ބާސެލޯނާ (ފެބްރުއަރީ 17) - ބާސެލޯނާ އަކީ ޔުއެފާ ޔޫރޮޕާ ލީގުގެ ފޭވަރިޓުން ނޫން ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.
ބާސެލޯނާ ނެތި އެންމެ ފަހުން ޗެމްޕިއަންސް ލީގުގެ ނޮކައުޓް ބުރުގެ މެޗުތަކެއް ކުޅުނީ 2003/2004 ވަނަ އަހަރުގެ ސީޒަނުގަ އެވެ. އެ ފަހަރު ބާސެލޯނާ ޗެމްޕިއަންސް ލީގަށް ކޮލިފައިނުވެ ކުޅުނީ ޔުއެފާ ކަޕް (މިހާރުގެ ޔޫރޮޕާ ލީގުގަ) އެވެ. މި ފަހަރުގެ ޗެމްޕިއަންސް ލީގުން ކަޓައި ބާސެލޯނާ އަށް ޖެހިފައިވަނީ 18 އަހަރު ތެރޭ ފުރަތަމަ ފަހަރަށް ޔޫރަޕްގެ ދެ ވަނަ ފަންތީގެ ކްލަބް ފުޓްބޯޅަ މުބާރާތުގައި ކުޅެން ޖެހިފަ އެވެ.
ޔޫރޮޕާ ލީގުގެ ދެ ވަނަ ބުރުގައި ބާސެލޯނާ މިރޭ ފުރަތަމަ ލެގުގައި އަމިއްލަ ދަނޑުގައި އިޓަލީގެ ނަޕޯލީއާ ދެކޮޅަށް ކުޅޭއިރު، އެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޒަވީ ވަނީ އެ ޓީމަކީ މުބާރާތުގެ ފޭވަރިޓަށް ނުވާ ސަބަބު ކިޔައިދީފަ އެވެ.
"އަހަަންނެއް ނުބުނާނަން. އަހަރެމެންނަކީ ފޭވަރިޓުންނެކޭ. ސަބަބަކީ މިއީ އަހަރެމެންނަށް އާ ލެވަލެއްގެ މުބާރާތެއް. ވަރުގަދަ ގޮތްގޮތަށް ކުޅޭ ޓީމުތައް އެބައޮތް. މި މުބާރާތުގެ ތަޖުރިބާ އަށް ބަލާއިރު ސެވިއްޔާ އަކީ ފޭވަރިޓެއް. އަހަރެމެން ވެސް ފޭވަރިޓުންގެ ތެރޭގައި ކިޔާނެ. އެކަމަކު، ސީދާ އެންމެ ބޮޑު ފޭވަރިޓަކީ އަހަރެމެންނެއް ނޫން،" މި ސީޒަނުގެ މެދުތެރެއިން ބާސެލޯނާއާ ހަވާލުވި އެ ޓީމުގެ ކުރީގެ ކެޕްޓަން ޒަވީ ބުންޏެވެ.
ނަޕޯލީ އާއި ބާސެލޯނާ ވަނީ 2019/2020 ވަނަ އަހަރުގެ ޗެމްޕިއަންސް ލީގުގެ ގަދަ 16 ޓީމުގެ ބުރުގައި ކުޅެފަ އެވެ. ނަޕޯލީ ދަނޑުގައި 1-1 އިން އެއްވަރުވިއިރު، ބާސެލޯނާ ދަނޑުގައި އެ ޓީމު މޮޅުވީ 3-1 އިންނެވެ. ޒަވީ ބުނީ މި ވަގުތު އޮތް ނަޕޯލީ އާއި ބާސެލޯނާ ސްކޮޑަކީ ވެސް ހަގީގަތުގައި ޗެމްޕިއަންސް ލީގުގެ ލެވަލް ކަމަށެވެ.
"ނަޕޯލީ އަކީ ވެސް ޗެމްޕިއަންސް ލީގު ލެވަލް ކްލަބެއް. އަހަރެމެންގެ މި މެޗު ހަމަ މިއީ ޗެމްޕިއަންސް ލީގު ލެވަލްގެ ކުރިމަތިލުމެއް. އަހަރެމެން ވިސްނަން ޖެހޭ ކުޅުންތެރިންތަކެއް ނަޕޯލީގައި އެބަތިބި،" ޒަވީ ބުންޏެވެ.
ބާސެލޯނާގެ މިޑްފީލްޑަރު ޕެޑްރީ ގޮންޒާލޭޒް ބުނީ ޔޫރޮޕާ ލީގުގެ ފޭވަރިޓަކީ އެ ޓީމު ކަމަށް ބުނާތީ އޭގެ ޕްރެޝަރާ ކުރިމަތިލާން ޖެހުނަސް ކަންބޮޑުވުމެއް ނެތް ކަމަށެވެ. އަދި ބާސެލޯނާ އިން މަސައްކަތް ކުރާނީ ކޮންމެ މެޗަކުން ވެސް މޮޅުވެ، ކާމިޔާބު ހޯދުމަށް ކަމަށެވެ.
އަނިޔާގެ ސަބަބުން ބާސެލޯނާގެ އުރުގުއޭ ޑިފެންޑަރު ރޮނާލްޑް އަރައުހޯ އަށް ނުކުޅެވޭނެ އެވެ. ބާސެލޯނާގެ ކޯޗު ޒަވީ މިރޭ ނެރޭ ފުރަތަަމަ އެގާރައިން އޮސްމާން ޑެމްބެލޭ ފެނުމުގެ ފުރުސަތު ބޮޑު ކަމަށް ސްޕެއިނުގެ މީޑިއާ ރިޕޯޓްތައް ބުނެ އެވެ.
ބާސެލޯނާ އާއި ނަޕޯލީ ކުޅޭ މެޗު ފަށާނީ ރާއްޖެ ގަޑިން 22:45 ގަ އެެވެ.
