ޔޫކްރެއިން ސަރުކާރާ ވަކިވެގަނެގެން އުޅޭ ގްރޫޕްތަކުން ކޮންޓްރޯލް ކުރާ އެ ގައުމުގެ އިރުމަތީ ސަރަހައްދަށް ރަޝިއާ ސިފައިން އަރަން ރައީސް ލެޑިމިއަ ޕުޓިން އަމުރު ކުރައްވައިފި އެވެ.
ހޯމަ ދުވަހުގެ ރޭގެ ވަގުތެއްގައި ޕުޓިން ވަނީ އިރުމަތީ ޔޫކްރެއިންގެ ޑޮނެސްކް އަދި ލުހާންސްކް މިނިވަން ދައުލަތްތަކެއްގެ ގޮތުގައި ބަލައިގަންނަން ނިންމަވާފަ އެވެ.
ޕުޓިން ސޮއިކުރެއްވި ދެ ގަރާރެއްގެ ދަށުން އިރުމަތީ ޔޫކްރެއިންގެ އެ ދެ ސަރަހަދުގައި ރަޝިއާގެ ޑިފެންސް މިނިސްޓްރީން "ސުލްހަ ބެލެހެއްޓުމުގެ މަސައްކަތް" ކުރުމަށް އެންގެވި އެވެ.
ޔޫކްރެއިންގެ ދާހިލީ ހަމަނުޖެހުމުގެ ތެރެއިން ރަޝިއާއަށް ތާއީދު ކުރާ ގްރޫޕުތަކުން ޑޮނެސްކް އާއި ލުހާންސްކްގެ ކޮންޓްރޯލް ހޯދީ 2014 ވަނަ އަހަރު އެވެ.
ހަމަ އެ އަހަރު ރަޝިއާއިން ވަނީ ކްރިމިއާ ހިފައިފަ އެވެ. އޭގެ ފަހުން ހިނގަމުންދާ ހަމަނުޖެހުންތަކުގައި މިއަދާ ހަމައަށް 14،000 އަށް ވުރެ ގިނަ މީހުން މަރުވެފައިވެ އެވެ.
ރަޝިއާގެ ނިންމުމާ އެކު ގިނަ ގައުމުތަކެއްގެ ފާޑުކިޔުން ވަނީ އަމާޒުވެފަ އެވެ. އޭގެ އިތުރުން ރަޝިއާއާ ދެކޮޅަށް ދަތިކުރުމުގެ ފިޔަވަޅު އަޅާނެ ކަމުގެ އިންޒާރު އަނެއްކާވެސް ވަނީ ދީފަ އެވެ.
އެމެރިކާގެ ރައީސް ޖޯ ބައިޑެން އާއި ފްރާންސްގެ ރައީސް އިމޭނުއެލް މެކްރޯން އަދި ޖަރުމަނުވިލާތުގެ ޗާންސެލަރު އޯލާފް ޝޯލްޒް ފޯނު ކޯލްތަކަކަށް ފަހު ވިދާޅުވީ ރަޝިއާއަށް "ރައްދު ދޭނެ"
އެގޮތުން އެންމެ ފުރަތަމަ އިއުލާނު ކުރީ އެމެރިކާ އިންނެވެ. ވައިޓް ހައުސް އިން ބުނީ ޑޮނެސްކް އާއި ލުހާންސްކްގައި އެއްވެސް އިންވެސްޓްމަންޓެއް އަދި ވިޔަފާރިއެއް ކުރުން އެމެރިކާގެ ރައްޔިތުންނަށް މަނާ ވާނެ ކަމަށެވެ.
ފްރާންސްގެ ރައީސް އޮފީހުން ބުނީ ދަތިކުރުމުގެ ފިޔަވަޅު އަމާޒު ކުރާނެ ރަޝިއާގެ ކުންފުނިތަކާއި ފަރުދުންގެ ލިސްޓެއް އެކުލަވާލުމުގެ މަސައްކަތް ޔޫރަޕިއަން ޔޫނިއަން (އީޔޫ) އިން ކުރަމުންދާ ކަމަށެވެ.
ޔޫކްރެއިންގެ ރައީސް ވޮލޮޑިމިރް ޒެލެންސްކީ ގައުމީ ސަލާމަތީ މަޖިލީހުގެ ކުއްލި ބައްދަލުވުމެއް ވަނީ ބާއްވާފަ އެވެ. އެމަނިކުފާނު ވަރަށް އަވަހަށް ގައުމާ މުހާތަބު ކުރައްވާނެ ކަމަށް ބެލެވެ އެވެ.
ހޯމަ ދުވަހުގެ ރޭ ޕުޓިން ދެއްވި 65 މިނެޓުގެ ހިތާބެއްގައި ޔޫކްރެއިން ސިފަކުރެއްވީ ފެއިލްވެފައިވާ ދައުލަތެއް އަދި ހުޅަނގުގެ ގޮނޑިކޮއްކޮއެއްގެ ގޮތުގަ އެވެ.
"ވެރިރަށް ކިޔެވް ހިފައި، ގަދަކަމުން ބާރު ހޯދައިގެން ތިބި މީހުންނަށް އަޅުގަނޑުމެން މި ގޮވާލަނީ ވަގުތުން ވަގުތަށް އަސްކަރީ އޮޕަރޭޝަންތައް ނިމުމަކަށް ގެންނަން،" ޔޫކްރެއިން ސަރުކާރަށް އިޝާރާތް ކުރައްވަމުން ޕުޓިން ވިދާޅުވި އެވެ.
"އެހެން ނޫން ނަމަ، ހިނގާ ކޮންމެ ލޭ އޮހޮރުވުމެއްގެ ޒިންމާ ފުރިހަމައަށް އުފުލަން ޖެހޭނީ ޔޫކްރެއިންގައި ބާރުތައް ހޯދައިގެން ތިބި ފަރާތްތަކުން."
އިރުމަތީ ޔޫކްރެއިންގެ ސަރަހައްދުތައް މިނިވަން ދައުލަތްތަކެއްގެ ގޮތުގައި ބަލައިގަތުމާ އެކު ޔޫކްރެއިނަށް ސުލްހަ ގެނައުމަށް ރާވާފައި ހުރި ރޭވުމެއް ނިމުމަކަށް އައީ އެވެ.
