ބައިނަލްއަގްވާމީ އެކުވެރިކަމުގެ މެޗުގައި ސީޝެލްސް އަތުން ރޭ ގައުމީ އަންހެން ފުޓްބޯޅަ ޓީމު 1-0 އިން މޮޅުވި މެޗަކީ ރާއްޖޭގެ އަންހެން ފުޓްބޯޅައިގެ އާ ޖީލުގެ ފެށުން ކަމަށް ކޯޗު ޑޭވޯ ބާބާ ބުނެފި އެވެ.
މަރިޔަމް ނޫރާ ޖެހި ގޯލުން ރާއްޖެ ސީޝެލްސް އަތުން މޮޅުވިއިރު، މިއީ ފާއިތުވި 9 އަހަރުގެ ތެރޭގައި ގައުމީ ޓީމުން އަމިއްލަ ދަނޑުގައި ކުޅެ މޮޅުވި ފުރަތަމަ މެޗެވެ. މީގެ ކުރިން ރާއްޖެ އިން ވަނީ 2013 ވަނަ އަހަރުގެ އޭޕްރިލް މަހުގެ ތެރޭގައި ގަތަރާއި ދެކޮޅަށް މާލޭގައި ކުޅުނު އެކުވެރިކަމުގެ ދެ މެޗަށްފަހު ފަހު ގަލޮޅު ދަނޑުގައި ކުޅުނު ފުރަތަމަ މެޗެވެ. ގަތަރާއި ދެކޮޅަށް ކުޅުނު ފުރަތަމަ މެޗުން 1-0 އިން މޮޅުވިއިރު ދެވަނަ މެޗުން ރާއްޖެ މޮޅުވީ 3-0 އިންނެވެ.
ސީޝެލްސް އަތުން މޮޅުވި މެޗަކީ މިދިޔަ މަހު ގައުމީ އަންހެން ޓީމުގެ ކޯޗަކަށް ހަމަޖެއްސި ސާބިއާގެ ކޯޗު ޑޭވޯ ބާބާގެ އިރުޝާދުގެ ދަށުން ކުޅުނު ފުރަތަމަ މެެޗެވެ.
ގައުމީ ޓީމާ އެކު ނިކުތް ފުރަތަމަ މެޗަށްފަހު ކޯޗު ބާބާ ބުނީ ސީޝެލްސް އަތުން ލިބުނު މޮޅަކީ ގައުމީ އަންހެން ފުޓްބޯޅަ ޓީމްގެ އާ ޖީލުގެ ފެށުން ކަމަށާއި، މި މޮޅާ އެކު މި ޒުވާން ޓީމަށް ހިތްވަރާއި އުއްމީދު ލިބިއްޖެ ކަމަށެވެ.
ބާބާ ބުނީ މިހާރު މިއޮތް ގައުމީ ޓީމުގެ އެވަރެޖް އުމުރަކީ 21 އަހަރު ކަމަށާއި، ރޭގެ މެޗުގައި މުޅިން އަލަށް މި ފެންވަރުގެ މެޗަކަށް ނިކުތް ކުޅުންތެރިންތަކެއް ވެސް ހިމެނޭ ކަމަށެވެ. އަދި މި މެޗާ އެކު މި ހުރިހާ ކުޅުންތެރިންނަށް ބޮޑު އިތުބާރެއް ލިބޭނެކަމަށް ބާބާ ގަބޫލުކުރެ އެވެ.
"ވަރަށް އުފާވެއްޖެ. މިއީ މި ޒުވާން ކުޅުންތެރިންގެ ފެށުމޭ އަހަރެން ބުނާނީ. މުޅިން އަލަށް ފެށުން ކަހަލަ ކަމެއް މިއީ. ޒުވާން ކުޅުންތެރިން ގިނައިން ލައިގެން ކުޅުން. މި ޓީމާ އެކު ފެށުން ރަނގަޅަށް މި ދިޔައީ. އެހެންވީމަ ހުރިހާ ގޮތަކުންވެސް މި މެޗު ހާއްސަވެފައި މިއޮތީ،" ހިތްހަމަޖެހިފައި ހުރެ ބާބާ ބުންޏެވެ.
