ކުޅުދުއްފުށީ ސިޓީގައި ބާއްވަމުން އަންނަ އެންމެ ފޯރިގަދަ އެއް ފުޓްސަލް މުބާރާތް ކަމަށްވާ 'ޒިގްޒެގް އިންޓަ އޮފީސް ފުޓްސަލް ޓޯނަމެންޓް'ގެ ފައިނަލްގައި ދިރާގާއި އޫރިދޫގެ ކުރިމަތިލުމަކަށް ހިނގައްޖެ އެވެ.
ރާއްޖޭގައި މުއާސަލާތީ ހިދުމަތް ދެމުން ގެންދާ ވާދަވެރި ދެ ކުންފުނި ކަމަށްވާ އޫރިދޫ އާއި ދިރާގު, މުބާރާތުގެ ފައިނަލަށް ދަތުރުކޮށްފައިވާއިރު, މުބާރާތުގެ ފައިނަލްގައި ވާދަވެރިކަމާއި ފޯރި ވަނީ ދެ ގުނައަށް ބޮޑުވެފައި ކަމަށް އިންތިޒާމް ކުރާ ފަރާތުން މި ނޫހަށް ބުންޏެވެ.
އެ ސިޓީގެ ސަރުކާރު އަދި އަމިއްލަ އޮފީސްތަކުގެ މެދުގައި މި މުބާރާތް ބާއްވަނީ ކުޅިވަރު ކުރިއަރުވާ ޖަމިއްޔާއެއް ކަމަށްވާ 'ޒިގްޒެގް ފޯ ޔޫތު ލިންކޭޖް' އިންނެވެ.
ކޮންމެ އަހަރަކު ވަރަށް ފޯރިއާ އެކު ކުޅުދުއްފުށގީގައި ބާއްވަމުން އަންނަ, ފުޓްސަލް މުބާރާތް މި އަހަރު މި ބާއްވަނީ ކޮވިޑާ ގުޅިގެން އެއް އަހަރުގެ މެދުކަނޑުމަކަށްފަހު އެވެ. އެންމެފަހުން 2019 ވަނަ އަހަރު ބޭއްވި މުބާރާތުގެ ޗެމްޕިއަންކަން ހޯދާފައިވަނީ ދިރާގެވެ.
ސެމީ ފައިނަލްގެ މެޗް ދަގަނޑޭ ޝަރަފުވެރިކޮށް ދެނީ
މި އަހަރުގެ މުބާރާތުގެ ފައިނަލަށް ދިރާގު ދިޔައީ ރޭ ކުޅުނު ސެމީ ފައިނަލްގެ މެޗްގައި ކުޅުދުއްފުށީ ފޯޓް ލިމިޓެޑްގެ ޓީމް ހަ ލަނޑު, ފަސް ލަނޑުން ބަލިކޮށްގެންނެވެ. ދިރާގާ ވާދަވެރި, އުރީދޫ ފައިނަލަށް ދިޔައީ މުބާރާތުގެ ގަދަ ޓީމެއްގެ ގޮތުގައި ފާހަގަވި ކުޅުދުއްފުށީ ރީޖަނަލް ހޮސްޕިޓަލްގެ ޓީމް ހަ ލަނޑު, ދެ ލަނޑުން ބަލިކޮށްގެންނެވެ.
ރޭ ކުޅުނު ސެމީ ފައިނަލްގެ ދެ މެޗް ޝަރަފުވެރިކޮށް ދިނީ ރާއްޖޭގެ ފުޓްބޯޅަ ލެޖެންޑް, އަލީ އަޝްފާގު (ދަގަނޑޭ) އެވެ. މި މުބާރާތުގައި ޓީމްތަކަށް ރާއްޖޭގެ ނަން މަޝްހޫރު ބައެއް ފުޓްސަލް ކުޅުންތެރިން ވެސް ގެންގޮސްފައިވެ އެވެ.
ރޭގެ ސެމީ ފައިނަލްގެ މެޗްގައި އުރީދޫ އާއި ހޮސްޕިޓަލް ވާދަކުރަނީ
ޒިގްޒެގް އިންޓަ އޮފީސް ފުޓްސަލް ޓޯނަމެންޓްގެ ފައިނަލް މެޗް އޮންނާނީ މާދަމާ ރޭގެ 8:30ގަ އެވެ. އެ މެޗް ޝަރަފުވެރިކޮށް ދެއްވުމަށް ހަމަޖެހިފައިވަނީ މުބާރާތުގެ ޕްރިމިއަމް ސްޕޮންސާ އެސްޓީއޯގެ މެނޭޖިން ޑިރެކްޓަރު ހުސެއިން އަމްރު އެވެ.
މި މަހުގެ 15 ވަނަ ދުވަހު ފެށި މުބާރާތުގައި ކުޅުދުއްފުށީގެ އެކި އޮފީސްތަކާއި މުއައްސަސާތަކުން ޖުމްލަ 12 ޓީމެއް ބައިވެރިވި އެވެ.
ޒިގްޒެގްގެ އޮފިޝަލުން ދަގަނޑޭއާ އެކު
"މިއީ މި ސިޓީގައި މިގޮތަށް ބޭއްވޭ އެންމެ ބޮޑު ފުޓްސަލް މުބާރާތް, މި މުބާރާތަށް އޮފީސްތަކުން ވަރަށް ބޮޑު ހޭދައެއްކޮށް ދުރާލާ ތައްޔާރުވޭ," ޒިގްޒެގްގެ އޮފިޝަލަކު ބުންޏެވެ.
ޒިގްޒެގް ޖަމިއްޔާއިން ގެންދަނީ ކުޅުދުއްފުށީގައި މި މުބާރާތުގެ އިތުރުން ވެސް ކުޅިވަރުގެ ގިނަ މުބާރާތަކެއް ބާއްވަމުންނެވެ. އެގޮތުން, މި އަހަރަށް ވެސް އިތުރު މުބާރާތްތަކެއް އެ ޖަމިއްޔާއިން ވަނީ ތާވަލުކޮށްފަ އެވެ.
