މިލާން (ފެބްރުއަރީ 17) - ޔުއެފާ ޗެމްޕިއަންސް ލީގުގެ ގަދަ 16 ބުރުގައި ރޭ ފަހު ވަގުތު ގޯލު ޖަަހައި ބަޔާން މިއުނިކުން އޮސްޓްރިއާގެ ރެޑްބުލް ސަލްޒްބާގާ 1-1 އިން އެއްވަރުކުރިއިރު، އިންޓަ މިލާން ދަނޑުގައި އެ ޓީމު 2-0 އިން ބަލިކޮށް, ލިވަޕޫލުން މުބާރާތުގެ ކުއާޓާ ފައިނަލުގެ ޖާގައަކާ ގާތަށް ޖެހިލައިފި އެވެ.
ބަޔާން ސިއްސުވާލުމަށް ފަހު ރޭ އަމިއްލަ ދަނޑުގައި ކުޅުނު ސަލްޒްބާގުން ލީޑުނެގީ 21 ވަނަ މިނިޓްގަ އެވެ. އޭރިއާރޮނގުކައިރިން ޗުކްވުބުއީކޭ އަޑާމޫ މި ގޯލު ޖެހީ އޭރިއާރޮނގުކައިރިން ގޯލުގެ މަތީ ކަނަށް ބޯޅަ ފޮނުވާލައިގެންނެވެ. ލީޑުފުޅާކުރަން ސަލްޒްބާގުގެ ކަރީމް އަޑޭމީ ޖެހި ބޯޅަ ބަޔާން ކީޕަރު ސްވެން އުލްރެއި މަތަކުރިއިރު، އަޑަމޫ ފޮނުވާލި ރިބައުންސް ވަނީ ބްލޮކްވެފަ އެވެ.
ސަލްޒްބާގުން ރޭ ނެރުނު ޓީމުގެ އެވްރެޖް އުމުރަކީ 21 އަހަރެވެ. މިއީ 2003 ވަނަ އަހަރަށް ފަހު އަޔަކްސް އަށް ފަހު ޗެމްޕިއަންސް ލީގުގެ ނޮކައުޓް މެޗަކަށް ނެރުނު އެންމެ ޒުވާން ޓީމެވެ.
މި ހަފްތާގައި ޖަރުމަނު ލީގުގައި ބަޔާން ވަނީ ބޯކުމް ދަނޑުގައި 4-2 އިން ބަލިވެފަ އެވެ. ރޭގެ މެޗުން ސަލްޒްބާގް އަތްދަށުވެ، 2019 ވަނަ އަހަރަށް ފަހު ފުރަތަމަ ފަހަރަށް ޖެހިޖެހިގެން ދެ މެޗުން ބަލިވާންދަނިކޮށް އެ ޓީމު ސަލާމަތްވީ އިތުރު ވަގުތުގަ އެވެ. ތޯމަސް މުލާ ޖައްސާލި ބޯޅަ ކިންގްސްލީ ކޯމަން ވަނީ ހަމަޖެހިލާފައި ގޯލުގެ ތެރެއަށް ފޮނުވާލައިފަ އެވެ. މި ގޯލުގެ ކުރިން ބަޔާންގެ ލެރޯއި ސާނޭ ޖެހި ޝޮޓެއް ސަލްޒްބާގް ކީޕަރު ފިލިޕް ކޯން ވަނީ މަތަކޮށްފަ އެވެ.
ބަޔާން ދަނޑުގައި ކުޅޭ ދެ ވަނަ ލެގު އޮންނާނީ އަންނަ މަހު ނުވަ ވަނަ ދުވަހު އެވެ.
ދިހަ އަހަރު ތެރޭ އިންޓަ އިން ޗެމްޕިއަންސް ލީގުގެ ނޮކައުޓް ބުރުގައި ނުކުތް ފުރަތަމަ ފަހަރު އެ ޓީމުން ރޭ ލިވަޕޫލާ ދެކޮޅަށް ނުކުތީ ވަރުގަދަ ރޫހެއްގަ އެވެ. ފުރަތަމަ ހާފުގައި އިންޓަ އިން ލީޑުނަގަން ތުރުކީގެ މިޑްފީލްޑަރު ހަކަން ޗަނޮނޮގްލޫ ޖެހި ބޯޅަ ބޭރުވީ ހުރަސްދަނޑީގައި ޖެހިފަ އެވެ. އޭގެ ފަހުން އޭރިއާ ރޮނގުކައިރިން ލަޓާރޯ މާޓީނޭޒް ޖެހި ބޯޅަ ދިޔައީ ދަނޑިކައިރިން ބޭރުންނެވެ.
ލިވަޕޫލް މެޗުން މޮޅުވީ ދެ. ވަނަ ހާފްގައި ގެނައި ބަދަލުތަކާ އެކު ފަހު 15 މިނިޓް ތެރޭ ދެ ގޯލު ޖަހައިގެންނެވެ.
މެޗުގެ 75 ވަނަ މިނިޓްގައި ލިވަޕޫލަށް ލީޑުނަގައިދިނީ ރޮބާޓޯ ފިރްމީނޯ އެވެ. ދެ ވަނަ ހާފުގައި ޑިއޯގޯ ޖޮޓާގެ ބަދަލުގައި ކުޅެން އެރި ފިރްމީނޯ މި ގޯލު ޖެހީ އެންޑީ ރޮބަޓްސަން ނެގި ކޯނަރަކުން ބޮލުންނެވެ. އޭގެ އަށް މިނިޓް ފަހުން، މެޗުގެ 83 ވަނަ މިނިޓްގައި އިންޓަ އޭރިއާތެރެއިން ވާޖިލް ވެން ޑައިކް ބޮލުން ޖައްސާލި ބޯޅައެއް ހޯދައި، މުހައްމަދު ސަލާހު ވަނީ ލިވަޕޫލްގެ ދެ ވަނަ ގޯލު ޖަހައިފަ އެވެ. ސަލާހު ޖެހި ބޯޅަ ގޯލަށް ވަނީ އިންޓަގެ ދެ ޑިފެންޑަރުން ފައިކައިރިން ތިރިތިރިން ގޮހެވެ.
މި ފަހަރުގެ ޗެމްޕިއަންސް ލީގުގައި ލިވަޕޫލުން ކުޅުނު ހަތް މެޗުގައި ވެސް ވަނީ މޮޅުވެފަ އެވެ. ކުއާޓާގެ ޖާގަ އެއްކޮށް ޔަގީންކުރަން އަންނަ މަހު ނުވަ ވަނަ ދުވަހު އިންޓައާ ދެކޮޅަށް ލިވަޕޫލް ދަނޑުގައި އެއްވަރުކޮށްލައިގެން ވެސް ފުއްދާލެވޭނެ އެވެ.
