޯބިޓުގައި ރަޝިއާ މަތިން ދަތުރު ކުރަނީ ވަރަށް މަދުންނެވެ. އެހެންކަމުން ދުނިޔެއަށް ވެއްޓޭ ނަމަ ރަޝިއާގެ ބިމުގެ ސަރަހައްދަކަށް ވެއްޓުމުގެ ފުރުސަތު ވެސް ކުޑަ އެވެ.
ނާސާގެ ލުޑާޒް ވިދާޅުވީ އެފަދަ ހާލަތެއް ކުރިމަތިނުވާނެ ގޮތެއް ހޯދަން މަސައްކަތް ކުރާ ކަމަށާއި ސްޕޭސް އެކްސް އާއި ނޯތްރޮޕް ގްރުމޭން ކުންފުނިން ވެސް އެކަމާ އެބަ އުޅޭ ކަމަށެވެ.
ނޯތްރޮޕް ގްރުމޭންގެ "ސައިގްނަސް" ޖައްވީ އުޅަނދު ފެބްރުއަރީ 21 ވަނަ ދުވަހު އައިއެސްއެސްގައި ޖައްސާފައިވާ އިރު، ރަޝިއާގެ އެހީ ނެތި އޯބިޓުގައި އެ ސްޓޭޝަން ދެމެހެއްޓޭނެ ކަމަށް ފުރަތަމަ ބުނި އުޅަނދަކީ އެއީ އެވެ.
މިދިޔަ ހުކުރު ދުވަހު ސްޕޭސް އެކްސްގެ ވެރިޔާ އެލޯން މަސްކް ކުރެއްވި ޓްވީޓެއްގައި ވެސް ވަނީ އައިއެސްއެސް އޯބިޓުގައި ދެމެހެއްޓުމަށް ޝައުގުވެރިވާކަން ހާމަކުރައްވާފަ އެވެ.
ފިނި ހަނގުރާމައަށް ފަހު އެއްބައިވަންތަކަމުގެ ނިޝާނެއްގެ ގޮތުގައި ފާއިތުވި 21 އަހަރު އެކި ގައުމުގެ އެސްޓްރޮނޯޓުން މަސައްކަތުގައި އުޅެމުންދާ އައިއެސްއެސްގައި މީގެ ކުރިން ރަޝިއާ އާއި އެމެރިކާއިން ގުޅުން ކަނޑާލާފައެއް ނުވެ އެވެ.
ނަމަވެސް ރަޝިއާގެ ސިފައިން ޔޫކްރެއިނަށް ދެމުންދާ ހަމަލާތައް އިތުރަށް ގޯސްވާ ނަމަ، އެމެރިކާ އާއި ރަޝިއާގެ ޖައްވީ ގުޅުން ދެމިއޮތުމުގެ ފުރުސަތު ކުޑަ ކަމަށް އެނެލިސްޓިން ބުނެ އެވެ.
