ސަރުކާރުގެ ހިއްސާ އޮންނަ ގިނަ ކުންފުނިތަކުގެ ހިންގުމަށް ބަދަލުގެންނަން ރައީސް އިބްރާހިމް މުހައްމަދު ސޯލިހު ޕްރައިވަޓައިޒޭޝަން އެންޑް ކޯޕޮރަޓައިޒޭޝަން ބޯޑު (ޕީސީބީ)އަށް ހުށަހަޅުއްވާފައިވާކަން އެނގިއްޖެ އެވެ.
ސަރުކާރުގެ ކުންފުނިތަކަށް ގިނަ ބަދަލުތަކެއް ގެންނަން ރައީސް ސޯލިހު ހުށަހަޅުއްވާފައިވާކަން ޕީސީބީގެ ރައީސް އާސިމް މުހައްމަދު "އަދަދު"އަށް މިއަދު ވަނީ ޔަގީންކޮށްދެއްވައިފަ އެވެ.
"...ގިނަ ކުންފުނިތަކެއްގެ ހިންގުމަށް ބަދަލު ގެންނަން ސަރުކާރުން ވަނީ ހުށަހަޅައިފަ. އެކަމާ ގުޅޭގޮތުން ބޯޑުގެ ބައްދަލުވުމެއް މިއަދު ބާއްވަން ވަނީ ހަމަޖެހިފައި،" އާސިމް ވިދާޅުވި އެވެ.
އެ ބައްދަލުވުމުގައި ނިންމާ ނިންމުންތައް ހިއްސާކުރާނެ ކަމަށް އޭނާ ވިދާޅުވި އެވެ.
ނަމަވެސް، ރައީސްގެ އެ ހުށަހެޅުއްވުމާ ގުޅޭ އިތުރު ތަފްސީލެއް މިވަގުތު ދެވެން ނެތް ކަމަށް އާސިމް އިތުރަށް ވިދާޅުވި އެވެ.
ބަދަލު ގެންނަން ރައީސް ހުށަހަޅުއްވާފައިވަނީ ކޮން ކުންފުނިތަކަކަށް ކަމެއް އަދި ސާފު ނުވި ނަމަވެސް، އޭގެ ތެރޭގައި ސަރުކާރު ހިއްސާވާ އެންމެ ބޮޑެތި ކުންފުނިތައް ހިމެނޭކަން "އަދަދު"އަށް ވަނީ އެނގިފަ އެވެ.
އެފަދަ ބަދަލުތަކެއް ގެންނަން ރައީސް ހުށަހަޅުއްވާފައިވާކަން ރައީސް އޮފީހުގެ ތަރުޖަމާނު މަބްރޫކް އަޒީޒް "އަދަދު"އަށް ޔަގީންކޮށްދެއްވި އެވެ.
ނަމަވެސް، ޕީސީބީ މެދުވެރިކޮށް ކުންފުނިތަކަށް ގެންނަ ބަދަލުތައް އާންމުކޮށް ހާމަކުރަނީ އެ ބޯޑުންކަމަށްވާތީ އިތުރު ތަފްސީލެއް މަބްރޫކް ވެސް ނުދެއްވި އެވެ.
ސަރުކާރުގެ ކުންފުނިތަކުގެ އިސް ވެރިން ބަދަލުކުރަން ރައީސް ސޯލިހު ހުށަހަޅުއްވާފައިމިވަނީ، އެޕްރީލް މަހު ބާއްވާ އެމްޑީޕީގެ އެތެރޭގެ އިންތިހާބާ ދިމާކޮށް ދައުލަތުގެ މަގާމުތަކުގައި ތިބި އެމްޑީޕީގެ މެންބަރުން ވަޒީފާއިން ވަކިކުރާ ކަމަށް އެ ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ތުހުމަތު ކުރައްވާފައިވަނިކޮށެވެ.
އެމްޑީޕީ ގައުމީ މަޖިލީހުގެ ވަޓްސްއަޕް ގްރޫޕަށް ނަޝީދު ފޮނުއްވި މެސެޖެއްގައި ވިދާޅުވީ ގާނޫނުއަސާސީން ރައީސަށް ލިބިދޭ ބާރުތައް ބޭނުން ކުރައްވަނީ "ވަރަށް ސިޔާސީކޮށް" ކަމަށެވެ.
އެގޮތަށް ހައްދަވާނަމަ، ނަޝީދު ވެސް މަގާމުން ވަކިކުރުމަށް ރައީސް ސޯލިހަށް ދަންނަވާ ކަމަށް އެމަނިކުފާނު ވިދާޅުވި އެވެ.
"ރައީސުލްޖުމްހޫރިއްޔާ ގާނޫނުއަސާސީގެ 115 ވަނަ މާއްދާ މި ބޭނުން ކުރައްވަނީ ވަރަށް ސިޔާސީކޮށް. ރައީސުލްޖުމްހޫރިއްޔާއަށް ދަންނަވަން؛ އެމްޑީޕީގެ އެތެރޭގެ އިންތިހާބާ ދިމާކޮށް ޕާޓީއިން މަގާމުތަކުގައި ތިއްބަވާ ބޭފުޅުން ވަކިކޮށްގެން ނުވާނެ. ވަކިކުރާ ނަމަ އަޅުގަނޑުވެސް ވަކި ކުރައްވާ،" އެ ގްރޫޕުގައި ނަޝީދު ވިދާޅުވި އެވެ.
އަންނަ އޭޕްރީލް މަހު ބާއްވަން ހަމަޖެހިފައިވާ އެމްޑީޕީގެ ޗެއާޕާސަންގެ އިންތިހާބުގެ ފޯރި ގަދަވެ، ޕާޓީގެ ތެރޭގައި އޮތް ވާދަވެރިކަން ވަނީ ހޫނުވެފަ އެވެ.
އެ މަގާމަށް އިކޮނޮމިކް މިނިސްޓަރު ފައްޔާޒް އިސްމާއިލް ވާދަކުރައްވަނީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީއާ އެވެ.
އިންތިހާބަށް ދެ ބޭފުޅުން ވެސް މިހާރު ކެމްޕޭން ފަށާފައިވާއިރު، ފައްޔާޒަށް ރައީސް ސޯލިހު ތާއީދުކުރައްވާއިރު، އިމްތިޔާޒް ފަހުމީގެ ފަހަތުގައި ހުންނެވީ ނަޝީދެވެ.
