ދިވެހިރާއްޖޭގެ އަސްކަރިއްޔާގެ އިންޓެލިޖެންސް ސާވިސްގެ ޑިރެކްޓާ ޖެނެރަލްގެ މަގާމަށް ބްރިގޭޑިއާ ޖެނެރަލް އަބްދުﷲ ޒުހުރީ އައްޔަންކޮށްފި އެވެ.
ޒުހުރީ މިހާތަނަށް ހުންނެވީ ރިޔާސީ ގާޑުންގެ ކޮމާންޑަރަކަށެވެ. އޭގެ ކުރިން ފަޔާ އެންޑް ރެސްކިއު ސާވިސްގެ ކޮމާންޑަރަކަށް ވެސް ހުންނެވި އެވެ. އަދި ބްރިގޭޑިއާ ޖެނެރަލް އަހުމަދު ނިމާލްގެ ދަށުން މީގެ ކުރިން އިންޓެލިޖެންސް ސާވިސްގައި ވެސް މަސައްކަތް ކުރެއްވި އެވެ.
ޑިފެންސް އިންޓެލިޖެންސްގެ ޑިރެކްޓާ ޖެނެރަލްގެ މަގާމުގައި މީގެ ކުރިން ހުންނެވި ވައިސް ޗީފް އޮފް ޑިފެންސް ފޯމް ބްރިގޭޑިއާ ޖެނެރަލް އަބްދުއްރަހީމް އަބްދުއްލަތީފްގެ ބަދަލުގައި އެ މަގާމަށް ޒުހުރީ އައްޔަން ކުރީ މިދިޔަ މަހުކަން މި ނޫހަށް އެނގިފައިވެ އެވެ.
ސިފައިންގެ މީޑިއާ އޮފިސަރު ކެޕްޓަން ހަނާ މުހައްމަދު ވިދާޅުވީ ސިފައިންގެ މަގާމުތަކަށް އަންނަ ބަދަލުތަކުގެ ތަފްސީލަކީ ހާމަ ކުރާ މައުލޫމާތެއް ނޫން ކަމަށެވެ. އެހެންކަމުން އަސްކަރީ އިންޓެލިޖެންސްގެ ވެރިޔާ ބަދަލުވި ތާރީހު ސީދާ ކަށަވަރުވެފައެއް ނުވެ އެވެ.
"ވަކި ރޭންކެއްގެ މަގާމުތަކަކީ އަބަދުވެސް ބަދަލު ކުރެވެމުންދާ މަގާމްތައް. އެބޭފުޅުން ހޯއްދަވާ ތަމްރީނުތަކާއި ވަރަށް ބައިވަރު ކަންކަމަށް ބަލާފަ މި ބަދަލުތައް ގެންނާނީ. އެކަމަކު އެއީ އެއްވެސް އިރަކު ސިފައިން ހާމަކުރާ މައުލޫމާތެއް ނޫން،" ހަނާ ވިދާޅުވި އެވެ.
ސިފައިންގެ އިންޓެލިޖެންސްގެ ވެރިޔަކަށް އަބްދުއްރަހީމް އައްޔަން ކުރީ ކުރީގެ ރައީސް އަބްދުﷲ ޔާމީންގެ ވެރިކަމުގައި ޖެނުއަރީ، 2016 ގަ އެވެ. އެހެންކަމުން ޑިފެންސް އިންޓެލިޖެންސްގެ ވެރިޔާ މި ބަދަލުވީ ހަ އަހަރަށްފަހު އެވެ. ނަމަވެސް މިހާރު ވެސް ސިފައިންގެ ބައެއް އެހެން އިސް މަގާމުތައް އަބްދުއްރަހީމް ފުރުއްވަ އެވެ. އޭގެ ތެރޭގައި ސިފައިންގެ މާލީ ޒިންމާދާރު ވެރިޔާގެ މަގާމު ހިމެނެ އެވެ.
މީގެ 37 އަހަރު ކުރިން ފެބްރުއަރީ، 1985 ގައި ސިފައިންގެއަށް އެންލިސްޓު ކުރެއްވި އަބްދުއްރަހީމް، 57، އަށް ވަނީ ދައުލަތަށް ގިނަ ދުވަހު ހިދުމަތް ކުރުމުގެ އެވޯޑް މިދިޔަ އަހަރު ލިބިވަޑައިގެންފަ އެވެ. އެ މުއްދަތުގައި އަބްދުއްރަހީމް ވަނީ އަސްކަރީ ގިނަ ތަމްރީނުތަކެއް ހައްދަވައި، ސިފައިންގެއަށް މުހިންމު މަސައްކަތްތަކެއް ކުރައްވައިފަ އެވެ.
