ޔޫކްރެއިން މައްސަލައިގައި ޑިމްލޮމެޓިކް ހައްލަކާ ހަމައަށް ދިޔުމުގެ އުއްމީދު އަދިވެސް އެބަ އޮތް ކަމަށް އެމެރިކާ އާއި އިނގިރޭސިވިލާތުން ބުނެފި އެވެ.
އެމެރިކާގެ ރައީސް ޖޯ ބައިޑެން އާއި އިނގިރޭސިވިލާތުގެ ބޮޑު ވަޒީރު ބޮރިސް ޖޯންސަން ވަނީ ޔޫކްރެއިން މައްސަލައިގައި 40 މިނެޓު ވަންދެން ފޯނު މެދުވެރިކޮށް މަޝްވަރާ ކުރައްވާފަ އެވެ.
ޔޫކްރެއިންގެ ބޯޑަރު ކައިރިއަށް 100،000 އަށް ވުރެ ގިނަ ރަޝިއާ ސިފައިން ޖަމާވި ނަމަވެސް، ރަޝިއާއިން ތަކުރާރުކޮށް ބުނަމުން ދަނީ ޔޫކްރެއިނަށް އަރަން ނޫޅޭ ކަމަށެވެ.
ހޯމަ ދުވަހުގެ ރަޝިއާގެ ފޮރިން މިނިސްޓަރު ސާގެއި ލެވްރޯވް ވެސް ވިދާޅުވީ ޑިޕްލޮމެސީގެ ދޮރުތައް އަދިވެސް އޮތީ ހުޅުވިފައި ކަމަށެވެ.
ރަޝިއާއިން ކޮންމެ ވަގުތަކު ވެސް ޔޫކްރެއިނަށް ހަމަލާދީފާނެ ކަމަށް ބެލެވޭތީ ގިނަ ގައުމުތަކަކުން ވަނީ އެ ގައުމުތަކުގެ ރައްޔިތުން ޔޫކްރެއިނުން ފޭބުމަށް އިލްތިމާސްކޮށްފަ އެވެ.
ބޮރިސް އާއި ބައިޑެންގެ މަޝްވަރާއަށް ފަހު ނެރުނު ބަޔާނެއްގައި ބުނީ ޑިޕްލޮމެސީ އާއި ޔޫކްރެއިނަށް އޮތް ނުރައްކާ ކުޑަ ކުރަން ރަޝިއާއަށް އޮތް ވަގުތު ކުޑަތަން ވަމުންދާ ކަމަށެވެ.
"ލީޑަރުން ފާހަގަކުރެއްވި ގޮތުގައި ޔޫކްރެއިން މައްސަލައިގައި އިތުރު ގޯސް ފިޔަވަޅުތަކެއް އަޅައިފި ނަމަ، ރަޝިއާއަށް ބޮޑު ކާރިސާއެއް ކުރިމަތިވެ، ރަޝިއާ އާއި މުޅި ދުނިޔެއަށް ވެސް ގިނަ ގެއްލުންތަކެއް ވާނެ."
ހޯމަ ދުވަހު ގައުމާ މުހާތަބު ކުރައްވަމުން ޔޫކްރެއިންގެ ރައީސް ވޮލޮޑިމިް ޒެލެންސްކީ އިއުލާނު ކުރެއްވި ގޮތުގައި ރަޝިއާއިން ހަމަލާ ދޭނެ ކަމަށް ބެލެވޭ ތާރީހަކީ ފެބްރުއަރީ 16 ވަނަ ދުވަހެވެ.
"ރައްދުގައި އަޅުގަނޑުމެންނަށް ވެސް ކުރެވޭނެ ކަންކަން އެބަ ހުރި. އަޅުގަނޑުމެންގެ ލަޝްކަރު ވަރަށް ވަރުގަދަ. މިއީ މީގެ އަށް އަހަރު ކުރިއާ އަޅާ ބަލާއިރު އެތައް ގުނައެއް ވަރުގަދަ ލަޝްކަރެއް."
ނަމަވެސް ޒެލެންސްކީ ވިދާޅުވީ އިސްކަން ދެއްވާނީ ހުރިހާ މައްސަލައެއް ވެސް މަޝްވަރާ އާއި ޑިޕްލޮމެސީގެ ތެރެއިން ހައްލު ކުރަން ކަމަށެވެ.
ރަޝިއާއިން ޑިމާންޑު ކުރަނީ އެމެރިކާއިން އިސްކޮށް އުޅޭ ނޭޓޯ އަސްކަރީ ކޯލިޝަނުގެ މެމްބަރެއްގެ ގޮތުގައި ޔޫކްރެއިން ނުހިމެނުމަށެވެ. ނަމަވެސް ހުޅަނގުގެ ގައުމުތަކުން ވެސް ދޫދޭކަށް ބޭނުމެއް ނުވެ އެވެ.
