މަސްތުވާތަކެތީގެ މައްސަލަތަކުގައި ރާވައިގެން ގަސްދުގައި ގޯސްހަދާ މީހުން ދައުލަތުގެ އިދާރާތަކުގައި އެބަތިބި ކަމަށް އެޓާނީ ޖެނެރަލް އިބްރާހީމް ރިފްއަތު ވިދާޅުވެއްޖެ އެވެ.
ކޯޓުތަކުގައި މައްސަލަތައް ލަސްވާ މައްސަލައާ ގުޅޭ ގޮތުން ކަމާ ބެހޭ އިދާރާތަކުގެ ވެރިންނާ އެކު ރައްޔިތުންގެ މަޖިލީހުގެ ޖުޑިޝަރީ ކޮމިޓީން އިއްޔެ ބޭއްވި ބައްދަލުވުމުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ރިފްއަތު ވިދާޅުވީ، ގޯސްހަދާ ފަރާތްތައް ފުލުހުންގެ އިދާރާއާއި ތަހުގީގީ އެހެން އިދާރާތަކުގައި ވެސް އެބަތިބި ކަމަށެވެ. އޭނާ ވިދާޅުވީ އެފަދަ ފަރާތްތަކުން ގޯސް ހަދަނީ ރޭވިގެން އިންތިޒާމްވެގެން ކުރާ ކަމެއްގެ ގޮތުގަ އެވެ.
"ހާއްސަކޮށް މަސްތުވާތަކެތީގެ މައްސަލަތަކުގައި ހަމަ ރޭވިގެން އިންތިޒާމްވެގެން ވެސް އެބަ ތަހުގީގީ އިދާރާތަކުގެ މެދުގައި ނޫނީ ފުލުހުންގެ ތެރޭގައި ނޫނިއްޔާ ދައުލަތުގެ އެހެން ތަންތަނުގައި ވެސް އެބަ ތިބި ހަމަ ގޯސް ހަދާ މީހުން،" ރިފްއަތު ވިދާޅުވި އެވެ.
އޭނާ ވިދާޅުވީ އެފަދަ ފަރާތްތަކުން ގޯސް ހަދަނީ ނިޒާމު ރަނގަޅަށް އެނގިގެން، ނިޒާމުގެ ތެރޭގައި ހުރި ލޫޕްހޯލްތައް ހޯދައިގެން ކަމަށާއި އެކަން އެގޮތަށް ކުރަނީ ގަސްދުގައި "ނުނިޔަތެއް ބާއްވައިގެން" ކަމަށެވެ.
"މިހަގީގަތް ވެސް އަޅުގަނޑުމެން އެބަ ޖެހޭ ގަބޫލުކުރަން،" އޭނާ ވިދާޅުވި އެވެ.
ކުށްކުރާ މީހުން ދޫވާ ސަބަބުތަކާ ބެހޭ ގޮތުން ރިފްއަތު މިހާ ތަފްސީލުކޮށް ވާހަކަ ދެއްކެވީ ޖުޑިޝަރީ ކޮމިޓީގެ މެމްބަރު އަދި ރައްޔިތުންގެ މަޖިލީހުގެ ކެންދޫ ދާއިރާގެ ޖޭޕީ މެމްބަރު އަލީ ހުސައިން ކުރެއްވި ސުވާލަކަށް ޖަވާބު ދެއްވަމުންނެވެ.
ޖުޑިޝަލް ސާވިސް ކޮމިޝަންގެ ރައީސް ހިސާން ހުސައިން އާއި އެ ކޮޮމިޝަންގެ އެހެން ބައެއް މެމްބަރުންނާއި ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަންގެ އިސް ބޭފުޅުން ވެސް ބައިވެރިވެވަޑައިގެންނެވި އެ ބައްދަލުވުމުގައި ސުވާލުކުރައްވަމުން ރައްޔިތުންގެ ކަންބޮޑުވުން އޮތީ މުޖުރިމުންގެ ގޮތުގައި ފާޅުގައި ފެންނަން ތިބި މީހުން ދޫވާތީ ކަމަށް މެމްބަރުން ވިދާޅުވި އެވެ. އެކަން އެހެން ވަނީ ޓެކްނިކަލް ކަމަކާ ހެދިތޯ ނުވަތަ އެހެން ކަމަކާ ހެދިތޯ ރައްޔިތުން ނުބަލާނެ ކަމަށް މެމްބަރުން ވިދާޅުވި އެވެ.
