މާލޭގައި މިހާރު ކުރިއަށްދާ އަންހެން ފުޓްބޯޅައިގެ ބައިނަލްއަގްވާމީ އެކުވެރިކަމުގެ މެޗުތަކުގެ ސިލްސިލާ ދެ ވަނަ މެޗުގައި ރާއްޖާގެ އަންހެން ގައުމީ ޓީމު އަތުން 4-0 ސީޝެލްސްގެ އަންހެން ޓީމު ތާރީހީ މޮޅެއް ހޯދައިފި އެވެ.
މިއީ ބައިނަލްއަގްވާމީ އަންހެން ފުޓްބޯޅައިގައި އެ ޓީމުގެ ފުރަތަމަ މޮޅެވެ. މި ވަގުތު ސީޝެލްސްގައި އަންހެން ފުޓްބޯޅަ ލީގެއް ނޯވެ އެވެ. އަދި ސީޝެލްސް އަކީ ފީފާ ރޭންކިންގަައި ހިމެނޭ ޓީމެއް ވެސް ނޫނެވެ. ސަބަބަކީ އެ ޓީމުން ފީފާ އެޕްރޫވްޑް މެޗެއް ކުޅެފައި ނުވުމެވެ. އެހެންކަމުން މި މެޗުން މޮޅުވުމަކީ އެގައުމުގެ އަންހެން ފުޓްބޯޅައިގެ ކުރިއެރުމަށް އެޅުނު ބޮޑު ފިޔަވަޅަކަށްވާނެ އެވެ.
ރާއްޖެ އާއި ސީޝެލްސް ވާދަކުރި ފުރަތަމަ ރާއްޖެ އިން ކާމިޔާބުކުރީ 1-0 އިންނެވެ. ފުރުތަމަ މެޗުން ރާއްޖެ މޮޅުވެފައިވުމުން ދެ ވަނަ މެޗަށް ސާބިއާގެ ކޯޗު ޑޭވޯ ބާބާގެ ވަނީ ޓީމަށް ގިނަ ބަދަލުތަކެއް ގެނެސްފަ އެވެ.
ޓީމުގައި ހިމެނޭ ސީނިއާ ގިނަ ކުޅުންތެރިންނަށް ރެސްޓު ދިނުމަށް ފަހު ބާބާ ފުރުސަތު ދިނީ ޒުވާން އާ ކުޅުންތެރިންނަށެވެ. އެ ގޮތުން ފުރަތަަމަ އެގާރަ އަށް އެކަނިވެސް ވަނީ ހަ ބަދަލެއް ގެނެސްފަ އެވެ. ސީޝެލްސް އަށް ބަލާއިރު އެ ޓީމުންވެސް ވަނީ މި މެޗަށް ފަސް ބަދަލެއް ގެނެސްފަ އެވެ.
ފުރަތަމަ މެޗާއި ހިލާފަށް މި މެޗުގައި ގިނަ ހަމަލާތައް ތަނަވަސްކުރީ ސީޝެލްސް އިންނެވެ.
ސީޝެލްސް އާއި ރާއްޖެ ކުޅުނު މެޗުގެ ތެރެއިން.-- ފޮޓޯ: އާއިމް ޒަމީރު/ އަދަދު
ސީޝެލްސްގެ ފުރަތަމަ ނުރައްކާތެރި ހަމަލާ އެޓީމުން އުފެއްދީ 10 ވަނަ މިނިޓްގަ އެވެ. ނެލީ ލަރޫ ޖައްސާލި ބޯޅަ ހިފައިގެން އޭރިއާތެރެއަށް ވަދެ ނަތާޝާ ބިބީ ފޮނުވާލި ހަމަލާ ދިޔައީ އަރިމާތީ ދަނޑިކައިރިން ބޭރުންނެވެ. އޭގެ މިނިޓެއް ފަހުން ސީޝެލްސް އިން މެޗުގައި އެޓީމްގެ ފުރަމަ ގޯލް ޖެހި އެވެ. ރީނާ އެސްތާ މި ގޯލް ޖެހީ ލިބުނު ހިލޭ ޖެހުމަކުންނެވެ. ގޯލް އޭރިއާ އަރިމަތިން ލިބުނު ހިލޭ ޖެހުން ރީނާ ފޮނުވާލުމުން ގޮސް ގޯލުގެ ކަނަށް ވަނީ ރާއްޖޭގެ ކީޕަރު އައިމިނަތު ލީޒާ ބޯމަތިން ގޮހެވެ.
