ލަންޑަން (ފެބްރުއަރީ 26) - މެންޗެސްޓާ ސިޓީ އަށް އިނގިރޭސި ޕްރިމިއާ ލީގުގެ ޗެމްޕިއަންކަން ލިބިއްޖެކަމަށް މިދިޔަ ޑިސެމްބަރު މަހުން ފެށިގެން ބުނަމުން އައީ މީޑިއާ އިން ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ޑިސެމްބަރާއި ޖެނުއަރީ ތެރޭގައި ސިޓީން ލީގުގެ އެއް ވަނައިގައި ވަނީ 11 ޕޮއިންޓާއި 13 ޕޮއިންޓަށް ވެސް ލީޑުފުޅާކޮށްފަ އެވެ. އެކަމަކު، ފާއިތުވި ހަފްތާތަކުގައި މެޗުތަކުގައި ނަތީޖާ ނުކުތް ގޮތަށް ބަލާއިރު، ސިޓީގެ ލީޑު މިހާރު ވަނީ ތިން ޕޮއިންޓަށް ކުޑަވެފަ އެވެ. ސިޓީ އެއް ވަނައިގައި އޮތީ 26 މެޗުން 63 ޕޮއިންޓާ އެކު އެވެ. ދެ ވަނައިގައި އޮތް ލިވަޕޫލަށް ވަނީ 26 މެޗުން 60 ޕޮއިންޓް ލިބިފަ އެވެ.
ލީގުގައި މިރޭ ސިޓީން އެވަޓަން ދަނޑުގައި މޮޅުވެއްޖެނަމަ ލީގުގެ އެއް ވަނައިގައި ސިޓީގެ ލީޑު ހަ ޕޮއިންޓަށް ފުޅާކުރެވޭނެ އެވެ. ދެ ވަނައިގައި އޮތް ލިވަޕޫލުން މި ހަފްތާގައި ޕްރިމިއާ ލީގު ނުކުޅޭނެ އެވެ. އެއީ އެ ޓީމުން ޗެލްސީއާ ދެކޮޅަށް ކުޅޭ ލީގު ކަޕް ފައިނަލް މެޗު މާދަމާރޭ އޮތުމުންނެވެ.
ގާޑިއޯލާ ބުނީ ލީގުގެ އެއް ވަނައިގައި ބޮޑު ލީޑެއް އޮތުމުން އެއީ ބޮޑު ކަމެއް ކަމަށް ހަދައިގެން އެ ވާހަކަ ދައްކަނީ މީޑިއާ އިން ކަމަށާއި އޭނާ އަބަދު ވެސް ވިސްނަނީ ކުރިއަށް އޮތް މެޗަށް ކަމަށެވެ. އަދި ވަކި ކަމެއް ޔަގީންނުވަނިސް އުފާފާޅުނުކުރާނެ ކަމަށް ވެސް ބުނެފައިވެ އެވެ.
"މި ވާހަކަ ވެސް ދައްކަން ޖެހޭ. ތި މީހުން (މީޑިއާ)ގެ ބަޔަކު އަހަރެމެންނަށް މިދިޔަ ޑިސެމްބަރު ނޫނީ ޖެނުއަރީގައި ވެސް ތަށި ދީފި. އެކަމަކު، އަހަންނެއް އެ ވާހަކަތަކުގެ އަޑެއް ނާހަން. ޕްރިމިއާ ލީގުގައި ފާއިތުވި އަހަރުތަކުގައި ކަންތައް ވެފައި އޮތްގޮތަށް ބަލާއިރު ލީޑެއް ގެއްލެން މާ ގިނަ ދުވަސްތަކެއް ނުނަގާނެކަން އެބަހުރި ފެންނަން،" ގާޑިއޯލާ ބުންޏެވެ.
"ލީޑެއް ހިފަހައްޓަން ކުރަން ޖެހޭ މަސައްކަތް އަހަރެމެން މީގެ ކުރިން ކޮށްފައި ވެސް އެބަހުރި. އެ ފަދަ ޗެލެންޖްތަކެއް މި ހުރީ. އަހަރެމެން ތައްޔާރު،"
ކޮންމެ ފަރަގެއްގައި ވިޔަސް ލީގުގެ އެއް ވަނަ މަގާމުގައި އޮންނަން ހިތްހަމަޖެހޭ ކަމަށާއި ބޭނުން ވަނީ ކުރިއަށް ހުރި މެޗުތަކުން މޮޅުވެ، ޓީމަށް ކާމިޔާބު ހޯދޭނެ ލެވަލަކަށް ކޮންފިޑެންސް މައްޗަށް ޖައްސާލުމަށް ކަމަށް ގާޑިއޯލާ ވަނީ ބުނެފަ އެވެ.
މިރޭގެ މެޗަށް ނުކުންނައިރު ސިޓީ އަށް އޮތް ހިތްހަމަޖެހުމަކީ ގަބްރިއެލް ޖީސޫސް އާއި ޖެކް ގްރީލިޝް އަށް ކުޅެވުމެވެ. އަނެއްކޮޅުން ފްރޭންކް ލަމްޕާޑްގެ ކޯޗުކަމުގައި ކުޅެމުން އަންނަ އެވަޓަން އަށް ވެސް ވަނީ ހިތްހަމަޖައްސައިލެވޭނެ ހަބަރުތަކެއް ލިބިފަ އެވެ. އެ ޓީމުގެ މުހިންމު ދެ ކުޅުންތެރިން ކަމަށްވާ އަބްދުﷲ ޑޮކޫރޭ އާއި ޑަމަރާއި ގްރޭ ވަނީ ފިޓްވެފަ އެވެ.
އެވަޓަންގެ ގުޑިސަން ޕާކުގައި މިރޭ ސިޓީއާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 22:30 ގަ އެވެ.
