މެންޗެސްޓާ (ފެބްރުއަރީ 19) - ޓޮޓެންހަމްގެ މުހިންމު ފޯވާޑް ހެރީ ކޭން ގަތުމަށް މެންޗެސްޓާ ސިޓީން ވަރަށް ބޮޑަށް މަސައްކަތްކުރި ކަމަށާއި އެކަމަކު، ޓޮޓެންހަމުން އޭނާ ވިއްކާލަން ބޭނުން ނުވީ ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
އިނގިރޭސި ޕްރިމިއާ ލީގުގައި މިރޭ މެންޗެސްޓާ ސިޓީ އާއި ޓޮޓެންހަމް ވާދަކުރާ މެޗުގެ ކުރިން އޮތް ނޫސްވެރިންގެ ބައްދަލުވުމުގައި އެންމެ ގިނަ ބަޔަކު ގާޑިއޯލާއާ ސުވާލުކޮށްފައިވަނީ ޓޮޓެންހަމްގެ ފޯވާޑް ކޭންއާ ބެހޭގޮތުން.
ކޭން އަކީ މި ސީޒަން ފެށުމުގެ ކުރިން ސިޓީން ގަންނަން އެންމެ ބޮޑަށް މަސައްކަތްކުރި ކުޅުންތެރިޔާ އެވެ. ކޭން ގަތުމަށް ތިން ފަހަރެއްގެ މަތިން ސިޓީން ބިޑް ކުރިކަމަށް ރިޕޯޓްތައް ބުނެ އެވެ. ސިޓީގެ ވާދަވެރި ކްލަބް މެންޗެސްޓާ ޔުނައިޓެޑުން ވެސް ކޭން ހޯދުމަށް ރޭހުގައި އޮތެވެ. އެކަމަކު، ޓޮޓެންހަމުން ސާބިތުވެތިބެ، ޓްރާންސްފާ މާކެޓް ނިންމާލީ ކޭން ކްލަބްގައި ބެހެއްޓުމުގައި ކާމިޔާބު ހޯދައިގެންނެެވެ.
"ކޭން ގަންނަން އަހަރުމެންނަށް އެތައް ފަހަރަކު މަސައްކަތް ކުރެވިއްޖެ. އެއް ފަހަރަކު ދެ ފަހަރަކު އެއް ނޫން. ހަތަރު ފަހަރަށް ވެސް މަސައްކަތް ކުރެވިއްޖެ. އެކަމަކު، ދެން ހިއެއް ނުވޭ ސިޓީން އެކަމާ އުޅޭނެހެން،" ގާޑިއޯލާ ބުންޏެވެ.
ގާޑިއޯލާ ބުނީ ކޭން ވިއްކާލަން ބޭނުންނުވީ ޓޮޓެންހަމުން ކަމަށާއި، ސިޓީން ކުރެވެން ހުރި ހުރިހާ މަސައްކަތެއް ކުރި ކަމަށެވެ. ގާޑިއޯލާ ބުނީ ކޭން ނުގަނެވުނު ކަމުގައި ވިޔަސް މިވަގުތު ސިޓީ އޮތީ އޭނާ ހިތްހަމަޖެހޭ ހަލާތުގައި ކަމަށެވެ.
ކޭން ނުގަނެވުމުން އޭރު ގާޑިއޯލާ އާއި ސިޓީގެ މެނޭޖްމަންޓާ ދެމެދު ހިތްހަމަނުޖެހުންތަކެއް ދިޔަކަށް ކުރިމަތިވި ކަމަށް މީޑިއާތަކުން ވަނީ ރިޕޯޓްކޮށްފަ އެވެ.
އެކަމާ ގުޅޭގޮތުން ގާޑިއޯލާ ބުނީ ކުލަބުގެ ބާރުގައި ހުންނަ ކަންކަން އަބަދުވެސް ކުލަބުން ކުރަމުން އަންނަ ކަމަށެވެ. ޓްރާންސްފާ މާކެޓްގައި ހިނގާ ގިނަ ކަންކަމަކީ ކްލަބަށް ބާރުފޯރުވޭ ވަރަށް ވުރެ އެހެން ބައެއްގެ ކޮންޓްރޯލްގައި އޮންނަ ކަމެއް ކަމަށްވާތީ ޓްރާންސްފާގައި ހިނގާ ކަންތައްތަކުގައި ކުލަބާ ދެމެދު ދެބަސްވުމެއް ނޯންނާނެ ކަމަށެވެ. އަދި ކަމެއް ދިމާވެއްޖެ ނަމަ ވާހަކަދައްކައިން ކަންކަން ހައްލުކުރެވޭނެ ގާބިލުކަން ސިޓީގެ ހުންނާނެ ކަމަށާއި އޭގެއާ ބެހޭ ހުރިހާ މައުލޫމާތަކީ މީޑިއާ އަށް ތިލަވާންޖެހޭ ކަންކަމެއް ނޫން ކަމަށް ގާޑިއޯލާ ވަނީ ބުނެފަ އެވެ.
މެންޗެސްޓާ ސިޓީން ނިމިދިޔަ ޖެނުއަރީ ޓްރާންސްފާގައި އެކުލަބަށް ގެނައި ކުޅުންތެރިއަކީ ރިވަ ޕްލޭޓްގެ ޒުވާން ފޯވާޑް ޖޫލިއަން އަލްވަރޭޒް އެވެ. މި ސީޒަންގެ ނިޔަލަށް ލޯން އެއްބަސްވުމެއްގެ ދަށުން އަލްވަރޭޒް ހުންނާނީ ރިވާ ޕްލޭޓްގަ އެވެ. އޭނާ އަކީ އާޖެންޓީނާ މީޑިއާ އިން ސިފަކުރާގޮތުގައި މުސްތަގުބަލުގައި އާޖެންޓީނާގެ އެއް ވަނަ ފޯވާޑެވެ.
ސިޓީ ދަނޑުގައި މިރޭ ޓޮޓެންހަމާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 22:30 ގަ އެވެ.