"ރައްޔިތުންހެ ކަންބޮޑުވުން މިހުރީ މައްސަލަތައް ސާބިތުނުވާތީ މުޖުރިމުންގެ ގޮތުގައި، ކްރިމިނަލުންގެ ގޮތުގައި ރައްޔިތުންނަށް ގަބޫލުކުރެވޭ ގޮތަކަށް ފާޅުކަން ބޮޑުގޮތެއްގައި ފެންނަން ތިބި މީހުން ދޫވެގެން ދާތީ. އެއީ ރައްޔިތުންގެ ކަންބޮޑުވުމަކީ. އެހެންވީމާ މީގެ ކޮން ކަމެއް ނުވެގެންތޯ މިއުޅެނީ،" އަލީ ސުވާލުކުރެއްވި އެވެ.
އެ ސުވާލަށް ޖަވާބު ދެއްވަމުން ރިފްއަތު ވިދާޅުވީ އޭގެ ފުރަތަމަ ސަބަބަކީ ރާއްޖޭގައި އަމަލުކުރަމުން އަންނަ ހެއްކާ ބެހޭ ގަނޫނަކީ އެހާ ތަފްސީލު ނޫން، މާކުރީގެ ގާނޫނަކަށް ވުމެވެ. ހެކި ވަޒަންކުރާނެ ރަނގަޅު އުސޫލުތަކެއް އެ ގާނޫނުގައި ނެތުމުން ހެކި ވަޒަން ކުރުމުގައި ފަނޑިޔާރުންނަށް ބޮޑެތި ބާރުތައް އޮންނަ ކަމަށް އޭނާ ވިދާޅުވި އެވެ.
"އެހެންވީމާ ވުން އެކަށީގެންވޭ، ތަފްސީލީ ގޮތެއްގައި ހެކި ވަޒަންކުރުމުގެ އުސޫލުތަކާ ހަމަތައް ލިޔެވިފައި ނެތީމާ، ނޫނީ ސާފުކޮށް އެނގެން ނެތީމާ، މިކަހަލަ ލޫޕްހޯލްތައް ހުރެގެން މައްސަލަތައް ސާބިތުނުވީ ކަމަށް،" ރިފްއަތު ވިދާޅުވި އެވެ.
ރާވައިގެން ގަސްދުގައި ގޯސްހަދާ މީހުން ތިބުމަކީ އޭނާ ވިދާޅުވި ގޮތުގައި މައްސަލަަތައް ސާބިތުވާ ދެވަނަ ސަބަބެވެ.
އެކަމަށް ލިބެން އޮތް ހައްލަކީ އޭނާ އޭޖީ ވިދާޅުވި ގޮތުގައި މަޖިލީހަށް މިހާރު ހުށަހަޅާފައިވާ ހެއްކާ ބެހޭ ބިލުފާސްކޮށް ގާނޫނަކަށް ހެދުމެވެ. ޒަމާނަށް ފެތޭ ވަރަށް ގިނަ ކަންތައްތައް އެބިލުގައި ހިމަނާފައި ވާނެ ކަމަށް ވެސް އޭނާ ވިދާޅުވި އެވެ.
"ހާއްސަކޮށް އަޅުގަނޑު ފާހަގަކޮށްލަން ބޭނުން، ހެކިބަސްދޭ މީހުންނަށް ހިމާޔަތް ހޯދުމާ ގުޅޭ ގޮތުން، ހެކިބަސްދޭ މީހާޔަށް ހިމާޔަތްދިނުުމުގެ އަމުރު ނެރެދޭނެ އުސޫލުތައް ވެސް އެބިލުގައި އަޅުގަނޑުމެން ވާނީ ހިމަނާފައި،" ރިފްއަތު ވިދާޅުވި އެވެ.
ސިއްރު ހެކިންގެ ސިއްރުވެރިކަން ގެއްލޭ ގޮތް މެދުވެރިވުމަކީ ވަރަށް ގިނައިން ދިމާވާ ކަމެއް ކަމަށާއި އެގޮތަށް ކަންތައް ވުމުން ހެކިބަސް އަނބުރާ ނަގާގޮތް ވެސް މެދުވެރިވާ ކަމަށް އޭޖީ ވިދާޅުވި އެވެ. އެއީ ވެސް މައްސަލަތައް ސާބިތުނުވާ ސަބަބެކެވެ.
އެހެންވެ ހެއްކާ ބެހޭ ބިލު ވީހާ އަވަހަކަށް ފާސްކޮށްދެއްވަން އޭނާ އެދިވަޑައިގެންނެވި އެވެ.
