އިރުމަތީ ޔޫކްރެއިނަށް ސުލްހަ ގެންނަން މަސައްކަތް ކުރާނެ ކަމަށް ފްރާންސްގެ ރައީސް އިމޭނުއެލް މެކްރޯން އާއި ރަޝިއާގެ ރައީސް ލެޑިމިއަ ޕުޓިން އެއްބަސްވެވަޑައިގެންފި އެވެ.
އާދީއްތަ ދުވަހު ދެ ލީޑަރުން ވަނީ 105 މިނެޓު ވަންދެން ފޯނު މެދުވެރިކޮށް މަޝްވަރާ ކުރައްވާފަ އެވެ. ދެ ލީޑަރުން ވެސް އެއްބަސްވެވަޑައިގެންނެވީ ޔޫކްރެއިން މައްސަލައަށް ޑިޕްލޮމެޓިކް ހައްލެއް ބޭނުންނާ ކަމަށެވެ.
ފްރާންސުން ބުނީ އެ ގައުމުގެ ފޮރިން މިނިސްޓަރު ޖޯން ޔްވެސް ލެ ޑްރިއަން އާއި ރަޝިއާގެ ފޮރިން މިނިސްޓަރު ސާގެއި ލެވްރޯވް ވެސް ވަރަށް އަވަހަށް ބައްދަލުވުމެއް ބާއްވަވާނެ ކަމަށެވެ.
ޕުޓިން އާއި މެކްރޯން ވެސް ވިދާޅުވީ އިރުމަތީ ޔޫކްރެއިނުގައި ފައުޖުތައް ބޮޑު ކުރިމަތިލުމަކަށް ތައްޔާރުވެފައިވާ ހިސާބަށް ސުލްހަ ގެނައުމަށް މަސައްކަތް ކުރައްވާނެ ކަމަށެވެ.
އެގޮތުން ޔޫކްރެއިނާއި ރަޝިއާ އަދި އޯގަނައިޒޭޝަން ފޯ ސެކިއުރިޓީ އެންޑް ކޯޕަރޭޝަން އިން ޔޫރަޕް (އޯސީއެސްއީ) ގެ ބައްދަލުވުމެއް ވަރަށް އަވަހަށް ބޭއްވޭތޯ ދަނީ މަސައްކަތް ކުރަމުންނެވެ.
މެކްރޯންގެ އޮފީހުން ބުނީ ކުރިއަށް އޮތް ދުވަސްތަކުގައި ހަރުދަނާ ޑިޕްލޮމެޓިކް މަސައްކަތްތަކެއް ކުރެވޭނެ ކަމަށާއި ގިނަ މަޝްވަރާތައް ކުރިއަށް ދާނީ ފްރާންސްގެ ވެރިރަށް ޕެރިހުގައި ކަމަށެވެ.
އޭގެ އިތުރުން 2014 ވަނަ އަހަރު އިރުމަތީ ޔޫކްރެއިނަށް ސުލްހަ ގެންނަން އެކުލަވާލި މިންސްކް ޕްރޮޓޮކޯލް ތަންފީޒު ކުރުމާ ގުޅޭ ގޮތުން ރަޝިއާ، ޔޫކްރެއިން، ފްރާންސް އަދި ޖަރުމަނުވިލާތުގެ މަޝްވަރާތައް ފަށަން ވެސް ދެ ލީޑަރުން އެއްބަސްވެވަޑައިގެންނެވި އެވެ.
އިރުމަތީ ޔޫކްރެއިންގެ ޑޮނެސްކް އަދި ލުހާންސްކް އަކީ ރަޝިއާއިން ތާއީދު ކުރާ ގްރޫޕުތަކުން އަމިއްލަ ޖުމްހޫރިއްޔަތުތަކެއް ހިންގާ ތަންތަނެވެ.
ހުކުރު ދުވަހު ޑޮނެސްކް އާއި ލުހާންސްކްގެ ވެރިން ވިދާޅުވީ ޔޫކްރެއިން ސިފައިން އެ ހިސާބުތަކަށް ދޭ ހަމަލާތައް ވަރުގަދަކޮށްފައި ވާތީ ރައްޔިތުން އިވެކުއޭޓް ކުރަން ނިންމާފައިވާ ކަމަށެވެ.
އިރުމަތީ ޔޫކްރެއިންގައި ހަމަނުޖެހުން ބޮޑުވީ 2014 ވަނަ އަހަރު ރަޝިއާއަށް ތާއީދު ކުރާ ގްރޫޕްތަކުން ސަރުކާރާ ވަކިވެގަތުމުންނެވެ. އެ ފަހަރު ރަޝިއާއިން ވަނީ ޔޫކްރެއިންގެ ކްރިމިއާ ސަރަހައްދު ހިފާފަ އެވެ. އޭގެ ފަހުން ހަމަލާ ބަދަލުކުރުންތަކުގައި 14،000 އަށް ވުރެ ގިނަ މީހުން މަރުވެފައިވެ އެވެ.
ޔޫކްރެއިން ސަރުކާރުން މީގެ ކުރިން ބުނީ އިރުމަތީ ހިސާބުތަކަށް ހަމަލާއެއް ދޭން ނޫޅޭ ކަމަށެވެ. ފޮރިން މިނިސްޓަރު ޑިމީޓްރޯ ކުލޭބާ ވިދާޅުވީ "ރަޝިއާއިން ފަތުރަނީ ދޮގު ހަބަރުތަކެއް" ކަމަށެވެ.
