ޖެންޑާ އިކުއަލިޓީ އެކްޝަން ޕްލޭން ވަޒީރުންގެ މަޖިލީހުން މިއަދު ފާސްކުރައްވައިފި އެވެ.
މި އެކްޝަން ޕްލޭން އެކަށީގެންވާ ގޮތަށް ތަންފީޒުކޮށް މޮނިޓާކޮށް ލަފާއަރުވާ އަދި ޕޮލިސީ ލެވެލްގެ ނިންމުންތައް ނިންމުމަށް އެކުލަވާލި ނެޝަނަލް ސްޓިއަރިން ކޮމެޓީގެ ރިޔާސަތު ބަލަހައްޓަވާނީ ރައީސުލްޖުމްހޫރިއްޔާކަމުގައި ވެސް މިއަދު ކަނޑައަޅުއްވައިފަ އެވެ.
ވަޒީރުންގެ މަޖިލީހުން މިގޮތަށް ނިންމެވީ މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ވަޒީރުންގެ މަޖިލީހުގެ ބައްދަލުވުމުގައި ޖެންޑާ މިނިސްޓްރީން ހުށަހެޅި ކަރުދާހަށް ވަޒީރުންގެ މަޖިލީހުގައި މަޝްވަރާކުރެއްވުމަށް ފަހުގަ އެވެ.
ޖެންޑަރ އިކުއަލިޓީ އެކްޝަން ޕްލޭނަކީ ޖެންޑާ އިކުއަލިޓީ ގާނޫނުން ލާޒިމުކުރާ ކަންތައްތައް ތަންފީޒުކުރުމަށްޓަކައި ޖެންޑާ މިނިސްޓްރީން އެކުލަވާލާފައިވާ ފަސް އަހަރުގެ އެކްޝަން ޕްލޭނެކެވެ.
މި އެކްޝަން ޕްލޭން ތަންފީޒުކުރެވިގެންދާނީ ގިނަ އިދާރާތަކެއްގެ ބައިވެރިވުމާއެކުގަ އެވެ. އެގޮތުން, މި އެކްޝަން ޕްލޭން ތަންފީޒުކުރާ އެކި އިދާރާތަކާއި ޖަމުއިއްޔާ ޖަމާއަތްތަކާއި އަމިއްލަ ކުންފުނިތަކުގެ ފަންނީ އިސް މުވައްޒަފުން ހިމެނޭ ގޮތަށް ޓެކްނިކަލް ކޮމެޓީއެއް ވެސް އެކުލަވާލެވިގެންދާނެ ކަމަށް ރައީސް އޮފީހުން މައުލޫމާތުދެ އެވެ.
ޖެންޑާ އިކުއަލިޓީ ގާނޫނުގެ ދަށުން ނެޝަނަލް ޖެންޑާ އިކުއަލިޓީ ޕޮލިސީއެއް ވަނީ އެކުލަވާލާފަ އެވެ. ޖެންޑާ އިކުއަލިޓީ އެކްޝަން ޕްލޭނަކީ މި ސިޔާސަތު ނުވަތަ ޕޮލިސީ ތަންފީޒުކުރުމަށްޓަކައި އެކުލަވާލާފައިވާ އެކްޝަން ޕްލޭނެކެވެ.
ނެޝަނަލް ޖެންޑާ އިކުއަލިޓީ ޕޮލިސީގެ އަމާޒަކީ ހަމަހަމަ މުޖްތަމައެއް ބިނާކުރުމަށާއި އަންހެނުންނާއި ފިރިހެނުންނަށް ފުރުސަތުތަކަށް ވާސިލުވުމުގައި ހަމަހަމަކަމާއި އިންސާފު ހޯދައިދިނުމެވެ. އަދި ހުރިހާ އިދާރާތަކުގައި ޖެންޑާ މެއިންސްޓްރީމް ކުރުމަށް މި ސިޔާސަތުގައި ހިމަނާފައިވެ އެވެ.