ގޯލަށް ފަހު ޖެހިގެން ދެ ކޯނަރެއްގައި ސީޝެލްސްއިން ނުރައްކާކުރި އެވެ. ދެ ފަހަރު ވެސް ބޯޅަ ލިބުނީ ފޯވަޑް ނަތާޝާ އަށެވެ. އޭނާ ފޮނުވާލި ބޯޅަ އަރިމަތީ ދަނޑިކައިރިން ބޭރުންނެވެ.
މެޗުގެ ފުރަތަމަ 20 މިނެޓަށް ބަލާއިރު ރާއްޖެ އަށް ލިބުނު ހަމައެކަނި ފުރުސަތަކީ އިނާޝާ އާދަމް އަށް ލިބުނު ފުރުސަތެވެ. ހިލޭ ޖެހުމަކުން މައީޝާ އަބްދުލް ހަންނާން ނެގި ބޯޅަ ސީޝެލްސްގެ ކުޅުންތެރިއެއްގެ ގައިގައި ލިބުނީ އިނާޝާ އަށެވެ. އޭނާ އެއް ފަހަރުން ފޮނުވާލި ބޯޅަ ދިޔައީ ބޭރުންނެވެ.
ރާއްޖޭގެ ހަމަލާއަށް ފަހު ސީޝެލްސް އަށް ރަނގަޅު ފުރުސަތެއް ލިބުނެވެ. އޭރިއާ ތެރެއިން ސީޝެލްސްގެ ނަތާޝާ ފޮނުވާލަން އުޅުނު ބޯޅަ ދިވެހި ޓީމުގެ ދެ ޑިފެންޑަރުން ބްލޮކްކުރި އެވެ. އެ ބޯޅަ ދެން ލިބުނީ ސީޝެލްސްގެ ކެޕްޓަން ޕަސްކަލީނާ މުސްޓާޝް އަށެވެ. އޭރިއާ ބޭރުން އޭނާ ފޮނުވާލި ބޯޅަ ގޯލާ އަމާޒެއް ނުވި އެވެ.
ލީޑު ފުޅާކުރުމާ ގާތަށް ސީޝެލްސް އިން މިހާފުގައި ޖެހިލި އެވެ. ކޯނަރަކުން ރީނާ ނެގި ބޯޅަ މިފަހަރު ވެސް ފޮނުވާލީ ނަތާޝާ އެވެ. އޭނާ ފޮނުވާލި ބޯޅަ ރާއްޖޭގެ ޒުލޭހާގެ ފައިގައި ޖެހިފައި އަމާޒުވީ ގޯލުގެ އަރިމަތީ ދަނޑިއަށެވެ. ދަނޑީގައި ޖެހިފައި ނިކުތް ބޯޅަ ސީޝެލްސްގެ އިޓަރާ ފޮނުވާލުމުގެ ކުރިން ރާއްޖޭގެ ރިޝްމާ އަބްދުﷲ އެބޯޅަ ބޭރުކޮށްލި އެވެ. އެ އެޓޭކުގައި އެ ޓީމުން ނެގި ކޯނަރުން މައީޝާ ދިފާއުކުރި ބޯޅަ އެއް ފަހަރުން ފޮނުވާލީ ކެޕްޓަން ޕަސްކަލީނާ އެވެ. އޭނާ ފޮނުވާލި ބޯޅަ ކީޕަރު ލީޒާ ބޯމަތިން ގޮސް ޖެހުނީ ހުރަސް ދަނޑީގަ އެވެ.
