ޔޫކްރެއިންގެ ބޯޑަރު ކައިރިން ރަޝިއާގެ ސިފައިން ދާން ފަށާފައިވާ ކަމަށް ބުނެ ރަޝިއާއިން ހެދީ ދޮގެއް ކަމަށް އެމެރިކާއިން ތުހުމަތުކޮށްފި އެވެ.
އެމެރިކާގެ އިސް އޮފިޝަލަކު ބުނީ އޭގެ ބަދަލުގައި އިތުރު 7000 ސިފައިން ބޯޑަރު ކައިރިއަށް ފޮނުވާފައިވާ ކަމަށާއި "ދޮގު ހަދައިގެން" ކޮންމެ ވަގުތަކު ވެސް ޔޫކްރެއިނަށް ހަމަލާއެއް ދީފާނެ ކަމަށެވެ.
ރަޝިއާއިން ބުނެފައި ވަނީ އަސްކަރީ ތަމްރީންތައް ނިމުމުން ބޯޑަރު ކައިރީގައި ތިބި ސިފައިންނާއި އަސްކަރީ އުޅަނދުތައް އަނބުރާ ދާން ފަށާފައިވާ ކަމަށެވެ.
އެކަމަކު ހުޅަނގުގެ އޮފިޝަލުން ބުނާ ގޮތުގައި އެ ވާހަކަ ކަށަވަރު ކުރަން އެއްވެސް ހެއްކެއް ނެތެވެ.
ޔޫކްރެއިންގެ ބޯޑަރު ކައިރިއަށް 100،000 އަށް ވުރެ ގިނަ ސިފައިން ޖަމާވި ނަމަވެސް ރަޝިއާއިން ތަކުރާރުކޮށް ބުނަމުން ދަނީ ހަމަލާއެއް ދޭން ނޫޅޭ ކަމަށެވެ.
އަސްކަރީ ތަމްރީން ނިންމުމަށް ފަހު ފައުޖުތައް އެނބުރި މަރުކަޒަށް ދާ މަންޒަރު ފެންނަ ފޮޓޯތަކެއް ވެސް ރަޝިއާގެ ޑިފެންސް މިނިސްޓްރީން ވަނީ އާއްމުކޮށްފަ އެވެ.
ނަމަވެސް ވައިޓް ހައުސްގެ އިސް އޮފިޝަލަކު ބުނީ ކުޑަ ދުވަސްކޮޅެއްގެ ތެރޭގައި އެތައް ހާސް ސިފައިން ބޯޑަރު ކައިރިއަށް ފޮނުވި އިރު، ބުދަ ދުވަހު ވެސް ސިފައިން އިތުރު ކުރި ކަމަށެވެ.
ޔޫކްރެއިންގެ ރައީށް ވޮލޮޑިމިރް ޒެލެންސްކީ ވެސް ކުރިން ވިދާޅުވީ ބޯޑަރު ކައިރިން ސިފައިން ދާ މަންޒަރު ނުފެންނަ ކަމަށެވެ. އަދި ނޭޓޯގެ ސެކެޓްރީ ޖެނެރަލް ޖެންސް ސްޓޮލްޓެންބާގް ވެސް ވިދާޅުވީ އެގޮތަށެވެ.
ބެލްޖިއަމްގައި ނޭޓޯ ގައުމުތަކުގެ ޑިފެންސް މިނިސްޓަރުންގެ ބައްދަލުވުމެއްގައި ސްޓޮލްޓެންބާގް ވިދާޅުވީ ޔޫރަޕުގެ މެދުތެރެ އާއި އިރުދެކުނުގައި ކުދި އަސްކަރީ ޔުނިޓުތަކެއް ހަދަން ވިސްނަމުންދާ ކަމަށެވެ.
އޭނާ ވިދާޅުވީ އެއީ އިރުމަތީ ޔޫރަޕުގެ ދިފާއު ވަރުގަދަ ކުރުމުގެ ގޮތުން ރާވާފައިވާ ކަމެއް ކަމަށެވެ. އެ ހިސާބުގެ ދިފާއީ މަސައްކަތަށް 2014 ވަނަ އަހަރުން ފެށިގެން 270 ބިލިއަން ޑޮލަރު ހޭދަކޮށްފައިވެ އެވެ.
ނަމަވެސް ނޭޓޯއަކީ ރަޝިއާއަށް ނުރައްކަލެއް ނޫން ކަމަށް އޭނާ ވިދާޅުވި އެވެ. ރޮމޭނިއާގައި ނޭޓޯގެ ކުޑަ ފައުޖުގައި އިސްކޮށް އުޅެން ފްރާންސުން ވަނީ ޝައުގުވެރިކަން ފާޅުކޮށްފަ އެވެ.
ރަޝިއާގެ ފޮރިން މިނިސްޓްރީން ބުނީ ސްޓޮލްޓެންބާގް ދައްކާ ވާހަކަތާ މެދު މިހާރު އެއްވެސް "ޝައުގުވެރިކަމެއް ނެތް" ކަމަށެވެ.
ރަޝިއާއިން ޑިމާންޑު ކުރަނީ އެމެރިކާއިން އިސްކޮށް އުޅޭ ނޭޓޯ އަސްކަރީ ކޯލިޝަނުގެ މެމްބަރެއްގެ ގޮތުގައި ޔޫކްރެއިން ނުހިމެނުމަށެވެ. ނަމަވެސް ހުޅަނގުގެ ގައުމުތަކުން ވެސް ދޫދޭކަށް ބޭނުމެއް ނުވެ އެވެ.
