ރާއްޖޭގެ ޓޫރިޒަމް އިންޑަސްޓްރީ އަށް 50 އަހަރު ފުރުމާ ގުޅިގެން މޯލްޑިވްސް ޕޯސްޓް ލިމެޓާއި ޓޫރިޒަމް މިނިސްޓްރީ ގުޅިގެން ނެރޭ ސްޓޭމްޕްތައް މިއަދު ތައާރަފްކޮށްފި އެވެ.
މި ސްޓޭމްޕްތައް ނެރެދެއްވީ ރާއްޖޭއަށް ޓޫރިޒަމް ގެނެސްދެއްވި ބާނީން ކަމަށްވާ މުހައްމަދު އުމަރު މަނިކު (އެމްޔޫ މަނިކު) އާއި ޗަމްޕާ ހުސެއިން އަފީފް އާއި ހެލްތު މިނިސްޓަރު އަހުމަދު ނަސީމްގެ އިތުރުން އިޓަލީގެ ޖޯޖް ކޯބިން އަދި ރާއްޖޭގެ އެންމެ ފުރަތަމަ ޓޫރިޒަމް މިނިސްޓަރު އަހުމަދު މުޖުތަބާ އެވެ.
ސްޓޭމްޕްތައް ނެރެދެއްވުމަށްފަހު އެ ބޭފުޅުން ވަނީ ސްޓޭމްޕް އިޝޫތަކުގައި ސޮއިކުރައްވާފަ އެވެ. މި އިޝޫގައި ފަސް ސްޓޭމްޕެއް ތައާރަފްކޮށްފައިވެ އެވެ.
އެގޮތުން، އެންމެ ފުރަތަމަ ސްޓޭމްޕްގައި ހިމެނެނީ ކުރުނބާ މޯލްޑިވްސްގެ ފޮޓޯ އެކެވެ. މިއީ ރާއްޖެއިން ދުނިޔެ އަށް ތައާރަފްކުރި 'ވަން އައިލެންޑް ވަން ރިސޯޓް' ކޮންސެޕްޓް ރަމްޒުކޮށްދޭ ސްޓޭމްޕެވެ. މިއީ 5ރ. ގެ ސްޓޭމްޕެކެވެ.
ދެވަނަ ސްޓޭމްޕްގައި ހިމަނާފައި ވަނީ 1986 ވަނަ އަހަރު ރާއްޖެއިން ތައާރަފްކުރި ވޯޓާ ބަންގަލޯގެ ފޮޓޯ އެވެ. މިއީ 10ރ. ސްޓޭމްޕެކެވެ. އަދި 20.ރ އަށް ވިއްކާ ތިންވަނަ ސްޓޭމްޕްގައި ހިމަނާފައި ވަނީ 1987 ވަނަ އަހަރު ރާއްޖޭގައި ހުޅުވި ސްކޫލް އޮފް ހޮޓެލް އެންޑް ކޭޓަރިން ސާވިސަސްގެ ފޮޓޯ އެކެވެ. މިއަދު އެ ސްކޫލަކީ ގައުމީ ޔުނިވާސިޓީގެ ފެކަލްޓީއެކެވެ.
ހަމައެހެންމެ، މިއަދު ތައާރަފްކުރި ހަތަރުވަނަ ސްޓޭމްޕްގައި ޖަހާފައި ވަނީ 1993 ވަނަ އަހަރު ރާއްޖޭގައި ތައާރަފްކުރި ސީޕްލޭން ހިދުމަތުގެ ފޮޓޯއެކެވެ. މި ސްޓޭމްޕް ވިއްކާނީ 30.ރ އަށެވެ. އޭގެ އިތުރުން 40.ރ އަށް ވިއްކާ ގޮތަށް މިއަދު ތައާރަފްކުރި ފަސްވަނަ ސްޓޭމްޕްގައި ހިމަނާފައި ވަނީ 2010 ގައި ރާއްޖޭގައި އަލަށް ފެށި ގެސްޓްހައުސް ޓޫރިޒަމް ދައްކުވައިދޭ ފޮޓޯއެކެވެ.
ރާއްޖެއަށް އެންމެ ފުރަތަމަ ފަތުރުވެރިޔާ ޒިޔާރަތްކުރިތާ 50 އަހަރު ފުރިގެންދިޔުމަކީ ރާއްޖޭގެ ތާރީހުގައި ވަރަށް މުހިންމު ކަމެއްގެ ގޮތުގައި މި ރަސްމިއްޔާތުގައި ވާހަކަ ދައްކަވަމުން ޓޫރިޒަމް މިނިސްޓަރު ޑރ. އަބްދުﷲ މައުސޫމް ސިފަކުރެއްވި އެވެ.
"16 ފެބްރުއަރީ 1972 އަކީ ތާރީހީ ދުވަހެއް. އެއީ ޖޯޖް ކޯބިން ހިމެނޭހެން ރާއްޖެއަށް އެންމެ ފުރަތަމަ ޓޫރިސްޓް ގްރޫޕް ޒިޔާރަތްކުރި ދުވަސް،" މި ރަސްމިއްޔާތުގައި ޑރ. މައުސޫމް ވިދާޅުވި އެވެ.
އޭނާ ވަނީ ކޮންމެ އަހަރެއްގެ އޮކްޓޯބަރު 3، ގައުމީ ފެންވަރުގައި ފާހަގަކުރާ ޓޫރިޒަމް ދުވަހުގެ ގޮތުގައި ހަމަޖެއްސެވީތީ ރައީސް އިބްރާހިމް ސޯލިހަށް ވެސް ޝުކުރު އަދާކުރައްވާފަ އެވެ. އެއީ، 30 ކޮޓަރިއާއެކު 1972 ގައި ރާއްޖޭގެ ފުރަތަމަ ރިސޯޓް ކަމަށްވާ ކުރުނބާ މޯލްޑިވްސް ހުޅިވި ތާރީހެވެ.
މިއަދު ނެރުނު ސްޓޭމްޕްތައް މިހާރު މޯލްޑިވްސް ޕޯސްޓްގެ އީޓުކުރި އޮންލައިން ޝޮޕުން ލިބެން ހުންނާނެ އެވެ.
މިއަހަރަކީ ޓޫރިޒަމްގެ ރަންޔޫބީލް އަހަރުގެ ގޮތުގައި ފާހަގަކުރާ އަހަރެވެ. ޓޫރިޒަމް މިނިސްޓްރީން ވަނީ މުޅި ރާއްޖޭގައި ކުލަގަދަކޮށް މިކަން ފާހަގަކުރުމަށް ގިނަ ކަންތައްތަކެއް ކުރުމަށް ނިންމާފަ އެވެ.
