ރާއްޖޭގެ ހުރިހާ ރަށްތަކަކީ ތާރު އަޅައިގެން މަގުތައް ހަދަން ޖެހޭ ރަށްތައް ނޫންކަމަށް ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވިލިނގިލި ދާއިރާގެ މެމްބަރު ސައުދު ހުސައިން ކުރެއްވި ސުވާލަކަށް ޖަވާބުދެއްވަމުން އަސްލަމް ވިދާޅުވީ ރަށްރަށުގެ ބަނދަރުތައް ހަދަން ކުރިން އެދެމުން އައި ވަރަށް މިހާރު އެދެމުން އަންނަނީ މަގުތަކުގައި ތާރު އަޅަން ކަމަށެވެ. އޭނާ ސިފަކުރެއްވީ އެއީ މިހާރު ޓްރެންޑަކަށް ވެފައި އޮތް ކަމެއް ކަމަށެވެ.
އޭނާ ވިދާޅުވީ 22 ރަށެއްގެ މަގުހަދަން މިހާރުވެސް ކޮންޓްރެކްޓަރުންނާ ހަވާލުކޮށްފައިވާ ކަމަށާއި އިތުރު 19 ރަށެއްގެ މަގުތައް ހަދަން ޕްލޭންކޮށްފައިވާ ކަމަށެވެ.
"ކޮންމެ ރަށަކީ އަޅުގަނޑުވެސް ގަބޫލެއް ނުުކުރަން ތާރުއަޅަން ޖެހޭނެ ރަށެއްގެ ގޮތުގައެއް. ބައެއް އާބާދީ ތޮއްޖެހިފައި ހުންނަ ޓްރެފިކް ހައި ތަންތަނުގައި ތާރު އަޅައިގެން މަގުތައް ހަދަން ޖެހިދާނެ. އެހެން ނަމަވެސް ރަށްރަށަށް ތަރައްގީ އައުމާ އެކީގައި މީހުންގެ ދިރިއުޅުމުގެ ވައްޓަފާޅިވެސް ބަދަލުވާނެ. އެއްތަނުން އަނެއް ތަނަށް ގޮސް އުޅޭ ގޮތް ވެސް ބަދަލުވާނެކަން އަަޅުގަނޑު ވެސް ގަބޫލުކުރަން،" އަސްލަމް ވިދާޅުވި އެވެ.
އެހެން ނަމަވެސް ވަރަށް ކުދި ރަށްރަށުގައި ވެސް ތާރު އަޅަައިގެން މަގުތައް ހަދަން ޑިމާންޑް އެބަކުރާ ކަމަށް އޭނާ ވިދާޅުވި އެވެ. އެވަރު ކުދި ރަށްތަކަކީ ވެހިކަލްތަކުގައި މީހުން ދަތުރުކުރަން ޖެހޭ ރަށްތައްކަމަށް ގަބޫލުނުކުރައްވާ ކަމަށް ވެސް އޭނާ ވިދާޅުވި އެވެ.
"އެހެން ނަމަވެސް ބައެއް ރަށްރަށް އެބަހުރި އެއްކޮޅުގައި ހުރެފައި އަނެއް ކޮޅުގައި ހުންނަ މީހާއަށް ގޮވައިލީމާ އަޑުއިވޭ ވަރުގެ ރަށްރަށް. އެރަށްރަށުގައި ވެސް ތާރުއެޅުމަށް ޑިމާންޑް އެބަކުރޭ،" އަސްލަމް ވިދާޅުވި އެވެ.
އޭނާ ވިދާޅުވި ގޮތުގައި އެވަރުގެ ކުދިރަށްތަކުގައި ވެހިކަލް ގެންގުޅެވޭނެ އަދަދުވެސް ކަނޑައަޅަން ޖެހޭ ކަމަށެވެ. އެހެން ނަމަވެސް މުދާ އުފުުލަން ޕިކަޕް ގެންގުޅެން ޖެހޭކަން ގަބޫލުކުރައްވާ ކަމަށް ވެސް އޭނާ ވިދާޅުވި އެވެ.
އޭނާ މިމޭރުމުން ވާހަކަދެއްކެވީ ވިލިނގިލި ދާއިރާގެ މެމްބަރު ސައުދު ހުސައިން ކުރެއްވި ސުވާލަށް ފަހު ރިޔާސަތުން މަޖިލީހުގެ ރައީސް މުހައްމަދު ނަޝީދު ކުރެއްވި ކޮމެންޓަކަށް ޖަވާބު ދެއްވުމުގެ ގޮތުންނެވެ. އެމަނިކުފާނު ވިދާޅުވީ ރާއްޖޭގެ ރަށްތަކުގެ މަގުތަކަކީ "ދޮންވެލިން ޒީނަތްތެރި ކުރެވިފައި ހުންނަ" މަގުތަކެއް ކަމަށެވެ. އެހެން ނަމަވެސް މިހާރު ދުއްވާ އެއްޗިހި ގެންގުޅެން ފެށުމުން ބައެއް ރަށްރަށުގައި އަޑިގުޑަން އެބަހުރި ކަަމަށް ވެސް އެމަނިކުފާނު ވިދާޅުވި އެވެ.
"ދެން އެހެން ނަމަވެސް މިރަށްރަށުގެ، ރާއްޖޭގެ ރަށްތަކުގެ މަގުތަކާ ގުޅޭ ގޮތުން ގެންގުޅޭ ވިސްނުން ބަޖެޓުން އަޅުގަނޑުމެންނަށް އެބަ ފެނޭ،" މަގުތައް ހަދަން ގިނަ އަދެއްގެ ފައިސާ ބެޖެޓްކޮށްފައި ވާތީ އެކަަމަށް އިޝާރާތްކުރައްވައި ނަޝީދު ވިދާޅުވި އެވެ.
މެމްބަރު ސައުދު ހުސައިން އަސްލަމާ މިއަދު ކުރެއްވި ސުވާލަކީ އޭނާ މިދިޔަ އަހަރު ހުށަހެޅުއްވި ސުވާލެކެވެ. އެއީ އޭނާގެ ދާއިރާގެ ރަށެއްކަމަށްވާ ކޮލަމާފުށީގެ މަގުތައް ހެދުމުގެ މަސައްކަތް ނުފެށި ލަސްވަނީ ކީއްވެކަން އޮޅުންފިލުއްވަން ކުރެއްވި ސުވާލެކެވެ. އަސްލަމް ވިދާޅުވީ އެ މަަސަކަތް މިދިޔަ މަހު އާރްޑީސީއާ ހަވާލުކޮށްފައިވާ ކަމަށެވެ.
