މަންޓާ އެއާއިން މި ހަފްތާ ތެރޭ އައްޑޫ ސިޓީއަށް ކުރަން ފެށި ދަތުރުތަކަށް މިހާތަނަށް ލިބެމުންދާ ތަރުހީބާއި ދޭތެރޭ ހިތްހަމަޖެހޭ ކަމަށް އެ އެއާލައިނުން ބުނެފި އެވެ.
މަންޓާ އެއާއިން މާލެއަށް ފަހު ރާއްޖޭގެ ދެން އެންމެ ބޮޑު އާބާދީއެއް އޮންނަ އައްޑޫ ސިޓީއަށް ދަތުރުތައް ފެށީ މިދިޔަ ބުރާސްފަތި ދުވަހު އެވެ. ހާއްސަ ޕްރޮމޯޝަނަކާއެކު އެ އެއާލައިނުން ދަތުރުތައް ފެށީ ކޮޅަކަށް އެންމެ ދަށް އަގެއްގެ ގޮތުގައި އިކޮނޮމީ ކުލާހުގައި 1،250 ރުފިޔާ އަށެވެ.
އެ ދަތުރުތަކަށް އަދި މާ ގިނަ ދުވަސްތަކެއް ނުވިނަމަވެސް މިހާތަނަށް ލިބެމުންދަނީ "އެވަރެޖް" ތަރުހީބެއް ކަމަށާއި އަދި އެ ލިބޭ ތަރުހީބާއި ދޭތެރޭ ހިތްހަމަޖެހޭ ކަމަށް އެ އެއާލައިނުގެ ޑެޕިއުޓީ ސީއީއޯ އަހުމަދު މައުމޫން "އަދަދު" އަށް ވިދާޅުވި އެވެ.
"އަދި ހަމަ އެވަރެޖް ތަރުހީބެއް ލިބެމުންދަނީ. އެއީ އަދި ދަތުރުތައް ފެށިތާ މާ ގިނަ ދުވަސްތަކެއް ނުވާތިވެ އާއި އެއްކޮށް އަދި އެހެން ސަބަބުތަކާހުރެ ވެސް ކަމަށް ބެލެވޭ،" މައުމޫން ވިދާޅުވި އެވެ.
އާދައިގެ ތަރުހީބެއް ލިބޭކަމަށް އެ އެއާލައިނުން ލަފާކުރީ އޮޕަރޭޝަންތައް ފެށިތާ ގިނަ ދުވަސްތަކެއް ނުވުމާއި، ދުވާލަކަށް އެއް ދަތުރު އެއް ގަޑިއެއްގައި އެ އެއާލައިނުން އަދި ކުރަމުންދާތީވެ ކަމަށް މައުމޫން ވިދާޅުވި އެވެ. އަދި އެކަންކަމަށް ބަލައި މިހާތަނަށް ލިބޭ ތަރުހީބާއި ދޭތެރޭ ހިތްހަމަޖެހޭކަމަށް އޭނާ ވިދާޅުވި އެވެ.
މައުމޫން އިތުރަށް ވިދާޅުވީ އަންނަ ހޮނިހިރު ދުވަހުން ފެށިގެން އެ އެއާލައިނުން އައްޑުއާއި ހުވަދު އަތޮޅުގެ ކާޑެއްދޫ އެއާޕޯޓާއި ދެމެދުގައި ވެސް "ލިންކު" ދަތުރުތައް ފަށާނެ ކަމަށެވެ.
އަދި ކުރިޔަށް އޮތްތަނުގައި ދަތުރުތައް އިތުރުކުރުމުގެ ވިސްނުމެއް އޮތް ނަމަވެސް އަދި އެކަމަށް ވަކި ގޮތެއް ނުނިންމާ ކަމަށް އޭނާ ވިދާޅުވި އެވެ. ނަމަވެސް ފަތުރުވެރިކަމުގެ ޕީކް ސީޒަން ފަދަ ތަރުހީބު އިތުރުވާނެ ކަމަށް ބެލެވޭ ދުވަސްތަކަށް ބަލައި އޮޕަރޭޝަންތައް އިތުރުކުރުމުގެ ވިސްނުމެއް އެބަ އޮތް ކަމަށް މައުމޫން ވިދާޅުވި އެވެ.
"ކާޑެއްދޫ ދަތުރުތައް ފަށާނެ އަންނަ ހޮނިހިރު ދުވަހު. ދެން ކުރިޔަށް އޮތްތަނުގައި ފްރީކުއެންސީ އިތުރުކުރަން ވިސްނާނެ. އެކަމަކު އަދި ވަކި ގޮތެއް ނުނިންމާ. އެއީ އޮޕަރޭޝަންތަކުގެ އާ ކޮޅު ވީމަ،" މައުމޫން ވިދާޅުވި އެވެ.
މަންޓާއިން އައްޑުއަށް މިހާރު ކުރަމުން ދަނީ ދުވާލަކަށް އެއް ދަތުރެވެ. އެދަތުރުތަކުގައި މަންޓާއިން ދަނީ އިކޮނޮމީ ކުލާހުގެ އިތުރުން އެހެން ދެ ކުލާހެއްގައި ދަތުރުކުރުމުގެ ފުރުސަތު ފަސެންޖަރުންނަށް ދެމުންނެވެ. އެގޮތުން އެ އެއާލައިނުގެ ކޮމްފަޓް ކުލާހުގައި 1،450 ރުފިޔާއަށް ކޮޅަކަށް ޓިކެޓެއް ވިއްކާއިރު ބިޒްނަސް ކުލާސް ނުވަތަ ސެފަޔާ ކުލާހުގެ އަގަކީ 1،850 ރުފިޔާއާއި 2،400 ރުފިޔާއާ ދެމެދުގެ އަގެކެވެ.
