ޒިއުރިކް (ފެބްރުއަރީ 23) - ރަޝިއާ އާއި ޔޫކްރެއިނާ ދެމެދު މިހާރު ހިނގަމުން އަންނަ ހަމަނުޖެހުންތަކުގައި ހައްލެއް ނުލިބި ދިގުލައިދާތީ އަންނަ މެއި މަހު ރަޝިއާގެ ޕީޓާސްބާގުގައި ކުޅެން ހަމަޖެހިފައި އޮތް ޔުއެފާ ޗެމްޕިއަންސް ލީގުގެ ފައިނަލް މެޗު އެހެން ދަނޑަކަށް ބަދަލުކުރުމުގެ މަޝްވަރާތައް ފަށާފައިވާ ކަމަށް ރިޕޯޓްތައް ބުނެފި އެވެ.
ޔޫކްރެއިން ސަރުކާރާ ވަކިވެގަނެގެން އުޅޭ ގްރޫޕްތަކުން ކޮންޓްރޯލް ކުރާ އެ ގައުމުގެ އިރުމަތީ ސަރަހައްދަށް ރަޝިއާ ސިފައިން އަރަން މިއަދުގެ ވަގުތެއްގައި ރަޝިއާގެ ރައީސް ލެޑިމިއަ ޕުޓިން ވަނީ އަމުރު ކުރައްވައިފަ އެވެ. އެހެންވެ، ޔޫރަޕްގެ ގިނަ ގައުމުތަކުން މިހާރު އޮތީ ހަނގުރާމައެއް ފަށައިފާނެ ކަމަށް ތައްޔާރީ ހާލަތުގަ އެވެ.
ޔުއެފާ އިން މިހާރު އަންނަނީ މި ދަނޑިވަޅުގައި ރަޝިއާ އާއި ޔޫކްރެއިންގައި ކުޅެން ހަމަޖެހިފައި އޮތް ހުރިހާ ފުޓްބޯޅަ މެޗުތަކެއް ފަސްކުރަމުންނެވެ. މި މަޝްވަރާތަކުގެ ތެރެއިން މިހާރު އަންނަނީ އަންނަ މެއި މަހު 28 ވަނަ ދުވަހު ރަޝިއާގެ ޕީޓާސްބާގުގައި ކުޅެން ޝެޑިއުލްކޮށްފައި އޮތް ޔުއެފާ ޗެމްޕިއަންސް ލީގުގެ ފައިނަލް މެޗު ފަސްކުރަން ވެސް ހުށަހަޅައިފަ އެވެ.
"ވަރަށް ގާތުން ބަލަމުން މި އަންނަނީ މިކަން ހިނގާގޮތް. މި ވަގުތަށް އަދި އޮތީ ޝެޑިއުލްގައި އޮތްގޮތަށް އެކަމަކު، ހާލަތު ގޯސްވަމުންދާނަމަ އަޅަންޖެހޭ ފިިިޔަވަޅެއް އަޅާނަން. ރައްކާތެރިކަން އެއީ އެންމެ މުހިންމު ކަންތައް،" ޔުއެފާގެ އޮފިޝަލަކު އިނގިރޭސި މީޑިއާ އަށް ބުނެފައިވެ އެވެ.
ޔޫރަޕްގެ ގިނަ ގައުމުތަކުން އަންނަނީ ޔޫކްރެއިނާއި ރަޝިއާއާ ދެމެދު މި ހިނގަމުން އަންނަ ކަންތައްތައް ކުއްވެރިކޮށްފަ އެވެ. މިހާރު އޮތްގޮތުން އަންނަ މަހު ކުޅެން އޮތް ފީފާ ވޯލްޑް ކަޕް ޕްލޭއޮފް މެޗުތަކާއި ޔުއެފާގެ މުބާރާތްތަކުގައި ރަޝިއާ އާއި ޔޫކްރެއިންގެ ޓީމުތަކުން ކުޅެން ޖެހޭ މެޗުތައް ރާވާނެ ގޮތެއް ހޯދަން ޔުއެފާގެ ކޮމްޕެޓިޝަން ޑިޕާޓްމަންޓުން އަންނަނީ ކްލަބްތަކާ ވާހަކަ ދައްކަމުންނެވެ.
