ވިންޑްސާ، ކެނެޑާ (ފެބްރުއަރީ 13) - ކެނެޑާ އާއި އެމެރިކާއާ ދެމެދު އޮންނަ މުހިއްމު ބޯޑަރު ބްރިޖެއް ބަންދުކޮށްގެން ތިބި "ފްރީޑަމް ކޮންވޯއި" މުޒާހަރާގެ ބައިވެރިން ހައްޔަރު ކުރަން ފަށައިފި އެވެ.
ކެނެޑާގެ އޮންޓާރިއޯގެ ވިންޑްސާ ސިޓީގެ ފުލުހުން ކުރި ޓްވީޓެއްގައި ބުނީ ގާނޫނު ތަންފީޒު ކުރުމުގެ މަސައްކަތް ކުރިއަށްދާ ކަމަށާއި، މުޒާހަރާގައި ބޭނުންކުރާ އުޅަނދުތައް ވެސް ހިފަހައްޓާނެ ކަމަށެވެ.
"މަނާ ހަރަކާތްތައް އޮންނާނީ ޒީރޯ ޓޮލަރެންސް."
ކެނެޑާއިން އެމެރިކާގެ މިޝިގަންގެ ޑެޓްރޮއިޓް ސިޓީއަށް ދެވެން އޮންނަ މައި ބޯޑަރު ކްރޮސިންއަކީ އެމްބެސެޑާ ބްރިޖެވެ. އެ ބްރިޖުން މުޒާހަރާގެ ބައިވެރިން ފޮނުވާލަން ފުލުހުން މަސައްކަތް ފެށީ ހޮނިހިރު ދުވަހު އެވެ.
ބައެއް މީހުން ފޮނުވާލެވުނު ނަމަވެސް، އިތުރު ބަޔަކު ނިންމީ މަޑުކޮށްގެން ތިބުމަށެވެ. އެހެންވެ، އާދީއްތަ ދުވަހު ހެނދުނު ބްރިޖު މަތިން މީހުން ހައްޔަރުކޮށް، ބިޑި އަޅުވައިގެން ގެންދަން ފެށި އެވެ.
ކޮވިޑްގެ ފިޔަވަޅުތަކާ ދެކޮޅަށް ކެނެޑާގެ މަގުތައް ބަންދުކޮށްގެން ބާއްވާ މުޒާހަރާތައް ކޮޕީކޮށް، ފްރާންސް، ނެދަލޭންޑްސް، ސްވިޓްޒަލޭންޑް، އޮސްޓްރޭލިއާ އަދި ނިއުޒީލޭންޑުގައި ވެސް ދަނީ މުޒާހަރާ ކުރަމުންނެވެ. އޭގެ އިތުރުން އަންނަ މާޗް މަހު އެމެރިކާގައި މުޒާހަރާ ކުރަން ދަނީ ތައްޔާރުވަމުންނެވެ.
ކެނެޑާގެ އޮންޓާރިއޯގައި ކުއްލި ނުރައްކަލުގެ ހާލަތު އިއުލާނުކޮށްފައިވާ އިރު، މުޒާހަރާގެ ބައިވެރިން އެމްބެސެޑާ ބްރިޖް ދޫކޮށް ދާން ސުޕްރީމް ކޯޓުން ވަނީ އަމުރުކޮށްފަ އެވެ. އެއީ ބްރިޖު ބަންދުވުމުން ކެނެޑާ އާއި އެމެރިކާގެ ވެސް ކާރު އުފައްދާ ކުންފުނުތަކުގެ މަސައްކަތަށް ހުރަސް އެޅިފައި ވާތީ އެވެ.
މުޒާހަރާ ހުއްޓާލަން ބޮޑު ވަޒީރު ޖަސްޓިން ޓްރޫޑާ ގޮވާލެއްވި ނަމަވެސް، އެކަށީގެންވާ ފިޔަވަޅު ނާޅާ ކަމަށް ބުނެ އާއްމުންގެ ފާޑުކިޔުން ވަނީ އަމާޒުވެފަ އެވެ.
