އަންހެނަކަށް އަނިޔާކުރި މައްސަލައަކާ ގުޅިގެން މާލެއިން މީހަކު ހައްޔަރުކޮށްފި އެވެ.
ފުލުހުން ބުނީ މާލޭގެ ގެޔެއްގެ ތެރޭގައި އަންހެނަކަށް އަނިޔާކުރި ކަމުގެ މައްސަލައެއްގައި ދިވެހި ފިރިހެނަކު މިރޭ ހައްޔަރުކޮށްފައިވާ ކަމަށެވެ.
ފުލުހުން ބުނީ އެ މައްސަލަ ރިޕޯޓުކުރުމުން ފުލުހުން ދިޔައީ ހެންވޭރުގައި ހުރި ގެޔަކަށް ކަމަށެވެ.
އަދި މިހާރު އަނިޔާކުރިކަމަށް ތުހުމަތުވާ ފިރިހެން މީހާ ހުރީ ހައްޔަރުގަ ކަމަށް ފުލުހުން ބުނެ އެވެ. އެ މައްސަލަ މިހާރު ދަނީ ތަހުގީގުކުރަމުންނެވެ. އެ ފިރިހެން މީހާއާއި އަންހެން މީހާއާ ދެމެދުގައި އޮތް ގުޅުމެއް ފުލުހުން ނުބުނެ އެވެ.
އަދި އެ ފިރިހެން މީހާ އަނިޔާކުރި ގެޔަކީ ވެސް އެ ދެމީހުންނާ ގުޅުން އޮންނަ ގެޔެއް ކަމެއް ފުލުހުން ކަށަވަރެއް ނުކޮށްދެ އެވެ. އަދި ހަމައެއާއެކު އަނިޔާވި އަންހެން މީހާއަށް ލިބުނު ޒަހަމްތަކުގެ ތަފްސީލެއް އަދި އޭނާއަށް ފަރުވާދިނުމަށް ވެސް އެއްވެސް ތަނަކަށް ގެންދިޔަކަމެއް ފުލުހުން ނުބުނެ އެވެ.
މައުލުމާތު ލިބިފައިވާ ގޮތުން ފުލުހުން ހައްޔަރުކޮށްފައިވަނީ އުމުރުން 18-25 އަހަރާއި ދެމެދުގެ ޒުވާނެކެވެ. އަދި އެމީހާ ހައްޔަރުކޮށްފައިވަނީ މާލޭގެެ ހެންވޭރުގައި ހުންނަ ރަތްވިލާ މަގުގައި ހުންނަ ގެޔެއްގެ ތެރެއިންނެވެ.
އޭނާއަކީ މީގެ ކުރިން ކުށުގެ ތުހުމަތުތަކެއް ކުރެވިފައިވާ މީހެއް ކަމަށް ވެސް މައުލޫމާތު ލިބެ އެވެ. އަނިޔާކުރި ކަމަށް ތުހުމަތުވާ މީހާގެ ވީޑިއޯއެއް ވެސް މިހާރު ސޯޝަލް މީޑިއާގައި ދަނީ ދައުރުވަމުންނެވެ.
