އދ.، އެމެރިކާ (ފެބްރުއަރީ 28) - ރަޝިއާއަށް ޔޫކްރެއިންގެ ސިފައިން އަރައިގެން ދެމުންދާ ހަމަލާތަކުގެ މައްސަލަ މަޝްވަރާ ކުރަން އދ. ގެ އާއްމު މަޖިލީހުގެ ކުއްލި ބައްދަލުވުމެއް ބާއްވަން ސަލާމަތީ މަޖިލީހުން ފާސްކޮށްފި އެވެ.
އެ ބައްދަލުވުން އޮންނާނީ ހޯމަ ދުވަހު އެވެ. އެއީ އދ. ގެ މެމްބަރު 193 ގައުމަށް ޔޫކްރެއިން މައްސަލައިގައި ހިޔާލު ފާޅުކުރަން ލިބޭނެ މުހިއްމު ފުރުސަތެކެވެ.
ޑިޕްލޮމެޓުން ބުނާ ގޮތުގައި ހޯމަ ދުވަހު ބާއްވާ އާއްމު މަޖިލީހުގެ ކުއްލި ޖަލްސާއަކީ އދ. ގެ ތާރީހުގައި ބާއްވާ އެފަދަ 11 ވަނަ ޖަލްސާ އެވެ. އެ ބައްދަލުވުން އޮންނާނީ ރާއްޖެ ގަޑިން މިއަދު ހަވީރު 05:30 ގަ އެވެ. ބެލެވޭ ގޮތުގައި ގިނަ ވަގުތުތަކެއް ވަންދެން ބައްދަލުވުން މެދުނުކެނޑި ކުރިއަށް ދާނެ އެވެ.
އދ. ގެ އާއްމު މަޖިލީހުގެ ރިޔާސަތު ބަލަހައްޓަވާ ރާއްޖޭގެ ފޮރިން މިނިސްޓަރު އަބްދުﷲ ޝާހިދު ރޭ ދަންވަރު ކުރެއްވި ޓްވީޓެއްގައި ބަޔާނެއް އާއްމުކުރައްވައި ވިދާޅުވީ އާއްމު މަޖިލީހުގެ ކުއްލި ބައްދަލުވުމަކަށް ސަލާމަތީ މަޖިލީހުން އެދިފައިވާ ކަމަށެވެ.
ސަލާމަތީ މަޖިލީހުގެ މެމްބަރު ގައުމުތަކުގެ ތެރެއިން އާއްމު މަޖިލީހުގެ ކުއްލި ބައްދަލުވުމަކާ ދެކޮޅަށް ވޯޓު ދިނީ ރަޝިއާއިންނެވެ. ނަމަވެސް އާއްމު މަޖިލީހުގެ ކުއްލި ބައްދަލުވުމަކަށް ދިޔުން ވީޓޯ ކުރުމުގެ ބާރެއް ރަޝިއާއަކަށް ނުލިބެ އެވެ.
ސަލާމަތީ މަޖިލީހުން ފާސްކޮށްގެން އާއްމު މަޖިލީހުގެ ބައްދަލުވުމެއް ބޭއްވުމަށް ތަންދެނީ 1950 ވަނަ އަހަރުގެ "ސުލްހައަށް އެއްބައިވުމުގެ" ގަރާރުގެ ދަށުންނެވެ.
އެ ގަރާރުގައި ބުނަނީ ސަލާމަތީ މަޖިލީހުގެ ފަސް ދާއިމީ މެމްބަރުން، ރަޝިއާ، އެމެރިކާ، އިނގިރޭސިވިލާތް، ފްރާންސް އަދި ޗައިނާއިން އެކުގައި ސުލްހަ ގާއިމްކުރަން ފެއިލްވެއްޖެ ނަމަ، އާއްމު މަޖިލީހުގެ ހާއްސަ ބައްދަލުވުމެއް ބޭއްވޭނެ ކަމަށެވެ.
މިދިޔަ ހުކުރު ދުވަހު ރަޝިއާއިން ވަނީ ޔޫކްރެއިނަށް އަރައި ދެމުންދާ ހަމަލާތައް ވަގުތުން ހުއްޓާލަން ގޮވާލައި ސަލާމަތީ މަޖިލީހަށް ހުށަހެޅި ގަރާރެއް ވީޓޯކޮށްފަ އެވެ. އެ ގަރާރަށް ތާއީދު ކުރީ އެ މަޖިލީހުގެ މެމްބަރު 15 ގައުމުގެ ތެރެއިން ނުވަ ގައުމެވެ. ވަކިކޮޅަކަށް ވޯޓު ނުދެނީ އިންޑިއާ، ޗައިނާ އަދި ޔޫއޭއީ އެވެ.
