ފައިސާ ދެއްކުމަށް ބޭނުން ކުރާ ބައިނަލްއަގްވާމީ ނިޒާމު، ސްވިފްޓުން ރަޝިއާގެ ބައެއް ބޭންކުތައް ވަކިކުރަން ޔޫރަޕިއަން ޔޫނިއަން (އީޔޫ) އާއި އެމެރިކާއިން އެއްބަސްވެއްޖެ އެވެ.
އޭގެ އިތުރުން ރަޝިއާގެ މަރުކަޒީ ބޭންކުގެ މުދާތައް ހިފަހައްޓަން ވެސް ވަނީ ނިންމާފަ އެވެ. އެއާ އެކު ރަޝިއާއިން ބޭރުގައި ހުރި އެ ގައުމުގެ މުދާ ބޭނުން ކުރަން ހުރަސްތަކާ ކުރިމަތިވާނެ އެވެ.
"އަމާޒަކީ ބައިނަލްއަގްވާމީ މާލީ ނިޒާމުގެ ތެރެއިން ރަޝިއާ އިތުރަށް އެކަހެރި ކުރުން،" އެމެރިކާ އާއި އީޔޫ ގުޅިގެން ނެރުނު ބަޔާނެއްގައި ބުންޏެވެ.
ރަޝިއާގެ ތެލާއި ގޭހުގެ އެކްސްޕޯޓާ ގުޅޭ ކަންކަމަށް ސްވިފްޓް ނިޒާމަށް ވަރަށް ބޮޑަށް ބަރޯސާވެ އެވެ.
މިއީ މިދިޔަ ބުރާސްފަތި ދުވަހު ރަޝިއާއިން ޔޫކްރެއިނަށް ހަމަލާ ދޭން ފެށުމުން މިހާތަނަށް އިއުލާނު ކުރި އެންމެ ހަރުކަށި ދަތިކުރުމުގެ ފިޔަވަޅެވެ.
ސްވިފްޓް ނުވަތަ ސޮސައިޓީ ފޯ ވޯލްޑްވައިޑް އިންޓަބޭންކް ފައިނޭންޝަލް ޓެލެކޮމިއުނިކޭޝަން އަކީ ފަސޭހަކަމާ އެކު ބޯޑަރު ހުރަސްކޮށް ފައިސާ ދައްކަން ބޭނުން ކުރާ ނިޒާމެކެވެ. އޭގެ ސަބަބުން ބައިނަލްއަގްވާމީ ވިޔަފާރިއަށް ފަސޭހަތައް ލިބެ އެވެ.
ބެލްޖިއަމްގައި ހުންނަ ސްވިފްޓް އޮފީހުން ދުނިޔޭގެ އެކި ހިސާބުތަކުގައިވާ 11،000 އަށް ވުރެ ގިނަ ބޭންކާއި މާލީ އިދާރާތަކުގެ މެދުގައި ފައިސާގެ މުއާމަލާތު ހިންގަން އެހީވެ އެވެ.
ދުނިޔޭގެ އިގްތިސާދު ހިންގުމުގައި މުހިއްމު ދައުރެއް ސްވިފްޓުން އަދާކުރި ނަމަވެސް، ދަތިކުރުމުގެ ފިޔަވަޅު އެޅުން ފަދަ ކަންކަން ނިންމުމުގެ ބާރު އެ ތަނަށް ލިބިގެންނެއް ނުވެ އެވެ.
"ސްވިފްޓުން ވަކިކުރުމުން އަސަރު ކުރާނެ ރަޝިއާގެ ބޭންކުތަކާއި މާލީ އިދާރާތަކަކީ މިހާރު ވެސް ބައިނަލްއަގްވާމީ ފިޔަވަޅުތައް އަމާޒުކޮށްފައިވާ ތަންތަން،" ޖަރުމަނުވިލާތުން ބުންޏެވެ.
ސްވިފްޓުން ބޭންކުތައް ވަކިކުރުމަކީ ހަރުކަށި ފިޔަވަޅެއްގެ ގޮތުގައި ގައުމުތަކުން ދެކެނީ އެއީ ގާތްގަނޑަކަށް ދުނިޔޭގެ ހުރިހާ ބޭންކަކުން ވެސް އެ ނިޒާމު ބޭނުން ކުރާތީ އެވެ.
ރަޝިއާގެ ބޭންކުތައް ސްވިފްޓުން ވަކިކުރަން ނިންމި ނިންމުމަށް އެމެރިކާ، އިނގިރޭސިވިލާތް، އީޔޫގެ އިތުރުން ކެނެޑާއިން ވެސް ތާއީދުކުރި އެވެ.
