މިއުނިކް (ފެބްރުއަރީ 21) - ޖަރުމަނު ލީގުގައި ރޭ ގްރޮއިޓާ ފުރްތު އަތުން 4-1 އިން މޮޅުވެ، ބަޔާން މިއުނިކުން ހަ ޕޮއިންޓުގެ ލީޑު ދެމެހެއްޓިއިރު، ބޮރޫޝިއާ މުންޗެންގްލަޑްކެބް އަތުން ބޮރޫޝިއާ ޑޯޓްމަންޑް 6-0 އިން ބޮޑު މޮޅެއް ހޯދައިފި އެވެ.
ރޭގެ ނަތީޖާތަކަށް ފަހު ބަޔާން އެއް ވަނައިގައި އޮތީ 23 މެޗުން 55 ޕޮއިންޓާ އެކު އެވެ. ދެ ވަނައިގައި އޮތް ޑޯޓްމަންޑަށް 23 މެޗުން ވަނީ 49 ޕޮއިންޓް ލިބިފަ އެވެ. ތިން ވަނައިގައި އޮތް ބެޔާ ލެވަކޫސަނަށް ވަނީ 23 މެޗުން 41 ޕޮއިންޓް ލިބިފަ އެވެ. ރޭ ހާތާ ބާލިން 6-1 އިން ބަލިކުރި އާރްބީ ލައިޕްޒިގު ހަތަރު ވަނައިގައި އޮތީ 23 މެޗުން 37 ޕޮއިންޓް ހޯދައިގެންނެވެ.
ބަޔާން ސިއްސުވާލުމަށް ފަހު ރޭގެ މެޗުގެ 42 ވަނަ މިނިޓްގައި ގްރޮއިޓާ އިން ލީޑުނެގި އެވެ. ލީގުގެ ފުލުގައި އޮތް ގްރޮއިޓާ އަށް މި ލަނޑު ޖަހައިދިނީ ހިލޭ ޖެހުމަކުން ބްރަނިމީރް ގްރޯޓާ އެވެ. އޭނާ ޖެހި ބޯޅަ ގޯލަށް ވަނީ ބަޔާން ކުޅުންތެރިއަކު ގައިގައި ޖެހިފަ އެވެ.
ބަޔާނުން ނަތީޖާ އަނބުރާލީ ދެ ވަނަ ހާފުގައި ހަތަރު ގޯލު ޖަހައިގެންނެވެ. ދެ ވަނަ ހާފްގެ ކުޅުން ފެށިގެން 30 ސިކުންތު ތެރޭގައި ބަޔާނަށް އެއްވަަރުކޮށްދިނީ ސާޖް ގްނަބްރީ ދިން ބޯޅައަކުން ރޮބަޓް ލެވަންޑޯސްކީ އެވެ.
މެޗުގެ 60 ވަނަ މިނިޓްގައި ބަޔާން ލީޑުނެގީ ގްރޮއިޓާގެ ސެބަސްޓިއަން ގްރީސްބެކް އަތުން ބައިކޮޅަށް ވަން ގޯލުންނެވެ. ބަޔާންގެ ކެޕްޓަން ތޯމަސް މުލާ ޖެހި ބާރު ބޯޅަ ގްރީސްބެކް ފައިގައި ޖެހިފައި ވަނީ ބައިކޮޅަށެވެ. މެޗުގެ 81 ވަނަ މިނިޓްގައި އޭރިއާތެރެއިން ބޮލުން ގޯލެއް ޖަހައި ލެވަންޑޯސްކީ ބަޔާންގެ ލީޑުފުޅާކޮށްދިނެވެ. މި މެޗުގެ ދެ ގޯލާ އެކު ލެވަންޑޯސްކީ ވަނީ މި ފަހަރު ލީގުގައި 28 ގޯލު ޖަހައިފަ އެވެ.
އިތުރު ވަގުތުގެ ފުރަތަމަ މިނިޓްގައި ބަޔާންގެ ހަތަރު ވަނަ ގޯލު ޖެހީ އެރިކް ޗުޕޯ މޯޓިން އެވެ. މި ގޯލު ޖަހަން ފުރުސަތު ތަނަވަސްކޮށްދިނީ ސާޖް ގްނަބްރީ އެވެ.
ރޭ މުންޗެންގްލަޑްބެކް ކައިރީގައި ޑޯޓްމަންޑުން ތަފާތު ދެއްކީ އެ ޓީމުގެ ކެޕްޓަން މާކޯ ރޮއިސް އެވެ. ރޮއިސް ވަނީ މި މެޗުގައި ދެ ގޯލު ޖަހައި، ތިން ގޯލު ޖަހަން ފުރުސަތު ތަނަވަަސްކޮށްދީފަ އެވެ. ކުރިން މުންޗެންގްލަޑްބެކަށް ކުޅުނު ރޮއިސް އޭނާގެ ކުރީގެ ކްލަބް ކޮޅަށް މިހާތަނަށް ވަނީ ޖުމްލަ އެއްކޮށް 11 ގޯލު ޖަަހައިފަ އެވެ.
ޑޯޓްމަންޑްގެ އަނެއް ގޯލުތައް ޖެހީ މެރިއަސް ވުލްފް، ޔޫސެފް މޫކޯކޯ، ޑޮންޔެލް މާލެން އަދި އެމްރޭ ޗާން އެވެ. އަނިޔާގެ ސަބަބުން ޑޯޓްމަންޑްގެ އެއް ވަނަ ފޯވާޑް އާލިން ބްރައުޓް ހާލަންޑް ހުރީ ކުޅުމާ ދުރުގަ އެވެ.
