ގެވެށި އަނިޔާ ކުރާތަން ކުއްޖަކަށް ދައްކައިގެން ނުވަތަ ފެނިގެން މިނިސްޓްރީއަށް ހުށަހަޅާ މައްސަލަތައް އަހަރުން އަހަރަށް އިތުރުވަމުންދާ ކަމަށް ޖެންޑާ މިނިސްޓްރީން ބުނެފި އެވެ.
ޖެންޑާގެ ތަފާސްހިސާބުތަކުން ދައްކާ ގޮތުން ފަސް އަހަރު ތެރޭ ޖުމްލަ 353 މައްސަލަ ހުށަހަޅާފައިވެ އެވެ. އެއީ 2017 އިން 2021 އަަށެވެ.
ކަންބޮޑުވާން ޖެހޭ ކަމަކީ މިދިޔަ ފަސް އަހަރު ތެރޭ އެއް އަހަރަށްވުރެ އަނެއް އަހަރު ހުށަހެޅޭ މިފަދަ މައްސަލަތައް އިތުރުވާ ކަމެވެ.
ޖެންޑާގެ ތަފާސްހިސާބު:
2017: ޖުމްލަ 47 މައްސަލަ، އޭގެ ތެރޭގައި ހިމެނެނީ 30 ފިރިހެން ކުދިންނާއި 17 އަންހެން ކުދިން.
2018: ޖުމްލަ 55 މައްސަލަ، އޭގެ ތެރޭގައި ހިމެނެނީ 28 ފިރިހެން ކުދިންނާއި 27 އަންހެން ކުދިން.
2019: ޖުމްލަ 47 މައްސަލަ، އޭގެ ތެރޭގައި ހިމެނެނީ 29 ފިރިހެން ކުދިންނާއި 36 އަންހެން ކުދިން.
2020: ޖުމްލަ 47 މައްސަލަ، އޭގެ ތެރޭގައި ހިމެނެނީ 55 ފިރިހެން ކުދިންނާއި 34 އަންހެން ކުދިން.
2021: ޖުމްލަ 47 މައްސަލަ، އޭގެ ތެރޭގައި ހިމެނެނީ 51 ފިރިހެން ކުދިންނާއި 46 އަންހެން ކުދިން.
ގެވެށި އަނިޔާ ލިބެމުންދާ ތަން ފެންނަ ކުދިންނަށް ވެސް ނޭދެވޭ އަސަރު ކުރޭ!
ގެވެށި އަނިޔާ ތަޖުރިބާކުރަން ޖެހުމުގެ ސަބަބުން އެފަދަ ކުދިންނަށް ދިރިއުޅުމަށް ތަފާތު އެތަކެއް ނޭދެވޭ އަސަރުތައް ކުރެ އެވެ. އޭގެ ތެރޭގައި ތަކުރާރުކޮށް ޒުވާބުކުރުން، ހަޅޭއްލެވުން، ވަކި މީހަކު ބޭނުންވާ ގޮތަށް ހުރިހާ ކަމެއް ހިފެހެއްޓުން، ބިރުދެއްކުން، މަރާލާނެ ކަމުގެ އިންޒާރުދިނުން ފަދަ ކަންކަން ހިމެނެ އެވެ.
ދިރާސާތަކުން ދައްކާ ގޮތުން ގެވެށިއަނިޔާގެ އަމަލުތައް ހިނގާ ގޭބިސީތަކުގައި ދިރިއުޅޭ ކުޑަކުދިންނަށް އަނިޔާ ލިބުމުގެ ފުރުސަތު 40 އިންސައްތަ އިތުރެވެ. ކުދިން ބޮޑެތިވަމުން އަންނައިރު އެކުދިންގެ މާހައުލުން ފެންނަ ކަންތައްތަކަކީ ސިކުނޑި ތަރައްގީވުމުގައި ވަރަށް ބޮޑު ދައުރެއް އަދާކުރާ ބައެކެވެ.
