އެމްޑީޕީގެ ޗެއާޕާސަން ކަމަށް ވާދަ ކުރެއްވުމަށް ނިންމެވީ ޕާޓީ ހަރުދަނާކޮށް އެމްޑީޕީގެ ހެޔޮވެރިކަން ދެމެހެއްޓުމަށް ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް މިއަދު ވިދާޅުވެއްޖެ އެވެ.
އިންތިހާބަށް ފައްޔާޒު ނުކުންނަވާނެކަން މީގެކުރިން ވެސް ޔަގީންވެފައިވީ ނަމަވެސް, މިހާތަނަށް އެކަމާ ގުޅޭ ގޮތުން ފައްޔާޒު އެއްޗެއް ވިދާޅެއް ނުވެ އެވެ. ނަމަވެސް, އޭނާއަށް ތާއިދުކޮށް ސޯޝަލް މީޑިއާގައި ކެމްޕެއިން ދިޔައީ ކުރަމުންނެވެ.
ފައްޔާޒު މިއަދު ކުރެއްވި ޓްވީޓެއްގައި ވިދާޅުވީ, އޭނާގެ އަމާޒަކީ ޕާޓީ އިތުރަށް ހަރުދަނާކޮށް އެމްޑީޕީގެ ހެޔޮ ވެރިކަން ދެމެހެއްޓުން ކަމަށެވެ. މި އިންތިހާބުގެ ސަބަބުން ޕާޓީ އިތުރަށް ހަރުދަނާވެގެންދާނެ ކަމަށް ޝައްކު ނުކުރައްވާ ކަމަށް ވެސް ވިދާޅުވި އެވެ.
އިންތިހާބަށް ފައްޔާޒު ނުކުންނަވާނެކަން އިއުލާން ކުރެއްވިއިރު މަޖިލިސް މެންބަރު އަދި އެމްޑީޕީގެ ތަރުޖަމާނު އިމްތިޔާޒު ފަހުމީ ވެސް ވަނީ ޗެއާޕާސަންގެ މަގާމަށް ކުރިމަތިލައްވާކަން ރޭ އިއުލާން ކުރައްވާފަ އެވެ. އެމްޑީޕީގެ ބައެއް އިސް ބޭފުޅުން މިހާރު ވަނީ އިމްތިޔާޒަށް ތާއިދު އޮތްކަން ހާމަކުރައްވާފަ އެވެ.
މީގެކުރިން އެސްޓީއޯގެ އެމްޑީ ހުސެއިން އަމްރު ވެސް އެ މަގާމަށް ވާދަކުރެއްވުމަށް ޝައުގުވެރިކަން ފާޅުކުރެއްވި އެވެ. ނަމަވެސް, އެމްޑީޕީގެ އިސް ދެ ބޭފުޅަކު ޗެއާޕާސަން ކަމަށް ކުރިމަތިލައްވާނެކަން އިއުލާން ކުރެއްވުމާއެކު އިންތިހާބުގެ ވާދަވެރިކަން ވަރަށް ބޮޑުވެ, އަމްރު ވަނީ ކުރިމަތިނުލައްވަން ނިންމަވާފަ އެވެ.
އިމްތިޔާޒާއި ފައްޔާޒުގެ ކެމްޕެއިން މިހާރު ވެސް ފަށާފައިވާއިރު އެމްޑީޕީގެ އިސް ބޭފުޅުން ގެންދަވަނީ އެ ބޭފުޅުން ތާއިދު ކުރައްވާ ކެންޑިޑޭޓް ހާމަކުރައްވަމުންނެވެ.
މި ދެ ބޭފުޅުން އިންތިހާބުގައި ވާދަކުރައްވާއިރު, އިމްތިޔާޒު ފާހަގަކުރެވެނީ އެމްޑީޕީގެ ރައީސް މުހައްމަދު ނަޝީދާ ވަރަށް އަރިސް ބޭފުޅެއްގެ ގޮތުގަ އެވެ. އަނެއްކޮޅުން އިކޮނޮމިކް މިނިސްޓަރު ފައްޔާޒަކީ ރައީސް އިބްރާހިމް މުހައްމަދު ސޯލިހްގެ އެންމެ އަރިސް މިނިސްޓަރެވެ. އެހެންކަމުން, މި އިންތިހާބުގެ ފޯރިގަވާނެ އެވެ.