ފުރަތަމަ ހާފު ނިމުމުގެ ކުރިންވެސް ސީޝެލްސް އިން ނުރައްކާތެރި ހަމަލާއެއް ފޮނުވާލި އެވެ. ރާއްޖޭގެ ޒުލައިހާ ކައިރިން ނައްޓާފައި އޭރިއާތެރެއަށް ވަދެ ނަތާޝާ ބޯޅަ ފޮނުވާލުމުގެ ކުރިން ކީޕަރު ލީޒާ ކުރިއަށް ނިކުމެ އެބޯޅައިގައި ޖެއްސި އެވެ. ދެ ވަނަ ފަހަރަށް ނަތާޝާ ގޯލަށް ފޮނުވާލި ބޯޅަ ރޮނގުމަތިން ދިފާއުކުރީ މައީޝާ އެވެ.
ދެ ވަނަ ހާފުގައި ދިވެހި ޓީމުން އާ ގިނަ ކުޅުންތެރިންތަކަށް ފުރުސަތުދިނެވެ. މި ހާފުގައިވެސް ގިނަ ހަމަލާ އުފައްދައި މެޗު ޑޮމިނޭޓްކުރީ ސީޝެލްސް އިންނެވެ. ފަހު ހާފުގައި އޭޓިމުން ޖެހި ތިން ގޯލްގެ ތެރެއިން ދެ ގޯލް ޖަހައިދިނީ ނަތާޝާ ބިބީ އެވެ.
މެޗުން މޮޅުވުމުން ސީޝެލްސް ކުޅުންތެރިން އުފާފާޅުކުރަނީ.-- ފޮޓޯ: އަދަދު
ނަތާޝާ ޖެހި ފުރަތަމަ ގޯލަކީ މެދުތެރެއިން ކެޕްޓަން ޕަސްކަލީނާ ދިން ބޯޅައެއް ގޯލްގެ މަތީ ކަނަށް ވައްދާލައިގެން ޖެހި ގޯލެކެވެ. ބަދަލު ކީޕަރު ޝާއިގާ ހުސައިން އަށް މި ބޯޅަ ދިފާއުކުރަން މާ ބޮޑު ފުރުސަތެއް ނުލިބުނެވެ.
މި ގޯލު ޖެހިތާ މާގިނަ އިރުތަކެއް ނުވެ ކެޕްޓަން ޕަސްކަލީނާ ސީޝެލްސްގެ ތިން ވަނަ ގޯލު ޖެހި އެވެ. އޭރިއާ ބޭރުން އޭނާ ފޮނުވާލި ބޯޅަ ގޯލުގެ ކަނަށް ވަނީ ކީޕަރު ޝާއިގާ އަތުގައިޖެހިފަ އެވެ. ސީޝެލްސްގެ ފަހު ގޯލް ނަތާޝާ ޖެހީ މެޗު ނިމެން ދެ މިނެޓަށްވެފައި ވަނިކޮށެވެ.
މި މެޗުން މޮޅުވުމުން ސީޝެލްސްގެ ކުޅުންތެރިންނާއި އޮފިޝަލުން ވަނީ ވަރަށް ބޮޑަށް އުފާފާޅުކޮށްފަ އެވެ.
މާލޭގައި ކުރިއަށްދާ ބައިނަލްއަގްވާމީ އެކުވެރިކަމުގެ ސިލްސިލާ މެޗުތަކުގައި ރާއްޖެ ކުޅޭ ފަހު މެޗު އޮންނާނީ އަންނަ ބުރާސްފަތި ދުވަހު އެވެ. މި މެޗުގައި ދިވެހިރާއްޖެ ނިކުންނާނީ ސައުދީ އަރަބިއްޔާއާއި ދެކޮޅަށެވެ. އޭގެ ކުރިން ސީޝެލްސްއިން ސައުދީ އަރަބިއްޔާއާ ދެކޮޅަށް ކުޅޭނެއެވެ.
