ށ. ކޮމަންޑޫ ކައިރީގައި އޮންނަ ތިން ރަށެއް ރިސޯޓް ހެދުމަށް ކުއްޔަށް ދޫކުރުން ހުއްޓުވައި ސިވިލް ކޯޓުން އިއްޔެ ވަގުތީ އަމުރެއް ނެރެފި އެވެ.
ކޮމަންޑޫ ކައިރީގައި އޮތް ށ. މެދުރަށާއި މައިރަށް އަދި ދިގުރަށުގައި ރިސޯޓް ހަދަން އިއުލާންކޮށް އެކަމަށް ޝައުގުވެރިވާ ފަރާތްތަކަށް ސަރުކާރުން ހުޅުވާލީ ކުއްލި ގޮތަކަށް, ކޮމަންޑޫ ދާއިރާގެ ރައްޔިތުންގެ މަޖިލީހުގެ ބައި އިލެކްޝަން ކައިރިވެފައިވަނިކޮށެވެ.
ސިވިލް ކޯޓުން މިއަދު އާންމުކުރި އަމުރަކީ ޕްރިމިއާ އިކުއިޓީ ކުންފުނީގެ ފަރާތުން އެ ކޯޓަށް ހުށަހަޅާފައިވާ މައްސަލާގައި އިއްޔެ ނެރެފައިވާ ވަގުތީ އަމުރެކެވެ. ޕްރިމިއާ އިކުއިޓީ ކުންފުނިން ސިވިލް ކޯޓުގައި ދައުވާކޮށްފައިވަނީ ކޮމަންޑޫ ކައިރި ތިން ރަށަކީ އެ ކުންފުންޏަށް ސެޓްލެމަންޓް އެއްބަސްވުމެއްގެ ދަށުން ސަރުކާރުން ދޭން އެއްބަސްވެފައިވާ ރަށްތަކެއް ކަމަށް ބުނެ އެވެ.
އެއީ, 2008 ވަނަ އަހަރު އެ ކުންފުންޏަށް ލ. ބޮޑުފިނޮޅާއި އެ އަތޮޅު ގަސްފިނޮޅު ރިސޯޓް ހަދަން ދޫކުރި ފަހުން އެ ތަނުގައި އަމިއްލަ މީހެއްގެ ބިމެއް އޮތުމުން އެ ދެ ރަށް އެ ކުންފުންޏަށް އެއްބަސްވުމާ އެއްގޮތަށް ދޫނުކުރެވުނު މައްސަލަ އެވެ. އެ މައްސަލާގައި ބަދަލެއްގެ ގޮތުން ސަރުކާރުން މަޝްވަރާކުރީ ލ. އަތޮޅުގެ ދެ ރަށުގެ ބަދަލުގައި ށ. އަތޮޅުގެ ތިން ރަށް ދިނުމަށެވެ.
ނަމަވެސް, މިހާތަނަށް މިކަމުގައި ވަކި ގޮތެއް އޮތީ ނުނިމި އެވެ.
އެހެންވެ, ޕްރިމިއާ އިކުއިޓީ ކުންފުނިން ސިވިލް ކޯޓުގައި އެދިފައިވަނީ މައްސަލަ ނިމެންދެން ތިން ރަށް އެހެން ބަޔަކަށް ދިނުން މަޑުޖައްސައިދިނުމަށެވެ.
ސިވިލް ކޯޓުން ނެރުނު އަމުރުގައި ބުނީ އެ ރަށްތައް އެހެން ބަޔަކަށް ކުއްޔަށް ދީފިނަމަ, ޕްރިމިއާ އިކުއިޓީ ކުންފުންޏަށް ލިބޭ ގެއްލުން ބޮޑުވާނެ ކަމަށާއި އެ ރަށްތައް އެ ކުންފުންޏަށް ދޭން ސަރުކާރުން މަޝްވަރާކޮށްފައިވާއިރު މައްސަލާގައި ގޮތެއް ނިމެންދެން ރަށްތައް އެހެން ބަޔަކަށް ދިނުން ހުއްޓުވުމަށް ކޯޓުން ފިޔަވަޅު އަޅަން ޖެހޭ ކަމަށެވެ.
އެހެންވެ, ސިވިލް ކޯޓުގެ އިސްގާޒީ އަބްދުالله އަލީ ޓޫރިޒަމް މިނިސްޓްރީގެ މައްޗަށް އަމުރު ކުރެއްވީ ކޮމަންޑޫ ކައިރީ އޮތް ތިން ރަށް ކުއްޔަަށް ދޫކުރުމުގެ ބިޑް ފަސްކުރުމަށެވެ.
