ޔޫކްރެއިން މައްސަލައިގައި ހުޅަނގުގެ ގައުމުތަކާ އެކު ޑިޕްލޮމެޓިކް ހައްލަކަށް އައުމުގެ ފުރުސަތު އަދިވެސް އެބަ އޮތް ކަމަށް ރަޝިއާއިން ބުނެފި އެވެ.
ޓީވީ މެދުވެރިކޮށް ދެއްކި ބައްދަލުވުމެއްގައި ފޮރިން މިނިސްޓަރު ސާގެއި ލެވްރޯވް، ރައީސް ލެޑިމިއަ ޕުޓިންއަށް ވިދާޅުވީ މަޝްވަރާއަށް އޮތް ދޮރު އަދި ބަންދު ނުވާ ކަމަށެވެ.
ރަޝިއާއިން ކޮންމެ ވަގުތަކު ވެސް ޔޫކްރެއިނަށް ހަމަލާދީފާނެ ކަމަށް ބެލެވޭތީ ގިނަ ގައުމުތަކަކުން ވަނީ އެ ގައުމުތަކުގެ ރައްޔިތުން ޔޫކްރެއިނުން ފޭބުމަށް އިލްތިމާސްކޮށްފަ އެވެ.
ޔޫކްރެއިންގެ ބޯޑަރު ކައިރިއަށް 100،000 އަށް ވުރެ ގިނަ ރަޝިއާ ސިފައިން ޖަމާވި ނަމަވެސް، ރަޝިއާއިން ތަކުރާރުކޮށް ބުނަމުން ދަނީ ޔޫކްރެއިނަށް އަރަން ނޫޅޭ ކަމަށެވެ.
ރަޝިއާއިން ޑިމާންޑު ކުރަނީ އެމެރިކާއިން އިސްކޮށް އުޅޭ ނޭޓޯ އަސްކަރީ ކޯލިޝަނުގެ މެމްބަރެއްގެ ގޮތުގައި ޔޫކްރެއިން ނުހިމެނުމަށެވެ. ނަމަވެސް ހުޅަނގުގެ ގައުމުތަކުން ވެސް ދޫދޭކަށް ބޭނުމެއް ނުވެ އެވެ.
ޓީވީ މެދުވެރިކޮށް ދެއްކި ބައްދަލުވުމުގައި ޑިފެންސް މިނިސްޓަރު ސާގެއި ޝޮއިގޫ، ޕުޓިންއަށް ވިދާޅުވީ ޔޫކްރެއިންގެ ބޯޑަރު ކައިރީގައި ކުރިއަށްދާ އަސްކަރީ ބައެއް ތަމްރީންތައް ނިމެން ގާތްވެފައިވާ ކަމަށެވެ.
މައްސަލަ ހައްލު ކުރެވޭތޯ ޖަރުމަނުވިލާތުގެ ޗާންސެލަރު އޯލާފް ޝޯލްޒް ހޯމަ ދުވަހު ޔޫކްރެއިންގެ ވެރިރަށް ކިޔެވްއަށް ވަޑައިގެންނެވި އެވެ.
ޝޯލްޒް ވިދާޅުވީ ބޯޑަރު ކައިރީގައި ރަޝިއާ ސިފައިންގެ އަދަދު އިތުރު ކުރަން ޖެހޭ ސަބަބެއް ނެތް ކަމަށާއި، ޔޫކްރެއިނަށް އަރައިފި ނަމަ ބޮޑެތި އިގްތިސާދީ ފިޔަވަޅުތަކެއް ރަޝިއާއާ ދެކޮޅަށް އަޅާނެ ކަމަށެވެ.
ހޯމަ ދުވަހު އެމެރިކާއިން ވަނީ އިތުރު އެފް-15 ފައިޓާ ޖެޓު ނޭޓޯގެ ފައުޖަށް އެހީވާން ޕޮލޭންޑަށް ފޮނުވާފަ އެވެ. އޭގެ ކުރިން އެމެރިކާއިން ވަނީ އިތުރު 3000 ސިފައިން ވެސް ޕޮލޭންޑަށް ފޮނުވާފަ އެވެ.
