ކިޔެވް، ޔޫކްރެއިން (ފެބްރުއަރީ 13) - ޔޫކްރެއިންގެ ބޯޑަރު ވަށާލައިގެން ތިބި ރަޝިއާ ސިފައިން ކޮންމެ ވަގުތަކު ވެސް އެ ގައުމަށް އެރުމުގެ ބިރު އެބަ އޮތް ކަމަށް ޖާސޫސީ ފަރާތްތަކުން ބުނި ނަމަވެސް، ވައިގެ ސަރަހައްދު ބަންދު ނުކުރަން ނިންމައިފި އެވެ.
ސަލާމަތީ ސަބަބުތަކަށްޓަކައި ޔޫކްރެއިން ދަތުރު ކުރުން ހުއްޓާލި ފުރަތަމަ ބޮޑު އެއާލައިނަކީ ނެދަލޭންޑްސްގެ ކޭއެލްއެމް އެވެ. އެ އެއާލައިނުން އެގޮތަށް ނިންމީ ހޮނިހިރު ދުވަހު އެވެ.
ޔޫކްރެއިންގެ ބަޖެޓު އެއާލައިން ސްކައިއަޕް އިން އާދީއްތަ ދުވަހު ބުނީ ޕޯޗުގަލް އިން ކިޔެވް އަށް ދަތުރު ކުރަމުން ދިޔަ ފްލައިޓެއް މޯލްޑޯވާ އަށް ތިރިކުރަން ޖެހުނީ ފްލައިޓް ކުއްޔަށް ދޫކުރި އަޔަލޭންޑުގެ ކުންފުނިން ޔޫކްރެއިންގެ ވައިގެ ސަރަހައްދަށް ވަންނަން ހުއްދަ ނުދިނުމުން ކަމަށެވެ.
ސްކައިއަޕް އިން ބުނީ ފްލައިޓް ކުއްޔަށް ދޫކުރާ ޔޫރަޕްގެ ކުންފުނިތަކުން ޑިމާންޑް ކުރަނީ ކުރިއަށް އޮތް 48 ގަޑިއިރު ތެރޭގައި ޔޫކްރެއިންގެ އެއާލައިންތަކުން ފްލައިޓްތައް އީޔޫގެ ވައިގެ ސަރަހައްދަށް ގެންދަން ކަމަށެވެ.
ޔޫކްރެއިންގެ އިންފްރާސްޓްރަކްޗާ މިނިސްޓްރީން ބޭއްވި ކުއްލި ބައްދަލުވުމެއްގައި ބުނީ ވައިގެ ސަރަހައްދު ބަންދު ނުކުރާ ކަމަށާއި އެއާލައިންތަކަށް އޮތް ނުރައްކާ ކުޑަ ކުރެވޭނެ ގޮތްތައް ބަލަމުންދާ ކަމަށެވެ.
ވައިގެ ދަތުރުފަތުރާ ގުޅޭ އެނެލިސްޓުން ބުނާ ގޮތުގައި ގިނަ އަދަދެއްގެ ބައިނަލްއަގްވާމީ އެއާލައިންތަކުން ވަރަށް އަވަހަށް ޔޫކްރެއިނަށް ދަތުރު ކުރުން މެދުކަނޑާލާނެ އެވެ.
އެގޮތުން ޔޫކްރެއިންގައި ހަމަނުޖެހުން ބޮޑު އިރުމަތީ ސަރަހައްދު ކައިރިން ދަނިކޮށް ޖުލައި 2014 ވަނަ އަހަރު ވައްޓާލި މެލޭޝިއާ އެއާލައިންސްގެ ފްލައިޓް އެމްއެޗް17 އަށް ދިމާވި ގޮތް އެއާލައިންތަކުގެ ހަނދާނުން ނުފިލާ ކަމަށް އެނެލިސްޓުން ބުނެ އެވެ.
އެމްސްޓަޑަމް އިން ކުއަލަ ލަމްޕޫރަށް ދަތުރު ކުރަމުން ދިޔަ އެ ފްލައިޓުގައި ތިބި 298 މީހުން މަރުވި އެވެ.