ގައުމީ ޓީމުގެ މައިގަނޑު ޓާގެޓް ކަމަށްވާ ސާފް ވިމެންސް ޗެމްޕިއަންޝިޕަށް މި ޓީމް ތައްޔާރު ކުރުމުގައި ރަނގަޅު މިސްރާބަށް ދެވޭނެ ކަމުގެ އުންމީދު ބާބާ އަށް އެބައޮތެވެ. އޭނާ ބުނީ ރޭގެ މެޗުން ފުރުސަތު ނުލިބޭ ކުޅުންތެރިންނަށް ކުރިއަށް އޮތް ދެ މެޗުން ފުރުސަތު ދޭނެކަމަށެވެ.
"މި މެޗުގައި އާ ކުޅުންތެރިން ފެނިއްޖެ. މިކަހަލަ މެޗެއްގެ ޕްރެޝަރު މިހާރު އެ ކުދިންނަށް އިނގޭނެ. މިރޭ (ރޭގެ) މެޗުގައި ފުރުސަތު ނުލިބި ބެންޗުގައި ތިބި ކުޅުންތެރިންނަށް ކުރިއަށް އޮތް ދެ މެޗުން ފުރުސަތު ދޭން އަހަރެން އިސްކަމެއް ދޭނަން" ބާބާ ބުންޏެވެ.
ގައުމީ އަންހެން ޓީމު ބުރާސްފަތި ދުވަހުގެރޭ ސީޝެލްސްއާ އެކު ދެ ވަނަ މެޗަށް ނުކުންނާނެ އެވެ. އަދި އަންނަ ހަފްތާގެ ބުރާސްފަތި ދުވަހު ސައުދީ އަރަބިއްޔާއާ ކުޅޭނެ އެވެ.
ބަލިވިޔަސް ޓީމުން ދެއްކި ކުޅުމާއިމެދު ހިތްހަމަޖެހޭ: ސީޝެލްސް ކޯޗު
ސީޝެލްސްގެ ކޯޗު އެންޖެލިން ޗުއާ ބުނީ މި މެޗަކީ މިދިޔަ ހަތް ވަރަކަށް އަހަރުގެ ތެރޭގައި ސީޝެލްސް އަންހެން ޓީމުން ކުޅުނު ދެ ވަނަ މެޗު ކަމަށާއި، އެހެން ކަމުން ނަތީޖާ ގޯސް ނޫން ކަމަށެވެ.
"އަހަރެން އުންމީދު ކުރި ވަރަށް ވުރެ ރަނގަޅަށް ޓީމުން ކުޅުނު، ހަތް ވަރަކަށް އަހަރުގެ ތެރޭގައި ދެ ވަނަ މެޗު މި ކުޅުނީ، ޖުމްލަކޮށް ބަލާއިރު އަހަރެން މިހުރީ ހިތްހަމަޖެހިފައި. ކުރިއަށް އޮތް ދެ މެޗުގައި ޓީމުން ރަނގަޅު ކުޅުމެއް ދައްކާނެކަމުގެ އުއްމީދު އެބައޮތް،" އެންޖެލިން ބުންޏެވެ.
އެންޖެލިން ބުނީ މި މެޗުން ފެނުނީ ބައިނަލްއަގްވާމީ ފުޓްބޯޅައަށް ކުޅުންތެރިން އާވެފައި ތިބި މަންޒަރު ކަމަށާއި، މި މެޗުގެ ތަޖުރިބާއާ އެކު ކުރިއަށް އޮތް ދެ މެޗުގައި އެ ޓީމުގެ ކުޅުން ރަނގަޅުވާނެ ކަމަށެވެ. ރާއްޖެއިން ޖެހި ގޯލަކީ ސީޝެލްސްގެ ކުޅުންތެރިންނަށް ހެދުނު ގޯހަކުން ޖެހުނު ގޯލެއްކަން ފާހަގަކޮށް، އެންޖެލިން ބުނީ މި މެޗުގެ ކުރީކޮޅު އެވަރުގެ މިސްޓޭކެއް ހެދުނީ މި ލެވެލްގެ ފުޓްބޯޅައަށް އާ ކުޅުންތެރިން ޓީމްގައި ގިނަވުމުން ކަމަށެެވެ.
ސީޝެލްސް ޓީމަށް ބާކީ އޮތީ ބުރާސްފަތި ދުވަހުގެރޭ ރާއްޖެއާ ދެކޮޅަށް ކުޅޭ މެޗާއި އަންނަ ހޯމަ ދުވަހު ސައުދީ އަރަބިއްޔާއާ ކުޅޭ މެޗެވެ.
