ޔޫކްރެއިންގެ ބޯޑަރު ކައިރީގައި ތިބި ބަޔެއް ސިފައިން އަނބުރާ ގެންދަން ފަށާފައިވާ ކަމަށް ރަޝިއާއިން ބުނެފި އެވެ.
ޑިފެންސް މިނިސްޓްރީން ބުނީ ބޯޑަރު ކައިރީގައި ބޮޑު އަސްކަރީ ތަމްރީންތަކެއް އަދިވެސް ކުރިއަށްދާ ކަމަށެވެ. ނަމަވެސް ބައެއް ޔުނިޓުތައް އެނބުރި މަރުކަޒުތަކަށް ދާން ފަށާފައިވާ ކަމަށެވެ.
ޔޫކްރެއިނުން ބުނީ ރަޝިއާގެ ވާހަކަ ގަބޫލުކުރާނީ ހެކި ފެނުމުން ކަމަށެވެ. އެގޮތުން "ހާލަތު ހަމައަކަށް އެޅޭ ކަމަށް ގަބޫލުކުރެވޭނީ ސިފައިން އެނބުރި ދާ މަންޒަރު ފެނުމުން" ކަމަށް ބުންޏެވެ.
ރަޝިއާގެ 100،000 އަށް ވުރެ ގިނަ ސިފައިން ޔޫކްރެއިންގެ ބޯޑަރު ކައިރިއަށް ޖަމާވުމުން، ރަޝިއާއިން ޔޫކްރެއިން ހިފަން އުޅޭ ކަމަށް ތުހުމަތު ބޮޑުވި އެވެ. ނަމަވެސް ރަޝިއާއިން ދިޔައީ އެކަން ދޮގުކުރަމުންނެވެ.
ޖާސޫސީ މައުލޫމާތަށް ބިނާކޮށް، މި ހަފްތާގައި އެމެރިކާއިން ބުނީ ކޮންމެ ވަގުތަކު ވެސް ރަޝިއާގެ ހަމަލާއެއް ދީފާނެ ކަމަށެވެ. އެހެންވެ، ގިނަ ގައުމުތަކުން ވަނީ އެ ގައުމުތަކުގެ ރައްޔިތުން ޔޫކްރެއިނުން ފައިބަން އިލްތިމާސްކޮށްފަ އެވެ.
ރަޝިއާއިން ޑިމާންޑު ކުރަނީ އެމެރިކާއިން އިސްކޮށް އުޅޭ ނޭޓޯ އަސްކަރީ ކޯލިޝަނުގެ މެމްބަރެއްގެ ގޮތުގައި ޔޫކްރެއިން ނުހިމެނުމަށެވެ. ނަމަވެސް ހުޅަނގުގެ ގައުމުތަކުން ވެސް ދޫދޭކަށް ބޭނުމެއް ނުވެ އެވެ.
