ލަންޑަން (27 ފެބްރުއަރީ) - މިހާރު އޮތް ލިވަޕޫލްގެ ޓީމުގެ ވާހަކަ ތާރީހުގައި އޮންނަން ބޭނުންވަނީ ކާމިޔާބީތަކެއް ހޯދި ޓީމެއްގެ ގޮތުގައި ކަމަށް ލިވަޕޫލްގެ ކޯޗު ޔާގަން ކްލޮޕް ބުނެފި އެވެ.
އިނގިރޭސި ލީގު ކަޕްގެ ފައިނަލްގައި މިރޭ ޗެލްސީއާ ދެކޮޅަށް ލިވަޕޫލް ނުކުންނާނެ އެވެ. މިއީ 2015 ވަނަ އަހަރު ލިވަޕޫލްގެ ކޯޗުކަމާ ހަވާލުވި ކްލޮޕް އަށް، އެ ޓީމާއެކު އިތުރު ތައްޓެއް ކާމިޔާބުކުރުމަށް ލިބޭ ރަނގަޅު ފުރުސަތެކެވެ. ކްލޮޕް ވަނީ ލިވަޕޫލާ އެކު، އިނގިރޭސި ޕްރިމިއާ ލީގާއި ޗެމްޕިއަންސް ލީގު އަދި ފީފާ ކްލަބު ވޯލްޑް ކަޕްގެ ތަށި މީގެ ކުރިން އުފުލާލައިފަ އެވެ.
ކްލޮޕް, ލިވަޕޫލާ އެކު ރަނގަޅު ކާމިޔާބީތަކެއް ހޯދި ނަމަވެސް، އޭނާއާ އެކު ނާކާމިޔާބީގެ ހިތި ތަޖުރިބާ ވެސް ވަނީ ކޮށްފަ އެވެ. ލިވަޕޫލް ވަނީ ކްލޮޕް ހަވާލުވިތާ އަހަރެއް ވެސް ނުވަނިސް 2016 ވަނަ އަހަރު ލީގު ކަޕްގެ ފައިނަލާއި ޔޫރޮޕާ ލީގުގެ ފައިނަލުން ބަލިވެފަ އެވެ. އަދި 2018 ވަނަ އަހަރު ޗެމްޕިއަންްސް ލީގުގެ ފައިނަލްގައި ވެސް ލިވަޕޫލް ވަނީ ބަލިވެފަ އެވެ.
އެހެން ކަމުން، ތައްޓެއް ހޯދުމަށް ލިބޭ ފުރުސަތުތަކުގެ ބޭނުން ހިފުމަކީ މުހިންމު ކަމެއްގެ ގޮތުގައި ކްލޮޕް ވަނީ ފާހަގަކޮށްފަ އެވެ. އަދި ލިވަޕޫލާކީ ތަށި ހޯދުމަށް ލިބުނު ފުރުސަތުތައް ބޭކާރުކޮށްލި ޓީމެއްގެ ގޮތުގައި، ތާރީހުގައި ފާހަގަވާކަށް އޭނާ ބޭނުމެއް ނުވެ އެވެ.
"މީގެ 20 އަހަރު ފަހުން ވެސް މި ކްލަބުގެ ވާހަކަ މީހުން ދައްކާއިރު، ބުނާނެ މިއީ މޮޅު ޓީމެކޭ އެކަމަކު އެ ޓީމަށް އިތުުރު ކާމިޔާބީތައް ލިބެންޖެހޭ،" ކްލޮޕް ބުންޏެވެ. "އެހެންވީމަ، އަހަރަމެން އެބަޖެހޭ ވީހާ ވެސް ގިނަ ކާމިޔާބީތައް ހޯދަން. މި ފައިނަލަކީ އިތުރު ކާމިޔާބެއް ހޯދަން ލިބޭ ރަނގަޅު ފުރުސަތެއް."
ލީގު ކަޕްގެ މެޗުތަކުގައި އެންމެ ވަރުގަދަ ޓީމު ކްލޮޕް ބޭނުންނުކުރާ ކަމަށް ބުނެ، މީގެ ކުރިން އޭނާ އަށް ވަނީ ފާޑުކިއުންތައް އަމާޒުވެފަ އެވެ.
އެކަަމަކު ކްލޮޕް ބުނީ ސީޒަންގައި ގިނަ މެޗުތަކެއް ކައިރިކައިރީގައި ކުޅޭއިރު، އޭނާ ކޮންމެ މެޗަކަށް ވެސް ނެރެނީ އެ ވަގުތަކަށް ނެރެވެން އޮތް އެންމެ ރަނގަޅު ޓީމު ކަމަށެވެ. މިރޭގެ ފައިނަލުގައި ލިވަޕޫލުން ގޯލު ބެލެހެއްުޓުމުގެ ފުރުސަތު ދޭނީ ދެ ވަނަ ކީޕަރު ކޮއިމްހިން ކެލަހާ އަށެވެ. ކެލަހާ އަކީ ލިވަޕޫލަށް ލީގު ކަޕް ފައިނަލުން ޖާގަ ހޯދައިދިނުމުގައި އިސް ރޯލެއް ކުޅުނެވެ.
ފައިނަލް މެޗަށް ނުކުންނައިރު، ލިވަޕޫލްގެ ބްރެޒިލް ފޯވަޑް ރޮބާޓޯ ފިރްމީނިއޯ އަށް އަނިޔާގެ ސަބަބުން ނުކުޅެވޭނެ އެވެ. އަދި، ޕޯޗުގަލްގެ ފޯވަޑް ޑިއޯގޯ ޔޮޓާ ވެސް މިރޭގެ މެޗަށް އެއްކޮށް ފިޓުވާނެކަމުގެ ޔަގީންކަމެއް ނެތެވެ.
ވެމްބްލީ ސްޓޭޑިއަމްގައި މިރޭ ކުޅޭ ލީގު ކަޕް ފައިނަލް މެޗު ފަށާނީ ރާއްޖެ ގަޑިން 21:30 ގަ އެވެ.
