ޖުޑީޝަލް ސާވިސް ކޮމިޝަން (ޖޭއެސްސީ) ގައި ރައްޔިތުންގެ މަޖިލީހުގައި އިންނަވަން ޖެހިވަޑައިގެންނެވުމަކީ އުނިކަމެއް ކަމަށާއި އެހެން ނަމަވެސް މަޖިލީހުގެ މެމްބަރަކު އެ ކޮމިޝަނުގައި އިނުމަކީ ބޭނުންތެރިކަމެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ޖޭއެސްސީގެ އެކުލެވުން ބަދަލުކުރުމަށް ޓަކައި ގާނޫނުއަސާސީ ބަދަލުކުރަން މަހިނބަދޫ ދާއިރާގެ ޕީޕީއެމް މެމްބަރު އަހުމަތު ތޯރިގު ހުށަހެޅުއްވި ބިލުގެ އިބްތިދާއީ ބަހުސްގައި ތޯރިގު ދެއްކެވި ވާހަކައަށް ފަހު ނަޝީދު ވިދާޅުވީ މަޖިލީހުގެ ރައީސް ޖޭއެސްސީގައި އިންނެވުމަކީ ދެރަ ކަމެއްކަމަށް ކަަމަށް ވަނީ އެއީ ދައުލަތުގެ އެއް ބާރުގެ ވެރިޔާ ކަމަށްވާތީ ކަމަށެވެ. އެހެން ނަމަވެސް އެމަނިކުފާނު ވިދާޅުވި ގޮތުގައި އެ ކޮމިޝަނަށް ސިޔާސީ ބާރުވެެރިކަން ފޯރަން ޖެހޭ މިންވަރެއް އޮވެ އެވެ.
"އެހެން ނަަމަވެސް މަޖިލީހުގެ މެމްބަރުންގެ ތެރެއިން މެމްބަރަކު ޖޭއެސްސީގައި އިނުމަކީ އެތަނަށް ސިޔާސީ ބާރުވެރިކަން ފޯރަން ޖެހޭ މިންވަރަށް ފޯރުމަށް ބޭނުންތެރިކަމެއް،" ނަޝީދު ވިދާޅުވި އެވެ.
ޖޭއެސްސީގެ އެކުލެވުން ބަދަލުކުރުމަށް ޓަކައި ގާނޫނު އަސާސީ ބަދަލުކުރަން ތޯރިގު ހުށަހެޅުއްވި މިއީ ދެވަނަ ފަހަރެވެ. މިއަދުގެ ޖަލްސާގައި އިބުތިދާއީ ބަަހުސް ފެށީ މިދިޔަ އަހަރުގެ ފަހު ދައުރަށް އޭނާ ހުށަހެޅުއްވި ހުށަހެޅުއްވުމަށެވެ.
ޖޭއެސްސީ ގައި ހިމަނަން ތޯރިގު ހުށަހެޅުއްވި މެމްބަރުން:
- އުއްތަމަފަނޑިޔާރު
- ހައި ކޯޓުން އިންތިހާބުކުރާ ފަނޑިޔާރެއް
- ދަށު ކޯޓްތަކުން އިންތިހާބުކުރާ ފަނޑިޔާރެއް
- ވަކީލުން އިންތިހާބުކުރާ ވަކީލެއް
- ޔުނިވާސިޓީތަކުގައި ޝަރީއާ ކިޔަވައިދެއްވާ ލެކްޗަރާއިންްގެ ތެރެއިން އިންތިހާބުކުރާ ލެކްޗަރާ އެއް.
- ގާނޫނީ ފަންނު ފިޔަވައި އެހެން ފަންނުތަކުގެ ތަޖުރިބާކާރުންގެ ތެރެއިން ރައީސުލްޖުމްހޫރިއްޔާ އައްޔަން ކުރައްވައި، މަޖިލީހުން ރުހުންދޭ ތަޖުރިބާ ކާރެއް.
ސިޔާސީ އެއްވެސް އެއްވެސް ފަރާތެއް ޖޭއެސްސީގައި ނުހިމެނޭ ގޮތަށް އޮތް އެ ބިލުގެ ތައާރަފްގައި ތޯރިގު ދެެއްކެވި ވާހަަކައަށް ފަހު ނަޝީދު އިއްވެވި ލިޔެފައިވާ ބަޔާނުގައި އެމަނިކުފާނު ވިދާޅުވީ ސިޔާސީ މީހުންނަކީ ސީދާ ރައްޔިތުން އިންތިހާބުކުރާ ބައެއް ކަމަށެވެ. އެ އިރެއްގައި ރައްޔިތުންގެ ވިންދު ހުރިގޮތް ތަމްސީލުކުރަން މަޖިލީހުގެ މެމްބަރުން ނޫން ބައެއް ނެތްކަމަށް ވެސް އެމަނިކުފާނު ވިދާޅުވި އެވެ.
ޖޭއެސްސީއަށް ފަނޑިޔާރުން އިތުރުކުރަން ތޯރިގުގެ ބިލުގައި އޮތް އޮތުމާ ވެސް ނަޝީދު ދެކޮޅެވެ. އެމަނިކުފާނު ވިދާޅުވީ އެ ކޮމިޝަނުގެ މައިގަނޑު މަސައްކަތަކީ ފަނޑިޔާރުންގެ ކަންކަން ބެލުން ކަމަށް ވާއިރު އެތަނަށް ގިނަ އަދަދެއްގެ ފަނޑިޔާރުން ލުމަކީ މަސްލަހަތު ފުށުއަރާނެ ކަމެއް ކަމަށެވެ.
"އެހެން ކަމުން ޖޭއެސްސީގަައި ހިމެނޭ ފަނޑިޔާރުންގެ އަދަދަށް ބަދަލެއް ގެނައުން އެއީ ބޭނުންތެރިކަމެއްގެ ގޮތުގައި ފާހަގަވޭ،" ނަޝީދު ވިދާޅުވި އެވެ.
އެމަނިކުފާނު ވިދާޅުވީ ޖޭއެސްސީން ފަނޑިޔާރުންނާއި ސިޔާސީ މީހުންން މަދުކުރުމަށް ފަހު އިތުރަށް ހިމަނާނެ ބަޔަކު ނިންމާނެ ގޮތްތަކަކާ މެދު މަޝްވަރާކުރަން ޖެހޭ ކަމަށެވެ.
