ކޮވިޑް-19 ހުއްޓުވުމަށް ހެލްތު ޕްރޮޓެކްޝަން އެޖެންސީން އަޅާފައިވާ ބައެއް ފިޔަވަޅުތަކަށް ބަދަލު ގެނެސް، މާލެއިން އެހެން ރަށްރަށަށް ފުރާއިރު ޕީސީއާރު ޓެސްޓު ހަދަންޖެހޭ ގޮތަށް އޮންނަ އުސޫލު އުވާލައި، ގިނަ މީހުން އެއްވުން ހުއްދަކޮށްފި އެވެ.
ޕީސީއާރު ޓެސްޓު ހެދުން އުވާލުމުގެ އިތުރުން މިރެއިން ފެށިގެން ގިނަ މީހުން އެއްވެގެން ހަފްލާ ބޭއްވުމާއި ކުޅިވަރު މުބާރާތްތައް ބެލުމަށް ވެސް ވަދެވޭނެ ކަމަށް އެޗްޕީއޭއިން ނެރުނު ބަޔާނެއްގައި ބުނެފައިވެ އެވެ.
ގިނަ މީހުން އެއްވެގެން ހަފްލާތައް ބޭއްވުން ހުއްދަ ކުރި ނަމަވެސް އެފަދަ ހަރަކާތްތައް ކުރިއަށްގެންދަންވާނީ އެޗްޕީއޭއިން ނެރެފައިވާ ގައިޑްލައިންތަކާ އެއްގޮތަށް ކަމަށް އެ އިއުލާނުގައި ބުނެފައިވެ އެވެ. އޭގެ ތެރޭގައި މާސްކު އެޅުން ހިމެނެ އެވެ.
ފުރުމުގެ ކުރިން ޕީސީއާރު ޓެސްޓު ހެދުން މަޖުބޫރުކޮށް، އެއްވެ އުޅުން މަނާ ކުރީ މިދިޔަ ޖެނުއަރީ 9، ގަ އެވެ. އެ ދުވަސްވަރު ކޮވިޑު ފެތުރޭ މިންވަރު އޮތީ ވަރަށް ބޮޑަށް ކޮންޓްރޯލުން ނެއްޓިފަ އެވެ. އަދި ފެތުރެމުންދިޔައީ، މިހާތަނަށް އެންމެ ހަލުވިކޮށް ގައިންގަޔަށް އަރާ ކަމަށް ފާހަގަވެފައިވާ ވޭރިއަންޓު އޮމިކްރޯން އެވެ.
ކޮވިޑް ފެތުރޭ މިންވަރު ގިނަވުމުގެ ސަބަބުން އެ ދުވަސްވަރު މާލޭގައި ސިލްސިލާކޮށް ބާއްވަމުންދިޔަ މަގުމަތީ ބާޒާރުތައް އެޗްޕީއޭއިން ހުއްޓުވި އެވެ. ނަމަވެސް އެކަން ހުއްޓުވީ ގައިޑްލައިންތަކަށް ނުބަލާ ބާޒާރުތައް ކުރިއަށްގެންދާތާ 12 ދުވަސް ހަމަވިފަހުންނެވެ.
