ހުޅަނގުގެ ގައުމުތަކުން ރަޝިއާއަށް ދެކޮޅަށް އެޅި ދަތިކުރުމުގެ ފިޔަވަޅިތަކުގެ އަސަރު ދުނިޔޭގެ މާކެޓަށް ކުރާނެ ކަމަށާއި ނަތީޖާއެއްގެ ގޮތުން އެމެރިކާ ރައްޔިތުންގެ ދިރިއުޅުމަށް ނޭދެވޭ ބަދަލުތަކެއް އަންނާނެ ކަމަށް ރަޝިއާއިން ބުނެފި އެވެ.
ރަޝިއާއިން އެމެރިކާއަށް ކަނޑައަޅާފައި ހުންނަ ސަފީރު އެނެޓޮލީ އެންޓޮނޯވް ވިދާޅުވީ ދަތިކުރުމުގެ ފިޔަވަޅު އަޅައިގެން ރަޝިއާގެ ހާރިޖީ ސިޔާސަތު ބަދަލު ނުކުރެވޭނެ ކަމަށާއި އެމެރިކާގެ ރައްޔިތުންނަށް ބޮޑެތި ގެއްލުންތަކެއް ވާނެ ކަމަށެވެ.
"އެއްވެސް ޝައްކެއް ނެތް ގޮތުގައި އަޅުގަނޑުމެންނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުގެ ނޭދެވޭ އަސަރު ދުނިޔޭގެ މާލީ އަދި ހަކަތައިގެ މާކެޓަށް ކުރާނެ."
އެންޓޮނޯވް އިންޒާރު ދެއްވި ގޮތުގައި އެމެރިކާގެ ރައްޔިތުންނަށް ބޮޑެތި ގެއްލުންތަކެއް ވާނެ ކަމަށް ބެލެވެނީ ދުނިޔޭގެ މާކެޓުގައި އަގުތައް އުފުލެން ފެށުމުން، އެމެރިކާގެ މާކެޓުގައި ވެސް ތަކެތީގެ އަގުތައް އުފުލޭނެތީ އެވެ.
އެނެލިސްޓުން ބުނާ ގޮތުގައި ރަޝިއާއާ ދެކޮޅަށް އަޅާ ދަތިކުރުމުގެ ފިޔަވަޅުތަކުގެ ސަބަބުން އެމެރިކާގެ އިގްތިސާދަށޤ ކުރާނެ ސީދާ ގެއްލުމަކީ ވަރަށް ކުޑަ މިންވަރެކެވެ. ނަމަވެސް ރައީސް ޖޯ ބައިޑެން ވެސް ވިދާޅުވެފައި ވަނީ ފިޔަވަޅު އެޅުމުން އެމެރިކާގައި ހަކަތައިގެ އަގުތައް އުފުލުން އެކަށީގެންވާ ކަމަށެވެ.
"އެމެރިކާގެ ރައްޔިތުންނަށް ވިސްނޭ ކަމަކީ ޑިމޮކްރަސީ އާއި މިނިވަންކަން ދިފާއު ކުރުމުގެ އަގެއްވާކަން. މިއީ އެއްވެސް ތަދަކާ ނުލައި ހާސިލް ކުރެވޭނެ ކަމަކަށް ހަދައި އޮޅުވާލައިގެން އަޅުގަނޑު ނޫޅޭނަން،" ބައިޑެން ވިދާޅުވި އެވެ.
ރަޝިއާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް
އެމެރިކާއިން އެޅި ފިޔަވަޅުތަކުގެ ދަށުން ހުޅަނގުގެ އެއްވެސް މާލީ އިދާރާއެއް މެދުވެރިކޮށް ރަޝިއާއަށް ފައިސާއެއް ނުލިބޭނެ އެވެ. އޭގެ އިތުރުން ރަޝިއާގެ "އެލީޓް" ފަރުދުންނަށް ވެސް ވަނީ ފިޔަވަޅު އަޅާފަ އެވެ.
އޭގެ ކުރިން އެމެރިކާއިން ވަނީ ޑޮނެސްކް އަދި ލުހާންސްކްގައި އެމެރިކާގެ އެއްވެސް ކުންފުންޏަކުން ވިޔަފާރި ކުރުން މަނާކޮށްފަ އެވެ.
އިނގިރޭސިވިލާތާއި އީޔޫއިން އެޅި ފިޔަވަޅުތަކުގެ ދަށުން ރަޝިއާގެ ބޭންކުތަކާއި ވަކިވަކި ބައެއް ފަރުދުންނަށް ވެސް އަސަރު ކުރާނެ އެވެ.
އެގޮތުން ލުހާންސްކް އާއި ޑޮނެސްކް މިނިވަން ދައުލަތްތަކެއްގެ ގޮތުގައި ބަލައިގަންނަ ވޯޓު ދިން ރަޝިއާގެ 351 ޕާލިމެންޓް މެމްބަތުންނަށް ޓާގެޓު ކުރާނެ އެވެ. އޭގެ އިތުރުން އެ ނިންމުމުގައި ބައިވެރިވުން ހިމެނޭ 27 ފަރުދުންނާއި އިދާރާ އާއި ކުންފުންޏަށް ވެސް ޓާގެޓް ކުރާނެ އެވެ.
އިނގިރޭސިވިލާތުން ރަޝިއާގެ ފަސް ބޭންކެއްގެ އެސެޓް ހިފަހައްޓާފައިވާ އިރު، ރަޝިއާގެ ތިން ބިލިއަނަރުންނަށް އިނގިރޭސިވިލާތަށް އެތެރެވުން މަނާވާނެ އެވެ. ކެނެޑާ، ޖަޕާން އަދި އޮސްޓްރޭލިއާއިން ވެސް އެޅީ އެފަދަ ފިޔަވަޅުތަކެވެ.
ޖަރުމަނުވިލާތާއި ރަޝިއާ ގުޅިގެން ހިންގާ ނޯޑް ސްޓްރީމް 2 ގޭސް ހޮޅީގެ މަސައްކަތް މެދުކަނޑާލާފައިވާ އިރު، ޔޫޜަޕަށް ބޭނުންވާ ގޭސް ހޯދަން ބަރޯސާވަނީ ރަޝިއާއަށެވެ. ދިހަ ބިލިއަން ޔޫރޯގެ އެ ޕްރޮޖެކްޓް ހުއްޓާލި އިރު، އޮތީ ގާތްގަނޑަކަށް އެއްކޮށް ނިމި ގޭސް ސަޕްލައި ކުރަން ތައްޔާރަށެވެ.
