ވޮޝިންޓަން، އެމެރިކާ (ފެބްރުއަރީ 24) - ރަޝިއާއިން ޔޫކްރެއިނަށް އަރައިގެން އުޅެނީ ވެރިރަށް ކިޔެވް ހިފައި، ސަރުކާރު ބަދަލު ކުރުމުގެ ބޭނުމުގައި ކަމަށް އެމެރިކާއިން ބުނެފި އެވެ.
އެމެރިކާގެ ދިފާއީ އޮފިޝަލަކު ވިދާޅުވީ ބުރާސްފަތި ދުވަހުގެ ފަތިހު ރަޝިއާއިން ހަމަލާ ދޭން ފެށުމަށް ފަހު ފުރަތަމަ ދެ ގަޑިއިރުގެ ތެރޭގައި 100 މިސައިލް ލޯންޗު ކުރި ކަމަށެވެ.
ނަން ހާމަނުކޮށް ވާހަކަދެއްކެވި އޮފިޝަކް ވިދާޅުވީ ހަމަލާގެ ފުރަތަމަ މަރުހަލާގެ އަމާޒަކީ މުހިއްމު ސިޓީތައް ހިފުން ކަމަށާއި ޕެންޓަގަންއިން ގަބޫލުކުރާ ގޮތުގައި އެއަށްފަހު ވެރިރަށް ކިޔެވް ވެސް ހިފާނެ ކަމަށެވެ.
"އެ މީހުންގެ ބޭނުމަކީ ސަރުކާރުގެ ބޯބުރިކޮށް، އެ މީހުންނަށް ކަމުދާ ވައްތަރެއްގެ ސަރުކާރެއް ވެރިކަމަށް ގެނައުން،" އޮފިޝަލް ވިދާޅުވި އެވެ.
ބޯޑަރު ހުރަސްކޮށް ރަޝިއާ ސިފައިން ޔޫކްރެއިނަށް އަރާފައިވާ ކަމަށް އޮފިޝަލް ވިދާޅުވި ނަމަވެސް، އެއީ ކިހާ އަދަދެއްގެ ސިފައިން ކަމެއް ހާމައެއް ނުކުރައްވަ އެވެ.
"އަޅުގަނޑުމެންނަށް މި ފެންނަނީ ގައުމެއް ފުރިހަމައަށް ހިފަން ކުރާ މަސައްކަތުގެ ފުރަތަމަ މަރުހަލާ."
"މިކަހަލަ ގޮތަކަށް އެއް ދައުލަތުން އަނެއް ދައުލަތަށް ހަމަލާދޭ މަންޒަރު ދެ ވަނަ ބޮޑު ހަނގުރާމައަށް ފަހު އަޅުގަނޑުމެންނަށް ނުފެނޭ. ހަމަ ޔަގީނުން ވެސް މި ޒާތުގެ މިހާ ބޮޑު ހަމަލާއެއް ނުފެނޭ."
ޔޫކްރެއިންގެ ތިން ދިމާލަކުން ރަޝިއާ ސިފައިން ކުރިއަށްދާ އިރު، އަމާޒަކީ އާބާދީ ގިނަ ތަންތަން ހިފުމެވެ.
އެންމެ ފުރަތަމަ ރަޝިއާ ސިފައިން ޔޫކްރެއިނަށް ވަނީ ރަޝިއާއިން ހިފައިގެން އުޅޭ ކްރައިމިއާއާ ދިމާލުންނެވެ. އެ ޔުނިޓުގެ މިސްރާބު ހުރީ ދެކުނުގައި އޮންނަ ހާސަން ސިޓީ އެވެ.
ރަޝިއާ ސިފައިންގެ ދެ ވަނަ ޔުނިޓު އެތެރެވީ ބެލަރޫސްގެ ބޯޑަރު ހުރަސްކޮށް އުތުރުންނެވެ. އެ މީހުންގެ ކުރިއަށް ދަނީ ކިޔެވްއާ ދިމާލަށެވެ.
ތިން ވަނަ ޔުނިޓު ޔޫކްރެއިނަށް ވަނީ އިރުއުތުރުން ހާރްކިވް ސިޓީ ހިފުމަށެވެ. އޮފިޝަލް ވިދާޅުވީ މިހާތަނަށް އެންމެ ބޮޑެތި ހަމަލާތައް ފެނުނީ ހާރްކިވް އިން ކަމަށެވެ.
އެހެން ނަމަވެސް ޔޫކްރެއިންގެ ހުޅަނގަށް ރަޝިއާ ސިފައިން ވަދެފައި ނުވާކަން އޮފިޝަލް ފާހަގަކުރެއްވި އެވެ. އޭގެ އިތުރުން ބްލެކް ސީއާ ދިމާލުން ޔޫކްރެއިންގެ ދެކުނުން ވެސް ހަމަލާއެއް ނުފެންނަ ކަމަށް ވިދާޅުވި އެވެ.
އޮފިޝަލް އިތުރަށް ވިދާޅުވީ ޔޫކްރެއިން ސިފައިންގެ ކޮމާންޑާއި ކޮންޓްރޯލް ފެސިލިޓީތަކާއި އާއްމު މުއާސަލާތާ ގުޅޭ ތަންތަނަށް އެއްވެސް ހަމަލާއެއް ދީފައި ނުވާ ކަމަށެވެ.
"އާއްމު މުއާސަލާތުގެ ހިދުމަތާއި މީޑިއާގެ ހިދުމަތް އަދިވެސް ލިބޭ އަދި އޮތީ އެކްޓިވްކޮށް."
ޔޫކްރެއިންގެ އަސްކަރިއްޔާއަށް މިހާތަނަށް ލިބުނީ ކިހާ ވަރެއްގެ ގެއްލުމެއް ކަމެއް އަންދާޒާ ކުރާކަށް ނޭނގެ އެވެ.
"އަޅުގަނޑުމެންނަށް ފެންނަ ގޮތުގައި އަސްކަރިއްޔާއިން ދަނީ އަމިއްލަ ދިފާއުގައި ނުކުމެ ހަނގުރާމަ ކުރަމުން."
ރަޝިއާގެ ވައިގެ އުޅަނދުތަކެއް ވައްޓާލި ކަމަށް ޔޫކްރެއިނުން ބުނި ނަމަވެސް، އެ ވާހަކަ ކަށަވަރު ނުކުރެވޭ ކަމަށް ޕެންޓަގަން އިން ބުނެ އެވެ.
