މަހްބޫބް އާލަމް ކިޔާ ބިދޭސީއެއްގެ މެޔަށާއި، ބަނޑަށާއި، އަތަށް ވަޅިއަކުން ހަމަލާދީ ޒަހަމްކޮށްލި މާރާމާރީގެ ތަހުގީގު ދޯހަޅިކަން ފާހަގަކޮށް، އެ މައްސަލަ ސާބިތު ނުވާ ކަަމަށް ކްރިމިނަލް ކޯޓުން އިއްޔެ ނިންމައިފި އެވެ.
އޭއެމްޑީސީ ކައިރީ ހުންނަ ބަންޑާރަ ހޮޓަލުގައި މަހްބޫބް އާލަމް އިންދާ، އޭނާގެ ގިރުވާނުގައި ހިފައިގެން ދަމާފައި ގެންގޮސް ހަ އިންޗީގެ ވަޅިއަކުން ހަމާލާދީ ހިންގި އެ މާރާމާރީއާ ގުޅިގެން ދައުވާ އުފުލާފައި ވަނީ ބަގްލަދޭޝް ރައްޔިތެއް ކަމަށްވާ ރުބެލް ހޮސެއިންގެ މައްޗަށެވެ.
ބިރު ދެއްކުމާއި ތޫނު އެއްޗެހި ގެންގުޅުން މަނާ ކުރާ ގާނޫނުގެ ދަށުން އޭނާގެ މައްޗަށް ތޫނު ހަތިޔާރެއް ބޭނުންކޮށްގެން މާރާމާރީ ހިންގި ކަމުގެ ދައުވާ އޭޕްރީލް 26، 2019 ގައި އުފުލި އެވެ.
އެ މައްސަލަ ކްރިމިނަލް ކޯޓަށް ހުށަހެޅުނުތާ ތިން އަހަރުވާން ކައިރިވެފައި ވަނިކޮށް، ގާޒީ ހުސައިން ފާއިޒް ރަޝާދު އިއްޔެ ކުރެއްވި ހުކުމުގައި ވަނީ އެ މާރާމާރީ، ދައުވާ ލިބޭ ފަރާތާ ގުޅުވާލެވޭނެ އެއްވެސް ހެއްކެއް ތަހުގީގަށް ހޯދިފައި ނުވާކަން ވަރަށް ތަފްސީލުކޮށް ފާހަގަކުރައްވާފަ އެވެ.
އެ ގޮތުން އެ މާރާމާރީ ހިންގި ވަޅި ފުލުހުންގެ ބެލުމުގެ ދަށަށް ނަގާފައިވާއިރު، އޭގެން އެއްވެސް ފިންގާޕްރިންޓެއް ލިބުނުކަން ނުވަތަ ނޫން ކަންވެސް އެނގެން ނެތް ކަމަށް ގާޒީ ވިދާޅުވި އެވެ. އެ ވަޅިން ނެގި ޑީއެންއޭ ޕްރޮފައިލް އިން އަނިޔާ ލިބުނު ފަރާތުގެ ޑީއެންއޭ ލިބުނު އިރު، އެ ހަމަލާދިން މީހާއާ ގުޅުންހުރި އެއްވެސް ހެއްކެއް ފުލުހުންނަށް ހޯދިފައި ނުވާކަންވެސް ހުކުމުން އެނގެން އޮވެ އެވެ. އެހެންވެ، ހަތިޔާރު ބޭނުންކުރީ ދައުވާ ލިބޭ މީހާކަން ސާބިތު ނުވާ ކަމަށް ގާޒީ ކަނޑައެޅުއްވި އެވެ.
"...ކުށުގެ އަމަލާ ގުޅުންހުރި އެއްވެސް ތަނަކުން އަދި އެއްވެސް އެއްޗަކުން ދައުވާ ލިބޭ މުހައްމަދު ރުބެލް ހޮސެއިންއާ ގުޅޭ އެއްވެސް ފޮރިންސިކް ހެއްކެއް ލިބިފައިވާކަން އެނގޭކަށް ނެތެވެ،" ހުކުމުގައި ބުންޏެވެ.
އެ މާރާމާރީ ހިންގި ކަމަށް ތުހުމަތު ކުރާ ރޮބެލް އެދުވަހު ލައިގެން ހުރީ ހުދުކުލައިގެ ޓީޝާޓެއް ކަމަށާއި، އޭގައި ލޭ ހޭކިފައިވާ ކަމަށް ދައުލަތުން ބުނި ނަމަވެސް، އެ ޓީޝާޓުވެސް ހޯދިފައިނުވާ ކަމަށްވެސް ގާޒީ ވިދާޅުވި އެވެ. އެ ޓީޝާޓު ހޯދުނު ނަމަ، އޭގައި ހޭކިފައިވާ ލޭގެ ޑީއެންއޭ ތަހުލީލުކޮށް، އަނިޔާ ލިބުނު ފަރާތުގެ ޑީއެންއޭ ޕްރޮފައިލްއެއް ލިބުނު ނަމަ، މި މައްސަލަ ސާބިތުވުމުގެ ފުރުސަތު ބޮޑު ވާނެ އެވެ.
"މި މައްސަލާގައި ހާދިސާ ހިނގި މާލެ / މ. މޫންޑްރިޕްސް ގޭގައި ހިންގަމުންދާ ބާންޑާރަ ހޮޓަލުގައި ދައުވާ ލިބޭ މުހައްމަދު ރޮބެލް ހޮސެއިން ހުރި ހުރުން ފިޔަވައި ކުށުގެ އަމަލާ އޭނާއާ ގުޅުވާދޭނީ ކިހިނަކުންކަމެއް ދައުލަތަށް ސާބިތުކޮށްދެވިފައި ނުވޭ،" އެ ކުށުގެ އުންސުރުތައް ފުރިހަމަނުވާތީ، އެ މައްސަލަ ސާބިތު ނުވާ ކަމަށް ގާޒީ ފާއިޒް ނިންމެވި އެވެ.
ކިތާބީ އެ ހެކިތަކުގެ އިތުރުން އެ ހާދިސާ ހިނގިއިރު އެތަނުގައި ހުރި މީހެއް ކަމަށް ބުނެ، ދައުލަތުން ހުށަހެޅި ސިއްރު ހެކިވެރިޔާ ފުލުހަށް ދިން ބަޔާނާ، ޝަރީއަތުގައި ދެއްކި ވާހަކައިގައި ފުށުއެރުންތަކެއް ހުރި ކަމަށްވެސް ގާޒީ ވިދާޅުވި އެވެ.
އަދި އެމީހާއަށް އަނިޔާ ލިބުނު މީހާ ވަކިކުރަން ނޭނގޭ ކަމަށްވެސް އެ ނިންމުމުގައި ވެއެވެ. އަދި އެ ހާދިސާ ދިރާސާ ކުރުމުގެ ތެރެއިން، އޭނާ ރާއްޖެއަށް އެތެރެވެފައި ވަނީ ގާނޫނީ އިމުގެ ބޭރުން، ވަގު ޕާސްޕޯޓެއްގައިކަންވެސް ފާހަގަވެފައިވާ ކަމަށް ވެއެވެ.
އެ މައްސަލަ ސާބިތު ކުރެވުނު ނަމަ، 10 -15 އަހަރުގެ ހުކުމެއް ރޮބެލްގެ މައްޗަށް އަންނާނެ އެވެ.
