ކިޔެވް، ޔޫކްރެއިން (ފެބްރުއަރީ 16) - ޔޫކްރެއިންގެ ޑިފެންސް މިނިސްޓްރީ އާއި ސިފައިންނާއި ދައުލަތުގެ ދެ ބޭންކެއްގެ ވެބްސައިޓަށް ސައިބާ ހަމަލާއެއް ދީފި އެވެ.
ހަމަލާދިން ދެ ބޭންކަކީ އޮޝަޑްބޭންކް އާއި ޕްރިވެޓް އެވެ. އެއީ ޔޫކްރެއިންގެ އެންމެ ބޮޑު ދެ މާލީ އިދާރާ އެވެ. އެ ދެ ބޭންކުން ވެސް ވަނީ މައްސަލަ ހައްލުކޮށް، ހިދުމަތް އަލުން ދޭން ފަށާފަ އެވެ.
ނަމަވެސް ޑިފެންސް މިނިސްޓްރީ އާއި ސިފައިންގެ ވެބްސައިޓަށް ދިމާވި މައްސަލަ ހައްލު ކުރެވުނު ކަމެއް ސާފެއް ނޫނެވެ. އެގޮތުން ވެބްސައިޓްގެ "ޓެކްނިކަލް މަސައްކަތެއް" ކުރާ ކަމަށް އަރުވާފައިވެ އެވެ.
މީގެ މަހެއް ކުރިން ވެސް ޔޫކްރެއިނަށް އަމާޒުކޮށް ދިން ބޮޑު ސައިބާ ހަމަލާއެއްގައި ސަރުކާރުން ގިނަ ވެބްސައިޓްތަކެއް ޑައުންކޮށްލި އެވެ.
އެ ހަމަލާއަށް ފަހު ނޭޓޯއުން ވަނީ ޔޫކްރެއިނާ ގުޅިގެން ސައިބާ ހަމަލާތަކާ ދެކޮޅަށް މަސައްކަތް ކުރާނެކަން އިއުލާނުކޮށްފަ އެވެ. ޔޫރަޕިއަން ޔޫނިއަން (އީޔޫ) އިން ވެސް ބުނީ ޔޫކްރެއިނަށް އެހީވާނެ ކަމަށެވެ.
ހުޅަނގުން ދެކޭ ގޮތުގައި ސައިބާ ހަމަލާތަކުގެ ފަހަތުގައި ވެސް ރަޝިއާ އެވެ. ނަމަވެސް ޔޫކްރެއިނުން ސީދާ ރަޝިއާއަށް ތުހުމަތުކޮށްފައެއް ނުވެ އެވެ.
އަންގާރަ ދުވަހުގެ ސައިބާ ހަމަލާދިނީ ބޯޑަރު ކައިރީގައި ތިބި ރަޝިއާގެ ބައެއް ސިފައިން އެނބުރި ދާން ފަށާފައިވާ ކަމަށް ރަޝިއާއިން ބުނެފައި ވަނިކޮށެވެ.
ނަމަވެސް ޔޫކްރެއިނުން ބުނީ ރަޝިއާގެ ވާހަކަ ގަބޫލުކުރެވޭނީ ސިފައިން ދާ މަންޒަރު ފެނުމުން ކަމަށެވެ. އަންގާރަ ދުވަހު ވެސް ޔޫކްރެއިން މައްސަލައިގައި ރަޝިއާ އާއި އެމެރިކާއިން މަޝްވަރާ ކުރި އެވެ.
ރަޝިއާގެ 100،000 އަށް ވުރެ ގިނަ ސިފައިން ޔޫކްރެއިންގެ ބޯޑަރު ކައިރިއަށް ޖަމާވުމުން، ރަޝިއާއިން ޔޫކްރެއިން ހިފަން އުޅޭ ކަމަށް ތުހުމަތު ބޮޑުވި އެވެ. ނަމަވެސް ރަޝިއާއިން ދިޔައީ އެކަން ދޮގުކުރަމުންނެވެ.
ޖާސޫސީ މައުލޫމާތަށް ބިނާކޮށް، މި ހަފްތާގައި އެމެރިކާއިން ބުނީ ކޮންމެ ވަގުތަކު ވެސް ރަޝިއާގެ ހަމަލާއެއް ދީފާނެ ކަމަށެވެ. އެހެންވެ، ގިނަ ގައުމުތަކުން ވަނީ އެ ގައުމުތަކުގެ ރައްޔިތުން ޔޫކްރެއިނުން ފައިބަން އިލްތިމާސްކޮށްފަ އެވެ.
ރަޝިއާއިން ޑިމާންޑު ކުރަނީ އެމެރިކާއިން އިސްކޮށް އުޅޭ ނޭޓޯ އަސްކަރީ ކޯލިޝަނުގެ މެމްބަރެއްގެ ގޮތުގައި ޔޫކްރެއިން ނުހިމެނުމަށެވެ. ނަމަވެސް ހުޅަނގުގެ ގައުމުތަކުން ވެސް ދޫދޭކަށް ބޭނުމެއް ނުވެ އެވެ.
