ޔޫކްރެއިނަށް ސިފައިން ފޮނުވަން ރަޝިއާގެ ރައީސް ލެޑިމިއަ ޕުޓިން ނިންމަވައިފި ކަމަށާއި ކުޑަ ދުވަސްކޮޅެއްގެ ތެރޭގައި އެ މަންޒަރު ފެންނާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެ އެވެ.
ބައިޑެންގެ ވާހަކަ ބިނާކުރެއްވީ އެމެރިކާގެ ޖާސޫސީ މައުލޫމާތަށެވެ. އެމަނިކުފާނު ވިދާޅުވި ގޮތުގައި ރަޝިއާގެ ހަމަލާ ޔޫކްރެއިންގެ ވެރިރަށް ކިޔެވް އަށް އަމާޒު ކުރާނެ ކަމަށް ބެލެވެ އެވެ.
ޔޫކްރެއިން ހިފަން ނޫޅޭ ކަމަށް ރަޝިއާއިން ދަނީ ތަކުރާރުކޮށް ބުނަމުންނެވެ.
ހުޅަނގުގެ ގައުމުތަކުން ތުހުމަތު ކުރާ ގޮތުގައި ރަޝިއާއިން މަސައްކަތް ކުރަނީ ޔޫކްރެއިންގައި ސަރުކާރާ ވަކިވެގަނެގެން އުޅޭ ރަޝިއާއަށް ތާއީދު ކުރާ ގްރޫޕުތަކުން ކޮންޓްރޯލް ކުރާ އިރުމަތީ ހިސާބުތަކުގައި ބޮޑު ކާރިސާއެއް ހިނގާ ކަމަށް ދެއްކުމަށް ފަހު، ޔޫކްރެއިންގެ އެހެން ސަރަހައްދުތަކަށް އެރުމަށެވެ.
އެމެރިކާއިން ލަފާކުރާ ގޮތުގައި އިރުމަތީ ޔޫކްރެއިނާއި ބޯޑަރު ކައިރީގައި ރަޝިއާގެ 169،000 އާއި 190،000 އާ ދެމެދުގެ އަދަދަކަށް ސިފައިން ޖަމާވެފައި އެބަ ތިއްބެވެ.
އިރުމަތީ ޔޫކްރެއިންގެ ޑޮނެސްކް އަދި ލުހާންސްކް އަކީ ރަޝިއާއިން ތާއީދު ކުރާ ގްރޫޕުތަކުން އަމިއްލަ ޖުމްހޫރިއްޔަތުތަކެއް ހިންގާ ތަންތަނެވެ. އެމެރިކާއިން އަންދާޒާ ކުރި ސިފައިންގެ އަދަދުތަކުގެ ތެރޭގައި އެ ދެ ތަނުގައި ތިބި ފައުޖުތައް ވެސް ހިމެނެ އެވެ.
ހުކުރު ދުވަހު ޑޮނެސްކް އާއި ލުހާންސްކްގެ ވެރިން ވިދާޅުވީ ޔޫކްރެއިން ސިފައިން އެ ހިސާބުތަކަށް ދޭ ހަމަލާތައް ވަރުގަދަކޮށްފައި ވާތީ ރައްޔިތުން ރައްކާތެރި ހިސާބުތަކަށް ބަދަލުކުރަން ނިންމާފައިވާ ކަމަށެވެ. ރިޕޯޓުތައް ބުނާ ގޮތުން އިވެކުއޭޝަން ޒޯނެއްގެ ގޮތުގައި ރައްޔިތުން ގެންދާނީ ރަޝިއާ އަށެވެ.
ނަމަވެސް ޔޫކްރެއިނުން މީގެ ކުރިން ބުނީ އިރުމަތީ ހިސާބުތަކަށް ހަމަލާއެއް ދޭން ނޫޅޭ ކަމަށެވެ. ފޮރިން މިނިސްޓަރު ޑިމީޓްރޯ ކުލޭބާ ވިދާޅުވީ އެއީ "ރަޝިއާއިން ފަތުރާ ދޮގު ހަބަރުތަކެއް" ކަމަށެވެ.
ރަޝިއާ ސަރުކާރުން ބުނީ އިރުމަތީ ޔޫކްރެއިނުން އިވެކުއޭޓް ކުރާ މީހުންނަށް ހާއްސަ ރެފިއުޖީ ކޭމްޕުތައް އަޅަން ރައީސް ޕުޓިން އަމުރު ކުރައްވާފައިވާ ކަމަށެވެ.
