ލަންޑަން (ފެބްރުއަރީ 24) - ޓޮޓެންހަމް ހޮޓްސްޕާސްގެ މި ވަގުތުގެ ހާލަތު އޮތްގޮތުން އެ ކްލަބުން އޭނާ އަށް ދެމުން އަންނަ މުސާރަ ނަގަން ވެސް ބޭނުންނުވާ ކަމަށް ޓޮޓެންހަމްގެ ކޯޗު އެންޓޯނިއޯ ކޮންޓޭ ބުނެފި އެވެ.
އެންމެ ފަހުން ކުޅުނު ފަސް މެޗުގެ ތެރެއިން ޓޮޓެންހަމް ހަތަރު މެޗުން ވަނީ ބަލިވެފަ އެެވެ. މިދިޔަ ހޮނިހިރު ދުވަހުގެރޭ މެންޗެސްޓާ ސިޓީ ދަނޑުގައި ޓޮޓެންހަމް މޮޅުވި ނަމަވެސް ރޭ ވަނީ ރެލިގޭޝަން ޒޯނުގައި އޮތް ބާންލީ ދަނޑުގައި 1-0 އިން ބަލިވެފަ އެވެ. އެ މެޗަށް ފަހު ކޮންޓޭ ހުރީ ވަރަށް ބޮޑަށް މާޔޫސްވެފަ އެވެ.
މެޗަށް ފަހު އޮތް ނޫސްވެރިންގެ ބައްދަލުވުމުގައި މީޑިއާތަކުގެ ސުވާލުތަކަށް ހުޅުވާލުމުގެ ކުރިން ކޮންޓޭ ބުނީ ބާންލީ އަތުން ބަލިވި މެޗުގެ ވާހަކަ ދެއްކެން ނެތް ކަމަށެވެ. އަދި މި ވަގުތުގެ ހާލަތަކީ ޓޮޓެންހަމް މި އޮތީ އެންމެ ފަހުން ކުޅުނު ފަސް މެޗުގެ ތެރެއިން ހަތަރު މެޗުގައި ބަލިވެފައި ކަމަށެވެ.
"ބައެއް މީހުން އެބަ ވާހަކަ ދައްކާ އަހަރެމެން ގަަދަ ހަތަރެއްގެ ރޭހުގައި އޮތް ވާހަކަ. އެކަމަކު، އަހަންނަށް އެ ވާހަކަ ޝައުގުވެރިއެއް ނޫން. އެންމެ ފަހުން ކުޅުނު ފަސް މެޗުން ހަތަރު މެޗުން ވީ ބަލި. އަހަރެމެންގެ އެ ފޯމަށް ބަލާއިރު ރެލިގޭޝަންގެ ވާހަކަ ދެއްކުން ވެސް ރަނގަޅު. އެއީ ހަގީގަތަކީ،" ލީގުގެ އަށް ވަނައިގައި ޓޮޓެންހަމް އޮތް ނަމަވެސް އެ ޓީމުގެ ލެވަލް ދަށްކަމަށް ދޭހަކޮށް ކޮންޓޭ ބުންޏެވެ.
މިދިޔަ ނޮވެމްބަރު މަހު ޓޮޓެންހަމްގެ ކޯޗުކަމާ ހަވާލުވި ކޮންޓޭ ބުނީ އެ ކްލަބަށް އެންމެ ރަނގަޅު ކޯޗަކީ އޭނާ ކަމަށް ނުވެދާނެ ކަމަށެވެ. އެ ގޮތަށް ޓޮޓެންހަމް މެނޭޖްމަންޓަށް ގަބޫލުކުރެވިއްޖެނަމަ ޓީމު ދޫކޮށްލަން ތައްޔާރަށް ހުރި ކަމަށް ކޮންޓޭ ވަނީ ބުނެފަ އެވެ.
"މިހާރު މި އޮތް ހާލަތުގައި މި ފޯމުގައި މި ގޮތަށް ޓީމު ކުޅޭތީ އަހަރެން މުސާރަ ނަގަން ވެސް ބޭނުމެއް ނޫން،" ހިތްހަމަނުޖެހިފައި ހުރެ ކޮންޓޭ ބުންޏެވެ.
ކޮންޓޭ މިދިިޔަ ސީޒަނުގައި އިންޓަ އަށް 10 އަހަރު ތެރޭ ފުރަތަމަ ފަހަރަށް އިޓާލިއަން ލީގު ކާމިޔާބު ކޮށްދިނުމަށް ފަހު ކުއްލި ގޮތަކަށް އެ ޓީމު ދޫކޮށްލީ މެނޭޖްމަންޓާ އުފެދުނު ހިތްހަމަނުޖެހުންތަކަށް ފަހު އެވެ.
ޓޮޓެންހަމް މި ވަގުތު އިނގިރޭސި ޕްރިމިއާ ލީގުގެ އަށް ވަނައިގައި އޮތީ ހަތަރެއްގައި އޮތް މެންޗެސްޓާ ޔުނައިޓެޑަށް ވުރެ ދެ މެޗު މަދުން ކުޅެ، ހަތް ޕޮއިންޓް މަދުން ހޯދައިގެންނެވެ. ކޮންޓޭ ބުނީ ހާލަތު ބަދަލުކުރަން ޓޮޓެންހަމް އިން ކުރާ މަސައްކަތުގައި އެންމެން އެކުގައި ޒިންމާ ނަގަން ދަސްކުރަން ޖެހޭ ކަމަށެވެ.
