އެހެން ޓޫރިޒަމް މަންޒިލުތަކާ އަޅާބަލާއިރު ރާއްޖެ ވަރަށް ތަފާތު ކަމަށާއި ރާއްޖެ ތަފާތުވާ އެންމެ ބޮޑު ސަބަބަކީ ދިވެހިންގެ މެހެމާންދާރީ ކަމަށް ރާއްޖެއަށް ޓޫރިޒަމް ތައާރަފު ކުރެއްވި ޖޯޖް ކޯބިން ވިދާޅުވެއްޖެ އެވެ.
މީގެ ފަންސާސް އަހަރު ކުރިން، 16 ޕެބްރުއަރީ 1972 ގައި އެންމެ ފުރަތަމަ ޓުއާ ގްރޫޕް ރާއްޖެ ގެންނެވި ކޯބިން، ޓޫރިޒަމް މިނިސްޓްރީގެ ހާއްސަ ދައުވަތަކަށް މިއަދު ހެނދުނު ވަނީ ރާއްޖެ ވަޑައިގެންފަ އެވެ. މީގެ 50 އަހަރު ކުރިން ކޯބިން އާއެެކު ރާއްޖެ ވަޑައިގަތް ކޯބިންގެ އަންހެން ދަރިފުޅު ޖޯޖިއާ ކޯބިން ވެސް މިއަދު ރާއްޖެ އައެވެ. އޭނާގެ އުމުރުރަކީ އޭރު ދެ އަހަރެވެ.
ކޯބިންއަށް އެއާޕޯޓު ވީއައިޕީން މަރުހަބާ ދެންނެވީ އިޓަލީގެ ޓުއަ ގްރޫޕް ރާއްޖެ ގެނައުމުގައި ކޯބިން އާއެކު އިސް ދައުރެއް އަދާކުރެއްވި މިހާރުގެ ފޮރިން މިނިސްޓަރު އަހުމަދު ނަސީމާއި ޓޫރިޒަމް މިނިސްޓަރު ޑރ. އަބްދުއްﷲ މައުސޫމް އެވެ.
"މިއީ ލިބޭ ވަރަށް ބޮޑު ސަރަފެއް އަދި އުފަލެއް، ވަރަށް އުފާކުރަން ޓޫރިޒަމަށް ފަންސާސް އަހަރު ފުރުން ފާހަގަ ކުރުމުގައި ބައިވެރިވުމަށް ދަވަތު ލިބުނީމަ،" ކޯބިން ވިދާޅުވި އެވެ.
އެބޭފުޅާ ވިދާޅުވި ގޮތުގައި ކޮންމެ ގައުމަކީ ވެސް ރީތި ގައުމަކަށްވި ނަމަވެސް، ރާއްޖެ އާ އެއްފަދަ ޖަޒީރާ ވަންތަ އަދި ހިތްހެޔޮ ބަޔަކު ދިރިއުޅޭ އެހެން ގައުމެއް ފާހަގަ އެއް ނުކުރެ އެވެ.
ޖަޒީރާ ވަންތަ ކަމުގެ ގޮތުން ވެސް ރާއްޖެ ތަފާތު، ރާއްޖެ އަކު ފަރުބަދައެއް ނުހުރޭ، ރާއްޖެގައި އޮތީ ވަރަށް ހިއްގައިމު ދޮންވެލީގެ ގޮނޑު ދޮށާއި ސާފު މޫދު، "ރާއްޖެ ތަފާތުވާ އެންމެ ބޮޑު ސަބަބަކީ ދިވެހިން، ދިވެހިންގެ ހިތްހެޔޮ ކަމާއި މެހެމާން ދާރީ."
ކޯބިން ވިދާޅުވީ ރާއްޖޭގެ ޓޫރިޒަމަށް ހިދުމަތް ކޮށްދިނުމަށްޓަކައި އިތުރު ފަންސާސް އަހަރު ދުނިޔޭގައި ހުރެވޭނަމަ ކިތަންމެހާ ވެސް ރަނގަޅު ރަނގަޅު ކަމަށާއި، ރާއްޖޭގެ ޓޫރިޒަމް ކުރިއަށް އޮތްތަނުގައި އިތުރަށް ކުރިއަރާ ދާތަން ދެކެން ބޭނުންވާ ކަމަށެެވެ.
