ރަޝިޔާ އާއި ޔޫކްރެއިން ހަނގުރާމަ އާ ގުޅިގެން ރަޝިޔާ އާމެދު ފިޔަވަޅު އަޅައިފި ނަމަ އެ ގައުމުން ރާއްޖެ އަންނަ ޓޫރިސްޓުންގެ އަދަދަށް ވަރަށް ބޮޑު ނޭދެވޭ އަސަރެއް ކުރާނެ ކަމަށް ޓޫރިޒަމް މިނިސްޓްރީން ބުނެފި އެވެ.
ޓޫރިޒަމް މިނިސްޓްރީން ބުނި ގޮތުގައި މި ވަގުތު ވެސް ރާއްޖޭގައި ރަޝިޔާގެ އަށް ހާހެެއްހާ ޓޫރިސްޓުންނާއި ޔޫކްރެއިންގެ 750 ވަރަކަށް ޓޫރިސްޓުން ޗުއްޓީ ހޭދަކުރަމުން ގެންދެ އެވެ. މިހާރު ރާއްޖެ އަށް އެންމެ ގިނައިން ޓޫރިސްޓުން އަންނަ ގައުމަކީ ރަޝިޔާ އެވެ. އެއީ ރާއްޖެ އަންނަ ޓޫރިސްޓުންގެ 15.7 ޕަސެންޓެވެ. ޔޫކްރެއިން އަކީ އަށް ވަނަ އަށް ރާއްޖެ އަށް އެންމެ ގިނަ ޓޫރިސްޓުން އަންނަ ގައުމެވެ. އެއީ ތިން ޕަސެންޓެވެ.
"ޔޫކްރެއިން އިން އަންނަ ޓޫރިސްޓުންގެ އަދަދަށް ވަރަށް ބޮޑަށް އަސަރު ކޮށްފި، ރަޝިޔާ އިން އަދި ބަދަލެއް ފާހަގައެއް ނުކުރެވޭ، އެކަމަކު ފިޔަވަޅު އަޅައިފިއްޔާ ވަރަށް ބޮޑު އަސަރެއް ކުރާނެ ކަމަށް ބެލެވޭ،" ޓޫރިޒަމް މިނިސްޓްރީން މިއަދު ނެރުނު ބަޔާނުގައި ބުނެފައިވެ އެވެ.
ރަޝިއާގެ ސިފައިން ޔޫކްރެއިނަށް ފޮނުވައިގެން ދެމުންދާ ހަމަލާތަކާ ދެކޮޅަށް އދ. ސަލާމަތީ މަޖިލީހުންނާއި ދުނިޔޭގެ ބޮޑެތި ބާރުތަކުން ފިޔަވަޅު އެޅުމާމެދު އަންނަނީ މަޝްވަރާ ކުރަމުންނެވެ. ބައެއް ގައުމުތަކުން ވަނީ އެ ގައުމާ ދެކޮޅަށް ފިއްތުންތައް ކުރިމަތި ކޮށްފަ އެވެ.
ރާއްޖޭގެ އެކި ތަންތަނުގައި ޗުއްޓީ ހޭދަކުރަމުން ގެންދާ ރަޝިޔާގެ 600 މީހަކާއި ޔޫކްރެއިންގެ 106 މީހަކާ, މިހާރުގެ ހާލަތާ ގުޅިގެން ވާހަކަ ދައްކަމުން ގެންދާ ކަމަށް ޓޫރިޒަމް މިނިސްޓްރީން ބުނެ އެވެ.
ޓޫރިޒަމް މިނިސްޓްރީން ބުނީ ރަޝިޔާ ޔޫކްރެއިން ހަނގުރާމަ އާ ގުޅިގެން ރާއްޖޭގެ ޓޫރިޒަމަށް ކުރާ އަސަރުގެ މައުލޫމާތު ހޯދަމުން ގެންދާ ކަމަށާއި، މާދަމާ އާ ހަމައަށް އިތުރަށް މައުލޫމާތު ސާފުވާނެ ކަމަށެެވެ.