އާނިޔާވެރިކަން ފެންނަ ނުވަތަ އެ ބިރުވެރިކަން އިހްސާސްކުރެވޭ މާހައުލެއްގައި ބޮޑެތިވަމުން އަންނަ ކުދިންގެ ސިކުނޑީގައި އެ ކުދިންނަށް ފެންނަ ކަންތަކާ އެއާއެކު ކުރެވޭ އިހުސާސްތައް، އަބަދުގެ އަބަދަށް ހަރުލާފައި ހުރެ އެވެ.
މިކަމުގެ ސަބަބުން ކުދިންގެ ދިރިއުޅުމުގައި އެ ތަޖުރިބާތަކުގެ އަސަރު ފޯރަ އެވެ. ގެވެށި އަނިޔާގެ މާހައުލުގައި ކުދިންނަކީ ހަމައެކަނި އެ އަނިޔާތައް ފެންނަ ކުދިން ކަމުގައި ނުބެލެވެ އެވެ. އެކުދިންނަކީ އެ އަނިޔާ ލިބޭ މީހުންނެކޭ އެއްފަދައިން ގެވެށި އަނިޔާގެ ޝިކާރައަކަށް ވެފައިވާ ބައެކެވެ.
ގެވެށި އަނިޔާއަކީ ކޮންމެ ފަހަރަކު ސީދާ ކުޑަކުދިންނަށް އަމާޒުކުރެވޭ އަނިޔާއަށް ނުވި ނަމަވެސް ދިގުދެމިގެންދާ ނޭދެވޭ ޖިސްމާނީ އަނިޔާތަކެއް ލިބިގެންދާ ކަމެކެވެ. އޭގެ ތެރޭގައި އުޅެންޖެހުމަކީ އޭގެ ސަބަބުން ކުދިންގެ ސިކުނޑީގެ ހިނގުމަށް ވެސް ބަދަލު އަންނަ ކަމެކެވެ.
އެގޮތުން, އެންމެ ފާހަގަ ކުރެވެނީ ކުދިން ބޮޑުވަމުން އަންނަ އިރު އެންމެ މުހިންމު އެއްކަމެއް ކަމުގައިވާ މައިމީހާއާ އޮންނަ ގުޅުން ހީނަރުވުމެވެ. އެކަމުގެ ސަބަބުން ކުދިންނަށް އެކަނިވެރިކަން އިހްސާސް ކުރެވެ އެވެ.
ދިގުމުއްދަތަކަށް ދެމިގެންދާ އަސަރުތައް
ގެވެށި އަނިޔާގެ ޝިކާރައަކަށް ނުވިނަމަވެސް އެ އަނިޔާވެރިކަން ފެންނަ ދިރިއުޅުމުގެ ސަބަބުން ތަފާތު ނަފްސާނީ ބަލިތަކަށް ހުށަހެޅިގެންދެ އެވެ. އެގޮތުން މީހާގެ އުޅުމާއި އަހުލާގަށް އަންނަ ބަދަލުތަކާއި ދިގު މުއްދަތަކަށް ކުދިންގެ ވިސްނުމަށް އަންނަ ބަދަލުތައް ހިމެނެ އެވެ.
މި ހުރިހާ ނޭދެވޭ އަސަރުތަކުގެ ތެރެއިން ވެސް ކުދިންގެ ފަރާތުން އެންމެ އާންމުކޮށް ފެންނަނީ ނަފްސާނީ ބައްޔެވެ.
ގެވެށި އަނިޔާ ފެންނަ މާހައުލެއްގައި ބޮޑެތިވާ ކުދިންނަކީ އެކަމުގެ ސަބަބުން އަނިޔާ ލިބޭ މީހާއެކޭ އެއްގޮތަށް އެހީތެރިކަން ބޭނުންވާ ކުދިންނެވެ. ޖިސްމާނީ ގޮތުން އަނިޔާ ފެންނަން ނެތް ނަމަވެސް ނަފްސާނީ ގޮތުން ދިގުދެމިގެންދާ އަނިޔާ އެ ކުދިންނަށް ލިބެ އެވެ.
