ސަރުކާރުގެ ސޯޝަލް ހައުސިން ސްކީމްގެ ދަށުން ދޫކޮށްފައިވާ ފްލެޓްތަކާއި، ރޯ ހައުސްތައް ފަދަ ތަންތަން ކުއްޔަށް ދޫކުރުމުގައި އަމަލު ކުރަން ޖެހޭނެ އުސޫލެއް އެކުލަވާލައިފި އެވެ.
ދިރިއުޅުމަށްޓަކައި ގޯތިގެދޮރު ކުއްޔަށް ދިނުމާ ބެހޭ ގާނޫނުގެ ދަށުން ރޭ ދަންވަރު އާންމުކޮށްފައިވާ އެ ގަވާއިދަށް މިއަދުން ފެށިގެން އަމަލު ކުރާނެ އެވެ.
އޭގައިވާ ގޮތުން ސަރުކާރުން ހިންގާ ބޯހިޔާވަހިކަމުގެ މަޝްރޫއުގެ ދަށުން ދޫކުރާ ތަންތަން ކުއްޔަށް ދެވޭނީ އެ މަޝްރޫއުއެއް ހިންގި އިދާރާގެ ހުއްދަ ލިބިގެންނެވެ.
އަދި އެފަދަ ތަންތަން އެއްކޮށް ކުއްޔަށް ނުދެވޭނެ ކަމަށާއި މިހާރު އެގޮތަށް ދޫކޮށްފައިވާ ތަންތަނުގެ ހުއްދަތައް ބާތިލުވާނެ ކަމަށްވެސް އޭގައި ބަޔާން ކުރެ އެވެ.
"...މި ގަވާއިދަށް އަމަލުކުރަން ފަށާއިރު އަދި ގާނޫނަށް އަމަލުކުރަން ފެށި ފަހުން އިޖުތިމާއީ ބޯހިޔާވަހިކަމުގެ މަޝްރޫއެއްގެ ދަށުން ދޫކޮށްފައިވާ ފްލެޓުތަކާއި ރޯހައުސްތަކާއި ގޯތި ފަދަ ތަންތަނުގެ ތެރެއިން އެއްކޮށް ކުއްޔަށް ދޫކޮށްފައިވާ ތަންތަން ކުއްޔަށް ދިނުމަށް ދޫކޮށްފައިވާ ހުއްދަތައް ބާތިލްވާނެ،" އެ ގަވާއިދުގައި ވެެއެވެ.
އުސޫލުގައިވާ ގޮތުން އެފަދަ ތަންތަން ކުއްޔަށް ދޫކުރެވޭނީ ގިނަ ވެގެން ފަސް އަހަރަށެވެ.
ނަމަވެސް ތަނުގެ މިލްކުވެރިކަން، ތަން ދޫކުރެވުނު މީހާގެ ނަމަށް ބަދަލުވެ ރަޖިސްޓަރީ ކޮށްފައިވާ ނަމަ ކުއްޔަށް ދޫކުރުމުގައި އެއްވެސް ހުރަހެއް ނެތް ކަމަށް އުސޫލުގައި ބުންޏެވެ.
މި ގަވާއިދު އެކުލަވާލާފައި މިވަނީ ހުޅުމާލެ ދެވަނަ ފިޔަވަހިން ދޫކޮށްފައި ހުރި ހިޔާ ފްލެޓްތައް ކުއްޔަން ދޫކުރަން ބައެއް މީހުން އިއުލާންކޮށްފައި ވަނިކޮށެވެ.
މީގެ ކުރިންވެސް ސޯޝަލް ހައުސިންގެ ދަށުން ލިބޭ ފްލެޓުތައް ކުއްޔަށްދޭ ކަމުގެ ޝަކުވާތައް ވަނީ ފެންމަތިވެފަ އެވެ.
