މާލެ ފިޔަވައި އެހެން ރަށްރަށުގެ ބަންޑާރަ ގޯތި ފިޔަވައި، މަސައްކަތްތައް ކުރުމަށް ދޫކޮށްފައިވާ ބިންތަކުގެ އެންމެ ކުޑަ ކުލި ކަނޑައަޅާނީ އެރަށެއްގެ ކައުންސިލަކުން ކަމަށް ކަނޑައަޅައި ކަމާ ގުޅޭ ގަވާއިދު މިއަދު އިސްލާހުކޮށްފި އެވެ.
އެ އިސްލާހު ގެނެސްފައި ވަނީ ބިން ދޫކުރުމުގައި ބިމާ ބެހޭ ކަންކަން ބަލަހައްޓަން ހަވާލުކޮށްފައިވާ ސަރުކާރުގެ މިނިސްޓްރީއަށް ލިބޭ ބާރުތަކެއް އުވާލައި "ދިރިއުޅުން ނޫން ބޭނުންތަކަށް ބިން ދޫކުރުމާ ބެހޭ ގަވައިދު" ގެ ނުވަ ވަނަ މާއްދާއަށެވެ.
އެ ގަވާއިދު ހަތަރު ވަނަ ފަހަރަށް އިސްލާހުކޮށް އަލުން ގެޒެޓް ކޮށްފައިވާއިރު އޭގައި ބުނީ އެކި ބޭނުންތަކަށް ދޫކުރާ ބިންތަކުގެ އެންމެ ކުޑަ ކުލި ކަނޑައަޅާނީ އެރަށެއްގެ ކައުންސިލުންނެވެ. ގަވާއިދުގައިވާ ގޮތުން ކުލި ކަނޑައެޅުމުގައި ބަލަންޖެހޭނީ ތަނަވަސްކަމަށާއި އިގްތިސޯދީ ފުދުންތެރިކަމަށް އަދި ބިމުގެ ޑިމާންޑަށެވެ.
އެ ގަވައިދުގައި ބުނާ ގޮތުން އަގު ކަނޑައަޅާއިރު އެރަށެއްގެ ނުވަތަ އެ ސިޓީއެއްގެ ލޭންޑް ޔޫސް ޕްލޭންގައި ކަނޑައަޅާފައިވާ އަގުތަކަށް ރިއާޔަތްކުރަންޖެހެ އެވެ. އަދި އެ އަގުތައް ކޮންމެ ދެ އަހަރަކުން އެއް އަހަރު މުރާޖައު ކުރަންޖެހޭ ކަމަށް ވެސް ގަވާއިދަށް ގެނައި އިސްލާހުގައި ބުނެފައިވެ އެވެ.
ދޫކުރާ ބިންތަކުގެ ކުލި ތަފާތު ކުރުމުގެ އިހުތިޔާރު ކައުންސިލްތަކަށް ލިބޭ ނަމަވެސް ފަތުރުވެރިކަމަށް ދޫކުރާ ބިންތައް ދޫކުރަން ޖެހޭނީ ދިވެހިރާއްޖޭގެ ޓޫރިޒަމާ ބެހޭ ގާނޫނުގައި ކަނޑައަޅައިފައިވާ ގޮތަށެވެ.
