އިރުމަތީ ޔޫކްރެއިނުގައި ސަރުކާރާ ވަކިވެގަނެގެން އުޅޭ ގްރޫޕްތަކުން ކޮންޓްރޯލް ކުރާ ޑޮނެސްކް އަދި ލުހާންސްކް މިނިވަން ދައުލަތްތަކެއްގެ ގޮތުގައި ބަލައިގަންނަން ރަޝިއާއިން ނިންމީ ހޯމަ ދުވަހު އެވެ. މި ދެ ތަނަކީ 2014 ވަނަ އަހަރުގެ ހަމަނުޖެހުމުގައި ޔޫކްރެއިން ސަރުކާރާ ވަކިން، ދެ ޖުމްހޫރިއްޔަތު ހިންގަން ފެށި ދެ ތަނެވެ.
އެ ހަމަނުޖެހުމުގެ ސަބަބުން ޔޫކްރެއިން ސަރުކާރާއި ރަޝިއާއިން ތާއީދު ކުރާ ގްރޫޕްތަކާ ދެމެދު ހަމަލާ ބަދަލު ކުރުންތަކުގައި މިއަދާ ހަމައަށް 14،000 އަށް ވުރެ ގިނަ މީހުން މަރުވެއްޖެ އެވެ.
މައިން ކުރާ ފަރުބަދަތައް ވަށާލާފައިވާ ޑޮނެސްކް އަކީ ޔޫކްރެއިންގެ ޑޮންބާސް ސަރަހައްދުގެ މައި ސިޓީ އެވެ. ކުރިން ސްޓެލީނޯގެ ނަން ދީފައިވާ އެ ސިޓީއަކީ މައިން ކުރުން މައި ސިނާއަތަކަށް ހަދާފައިވާ ސިނާއީ މަރުކަޒެކެވެ. އޭގެ އިތުރުން ޔޫކްރެއިންގައި އެންމެ ގިނައިން ސްޓީލް އުފައްދަނީ ވެސް އެ ތަނުންނެވެ. އެ ތަނުގައި ދެ މިލިއަން މީހުން ދިރިއުޅެ އެވެ.
ޑޮނެސްކްގެ ރައީސް ޕުޝިލިން.
ލުހާންސްކް ނުވަތަ ކުރީގެ ނަމުން ނަމަ ވޮރޮޝިލޮވްގްރެޑް އަކީ 1.5 މިލިއަން މީހުން ދިރިއުޅޭ ތަނެކެވެ.
އެ ދެ ތަނަކީ ބްލެކް ސީގެ އުތުރު އައްސޭރި ފަށާ ދިމާލުން ރަޝިއާގެ ބޯޑަރާ ގުޅޭ ހިސާބުގައި އޮންނަ ދެ ތަނެވެ. އެއީ ކޯލް ގިނަ އަދަދަކަށް ހުރި ދެ ތަނެވެ. ރަޝިއާ ބަހުން ވާހަކަ ދެއްކުން އެ ތަނުގައި އާއްމުވީ ދެ ވަނަ ބޮޑު ހަނގުރާމައަށް ފަހު ކުރީގެ ސޯވިއެޓް ޔޫނިއަންގެ ޒަމާނުގައި ރަޝިއާގެ ގިނަ މަސައްކަތްތެރިން އެ ތަނަށް ފޮނުވާފައި ވާތީ އެވެ.
އެ ދެ ތަނުގައި ހަމަނުޖެހުން ބޮޑުވީ 2014 ވަނަ އަހަރު ރަޝިއާއިން ކްރިމިއާ ހިފައި، ރަޝިއާ ސަރުކާރުގެ ތާއީދާ އެކު އުޅޭ ގްރޫޕްތަކުން ޔޫކްރެއިން ސަރުކާރާ ދެކޮޅަށް ހަނގުރާމަ ފެށުމުންނެވެ.
އެ ދެ ތަން މިނިވަން ދައުލަތްތަކެއްގެ ގޮތުގައި އޭރު އިއުލާނު ކުރީ ރެފެރެންޑަމް ނުވަތަ ފެންނަ ނުފެންނަ ވޯޓަކަށް ގޮސްގެންނެވެ. ނަމަވެސް ބައިނަލްއަގްވާމީ މުޖުތަމައިން އެކަން ބަލައެއްނުގަނެވެ.
ޔޫކްރެއިނާއި ހުޅަނގުގެ ގައުމުތަކުން ބުނާ ގޮތުގައި އެ ހަމަނުޖެހުން އުފެއްދުމުގެ ފަހަތުގައި ވަނީ ރަޝިއާ އެވެ. އަދި ވަކިވެގަތް ގްރޫޕަށް އަސްކަރީ އެހީ ދިނީ ވެސް ރަޝިއާއިންނެވެ.
ލުހާންސްކްގެ ވެރިޔަކަށް ހުންނަ ލިއޮނިޑް.
ހޯމަ ދުވަހު ރަޝިއާގެ ރައީސް ލެޑިމިއަ ޕުޓިން ވިދާޅުވީ އެ ދެ ތަން މިނިވަން ދައުލަތްތަކެއްގެ ގޮތުގައި ބަލައިގަންނާނެ ކަމަށެވެ.
ޑޮންބާސް އަކީ ޔޫކްރެއިނާއި ރަޝިއާއާ ދެމެދުގައިވާ ސަގާފީ ވާދަވެރިކަމުގެ މައި ތަނެވެ. ރަޝިއާއިން ބުނާ ގޮތުގައި ޑޮންބާސް ނުވަތަ އިރުމަތީ ޔޫކްރެއިންގެ ބޮޑު ބަޔެއްގައި އުޅެނީ ރަޝިއާ ބަހުން ވާހަކަ ދައްކާ މީހުން ކަމަށާއި، ޔޫކްރެއިންގެ ގައުމިއްޔަތުން އެ ތަން ރައްކާތެރި ކުރަން ޖެހޭ ކަމަށެވެ.
އިރުމަތީ ޔޫކްރެއިންގެ މައްސަލަ ހައްލު ކުރަން 2015 ވަނަ އަހަރު މިސްކް އެގްރީމެންޓްތައް ހެދި އެވެ. ނަމަވެސް ޔޫކްރެއިނާއި ވަކިވެގަނެގެން އުޅޭ ގްރޫޕުން ވެސް ތުހުމަތު ކުރަނީ އެއާ ހިލާފުވި ކަމަށެވެ. އޭގެ ފަހުން ވެސް ސުލްހަ ގެންނަން ތަކުރާރުކޮށް ކުރި މަސައްކަތް ފެއިލްވީ، އެއްބަސްވުމާ ހިލާފުވާތީ އެވެ.
އެ ދެ ޖުމްހޫރިއްޔަތުން ވެސް ބޭނުން ވަނީ ފުރިހަމަ މިނިވަންކަމާ އެކު އުޅޭށެވެ. އަދި ކޮންމެ ތަނެއްގައި ވެސް ރައީސަކު ހުރެ އެވެ.
ޑޮނެސްކް ޕީޕަލްސް ރިޕަބްލިކްގެ ވެރިޔަކީ 2018 ވަނަ އަހަރު އިންތިހާބު ކުރި ޑެނިސް ޕުޝިލިން އެވެ. ލުހާންސްކްގެ ރައީސަކީ ލިއޮނިޑް ޕަޝެނިކް އެވެ. ނަމަވެސް ޔޫކްރެއިނުން އިންތިހާބު ވެސް އަދި ދެ ރައީސުން ވެސް ބަލައެއްނުގަނެ އެވެ.
