ރައްކާތެރިކަމާ އެކު އިވެކުއޭޓް ކުރަން އެހީ ވާނެ ކަމަށް އެމެރިކާއިން ބުނުމުން، ގައުމުން ދޫކޮށް ދާން ބޭނުން ނުވާ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
"ހަނގުރާމަ މި އޮތީ މި ތަނުގައި. އަޅުގަނޑަށް ބޭނުންވަނީ ހަތިޔާރު. ފިލައިގެން ދާނެ މަގެއް ނޫން،" ޒެލެންސްކީ ވިދާޅުވި ކަމަށް އެސޯސިއޭޓެޑް ޕްރެސްއިން ރިޕޯޓުކުރި އެވެ.
ވޮޝިންޓަން ޕޯސްޓުން ވެސް އެމެރިކާ އާއި ޔޫކްރެއިންގެ އޮފިޝަލުންނާ ހަވާލަދީ ބުނީ އެމެރިކާ ސަރުކާރުން އޮތީ ރައްކާތެރިކަމާ އެކު ޒެލެންސްކީ ސަލާމަތް ކުރަން ތައްޔާރަށް ކަމަށެވެ.
މިދިޔަ ބުރާސްފަތި ދުވަހު ރަޝިއާއިން ޔޫކްރެއިނަށް ހަމަލާ ދޭން ފެށުމުން ޒެލެންސްކީ އަމަލު ކުރައްވަމުންދާ ގޮތަށް އެތައް ބަޔަކު ދަނީ ސޯޝަލް މީޑިއާގައި ތައުރީފުކޮށް، އެމަނިކުފާނަކީ ބަތަލެއްގެ ގޮތުގައި ސިފަކުރަމުންނެވެ.
ކުރިން ކޮމީޑިއަންއެއްގެ ގޮތުގައި އެކްޓް ކުރުމުގައި އުޅުއްވި ޒެލެންސްކީ ވިދާޅުވީ "ހަމަލާ ދޭއިރު ފެންނާނީ އަޅުގަނޑުމެންގެ މޫނުތައް" ކަމަށާއި "ފިލަން މަސައްކަތްކޮށް ބުރަކަށިތައް ނުދައްކާނެ" ކަމަށެވެ.
އޭގެ އިތުރުން ޒެލެންސްކީ ގައުމުން ފިއްލަވައިފި ކަމަށް ފެތުރުނު ހަބަރުތައް ދޮގުކުރުމުގެ ގޮތުން ހުކުރު ދުވަހުގެ ރޭ ވެރިރަށް ކިޔެވްގައި ސަރުކާރުގެ އެހެން ވެރިންނާ އެކު ނެންގެވި ވީޑިއޯއެއް ވެސް ސޯޝަލް މީޑިއާގައި ޕޯސްޓު ކުރެއްވި އެވެ.
"އަޅުގަނޑުމެން އެންމެން މި ތިބީ މި ތަނުގައި. އަދި ތިބޭނީ ވެސް މި ތަނުގައި."
