ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ބަންދުގައި ބަހައްޓައިގެން ކޯޓަށް ހާޒިރުކުރުމަށް އަންގައި, ސިވިލް ކޯޓުން އަމުރެއް ނެރެފި އެވެ.
ސިވިލް ކޯޓުން މިއަދު ވަގުތީ އަމުރެއް ނެރުނީ ޑީއާރްޕީން އެމްޓީސީސީއަށް ދައްކަން ޖެހޭ ދަރަންޏެއް ހޯދުމަށް އެ ކުންފުނިން ދައުވާކޮށްފައިވާ މައްސަލާގަ އެވެ.
އެ ކޯޓުގެ މީޑިއާ އޮފިސަރު މި ނޫހަށް ވިދާޅުވި ގޮތުގައި ކޯޓުން ފުލުހުންގެ މައްޗަށް އަމުރުކޮށްފައިވަނީ ބަންދުގައި ބަހައްޓައިގެން ޖާބިރު މާދަމާ ކޯޓަށް ހާޒިރުކޮށްދިނުމަށެވެ.
މީގެކުރިން ވެސް ސިވިލް ކޯޓުގެ އަމުރެއްގެ ދަށުން ޖާބިރު ހައްޔަރުކުރި އެވެ. އެއީ, ވަޒީފާއާ ބެހޭ ޓްރައިބިއުނަލްގެ ހުކުމެއް ތަންފީޒުކުރަން ސިވިލް ކޯޓަށް ހުށަހަޅާފައިވާ އެ މައްސަލައިގައި ޖާބިރު ހައްޔަރުކޮށްގެން ސިވިލް ކޯޓަށް ހާޒިރު ކުރުމަށް އެ ކޯޓުން އަމުރުކުރުންނެވެ.
އޭނާ ކޯޓަށް ހާޒިރުކުރުމަށްފަހު, އެފަހަރު ބަންދުން ދޫކޮށްލި އެވެ.
އަނެއްކާވެސް ޖާބިރު ބަންދުކޮށްގެން ކޯޓަށް ހާޒިރުކުރުމުގެ އަމުރެއް ސިވިލް ކޯޓުން ނެރެފައިވާއިރު, މައުލޫމާތު ލިބިފައިވާ ގޮތުގައި ޖާބިރު ހުންނެވީ މާލޭން ބޭރުގަ އެވެ.
އެމްޓީސީސީން ޑީއާރްޕީއާ ދެކޮޅަށް ދައުވާކުރާ މައްސަލައަކީ ޖާބިރު އެ ޕާޓީގެ ލީޑަރުކަމާ ހަވާލުވުމުގެ ކުރިން ހިނގާފައިވާ މުއާމަލާތަކާ ގުޅޭ މައްސަލައެކެވެ. އެހެންވެ, އެ ދަރަނި ދެއްކެވުމަށް ޖާބިރު ގެންދަވަނީ އިންކާރު ވެސް ކުރައްވަމުންނެވެ.
