އިރުމަތީ ޔޫކްރެއިންގެ ރައްޔިތުން އިވެކުއޭޓް ކުރަން ފެށުމާ އެކު ޔޫކްރެއިނާ ގުޅޭ ބޯޑަރު ކައިރީގައި އޮންނަ ރަޝިއާގެ ސަރަހައްދުގައި ކުއްލި ނުރައްކަލުގެ ހާލަތު އިއުލާނުކޮށްފި އެވެ.
އިރުމަތީ ޔޫކްރެއިންގެ ޑޮނެސްކް އަދި ލުހާންސްކް އަކީ ރަޝިއާއިން ތާއީދު ކުރާ ގްރޫޕުތަކުން އަމިއްލަ ޖުމްހޫރިއްޔަތުތަކެއް ހިންގާ ތަންތަނެވެ.
ހުކުރު ދުވަހު ޑޮނެސްކް އާއި ލުހާންސްކްގެ ވެރިން ވިދާޅުވީ ޔޫކްރެއިން ސިފައިން އެ ހިސާބުތަކަށް ދޭ ހަމަލާތައް ވަރުގަދަކޮށްފައި ވާތީ ރައްޔިތުން އިވެކުއޭޓް ކުރަން ނިންމާފައިވާ ކަމަށެވެ.
ރަޝިއާގެ ރޮސްޓޮވް ސަރަހައްދުގެ ގަވަރުނަރު ވަސިލީ ގޮލުބޭވް ވިދާޅުވީ ގިނަ ބަޔަކު ބޯޑަރު ހުރަސްކޮށް ރަޝިއާއަށް އެތެރެވަމުން ދާތީ، ކުއްލި ނުރައްކާ އިއުލާނުކޮށްފައިވާ ކަމަށެވެ.
އިރުމަތީ ޔޫކްރެއިންގައި ހަމަނުޖެހުން ބޮޑުވީ 2014 ވަނަ އަހަރު ރަޝިއާއަށް ތާއީދު ކުރާ ގްރޫޕްތަކުން ސަރުކާރާ ވަކިވެގަތުމުންނެވެ. އެ ފަހަރު ރަޝިއާއިން ވަނީ ޔޫކްރެއިންގެ ކްރިމިއާ ސަރަހައްދު ހިފާފަ އެވެ. އޭގެ ފަހުން ހަމަލާ ބަދަލުކުރުންތަކުގައި 14،000 އަށް ވުރެ ގިނަ މީހުން މަރުވެފައިވެ އެވެ.
ރަޝިއާގެ އެމެޖެންސީޒް މިނިސްޓްރީން ބުނީ ޔޫކްރެއިނުން އެތެރެވާ މީހުންނަށް އެހީވުމަށް ހިންގާ އޮޕަރޭޝަނުގައި 400 މުވައްޒަފުންނާއި 150 އުޅަނދު ބޭނުން ކުރަމުންދާ ކަމަށެވެ.
ޑޮނެސްކްގެ އެމެޖެންސީ ހިދުމަތުން ހޮނިހިރު ދުވަހުގެ ހެނދުނު ބުނީ މިހާތަނަށް 6،600 މީހުން އިވެކުއޭޓްކޮށްފައިވާ ކަމަށެވެ. ރަޝިއާއިން ބުނީ އެ މީހުންނަށް ސިއްހީ އަދި ނަފްސާނީ އެހީ ފޯރުކޮށްދޭނެ ކަމަށެވެ.
ލުހާންސްކްގެ ކަމާ ބެހޭ އިދާރާތަކުން ބުނީ 25،000 އަށް ވުރެ ގިނަ މީހުން އަމިއްލައަށް ބޯޑަރު ހުރަސްކޮށްފައިވާ ކަމަށާއި އިތުރު 10،000 މީހުންނަށް ބޯޑަރު ހުރަސްކުރަން އެހީވަމުންދާ ކަމަށެވެ.
ރަޝިއާގެ ރައީސް ލެޑިމިއަ ޕުޓިން ހުކުރު ދުވަހު ސަރުކާރަށް އެންގެވީ ބޯޑަރު ހުރަސް ކުރާ ކޮންމެ މީހަކަށް 100 ޔޫރޯ ނުވަތަ 10،000 ރޫބަލް ދިނުމަށެވެ. އިވެކުއޭޓް ކުރާ މީހުންނަށް ހާއްސަ ރެފިއުޖީ ކޭމްޕުތައް އަޅަން ވެސް ޕުޓިން ވަނީ އަމުރު ކުރައްވާފަ އެވެ.
ޔޫކްރެއިން ސަރުކާރުން މީގެ ކުރިން ބުނީ އިރުމަތީ ހިސާބުތަކަށް ހަމަލާއެއް ދޭން ނޫޅޭ ކަމަށެވެ. ފޮރިން މިނިސްޓަރު ޑިމީޓްރޯ ކުލޭބާ ވިދާޅުވީ "ރަޝިއާއިން ފަތުރަނީ ދޮގު ހަބަރުތަކެއް" ކަމަށެވެ.