މީގެ 50 އަހަރު ކުރިން ޖޯޖް ކޯބިން މާލޭގައި ދަރިފުޅަށް ކުރުނބަލެއް ދޭއިރު، ކައިރީގައި މިނިސްޓަރު އަހުމަދު ނަސީމު އިށީނދެ ވަޑައިގެން-- ފޮޓޯ އަހުމަދު ނަސީމު ޓުވިޓާ
"މި ދަތުރުގައި ވަރަށް ގިނަ ފަރާތަތަކާއި ބައްދަލު ކުރުން އެބައޮތް، ބަލާނަން އަޅުގަނޑަށް ދެން ކޮށްދެވެނީ ކޮން ކަމެއްތޯ، އެމެރިކާގެ މާކެޓް ރާއްޖެއަށް ގެނައުމަށް މަސަައްކަތް ކޮށްދޭނަށް، އެއީ ވަރަށް ބޮޑު މާކެޓެއް. ރާއްޖެއަށް ވަރަށް ރަނގަޅު މާކެޓަކަށް އެމެެރިކާ ވާނެ،" ކޯބިން ވިދާޅުވި އެވެ.
ކޯބިން ވިދާޅުވި ގޮތުގައި މިދިޔަ ފަންސާސް އަހަރު ތެރޭގައި ރާއްޖޭގެ ޓޫރިޒަމް ވަނީ ވަރަށް ބޮޑު ކުރިއެރުމެއް ހޯދައިފަ އެވެ.
"ކުރިން މީ މަސްވެރި ގައުމެއް، މިހާރު ހުރީހާ އެންމެން ވެސް އުޅެނީ ޓޫރިޒަމްގައި،" އެ ބޭފުޅާ ވިދާޅުވި އެވެ.
މިނިސްޓަރު ނަސީމާ ބެހޭ ގޮތުން ކޯބިން ވިދާޅުވީ 'ނަސިމަކީ، ބޭބެ އެއް، އެކުރެވިޔަކަށްވުރެ ގާތް ބޭފުޅެއް' ކަމަށެެވެ.
މިނިސްޓަރު މައުސޫމް ވިދާޅުވި ގޮތުގައި ޓޫރިޒަމަށް 50 އަހަރު ފުރުމާއި ގުޅޭ ބައެއް ހަރަކާތްތަކުގައި ބައިވެރިވެ ވަޑައިގަތުމަށް އެމެރިކާގައި މިހާރު ދިރިއުޅުއްވާ ކޯބިން، ވަޑައިގަތުމަކީ ޓޫރިޒަމް އަހަރަށް އިތުރު ފުރިހަމަކަމެއް ގެނެސްދިން ކަމެކެވެ. ކުރިން ވެސް އަދި މިހާރު ވެސް ކޯބިން ގެ ތަޖުރިބާ އާއި އެހީތެރިކަން ރާއްޖޭގެ ޓޫރިޒަމަށް ނުހަނު ބޭނުން ކަމަށް މައުސޫމް ވިދާޅުވި އެވެ.
ރާއްޖޭގެ ޓޫރިޒަމަށް 50 އަހަރު ފުރުން ސްޓޭމްޕް ސެޓް ނެރުމަށް މާދަމާ ހަވީރު މެންހަޓަން ބިޒްނަސް ހޮޓަލުގައި ބާއްވާ ރަސްމިއްޔާތުގަ އާއި ރާއްޖޭގައި ޓޫރިޒަމް ފެށިގެން އަދި ގޮތުގެ ތަޖުރިބާ ދަރިވަރުންނަށް ހިއްސާ ކުރުމަށް ބުރާސްފަތު ދުވަހު ހަވީރު ގައުމީ ޔުނިވާސިޓީގެ އޮޑިޓޯރިއަމްގައި ބާއްވާ ޓޯކް ޝޯގަ ކޯބިން ބައިވެރިވެ ވަޑައިގަންނަވާނެ އެވެ.
